"უცხოელთა და მოქალაქეობის არმქონე პირთა სამართლებრივი მდგომარეობის შესახებ“ კანონში მორიგი ცვლილებები შედის. ცვლილებები კანონით განსაზღვრული საქართველოს ვიზების გაცემის პროცედურების გამარტივებას და საქართველოში ბინადრობის ნებართვის მოპოვების შესაძლებლობის გაფართოებას ითვალისწინებს.
საქართველოს მთავრობის მიერ საკანონმდებლო ინიციატივის წესით წარმოდგენილი საქართველოს კანონის პროექტები: „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ საქართველოს კანონში ცვლილების შეტანის თაობაზე“, „სახელმწიფო ბაჟის შესახებ“ საქართველოს კანონში ცვლილების შეტანის თაობაზე“, „საქართველოს საბიუჯეტო კოდექსში ცვლილების შეტანის შესახებ“ და საქართველოს ორგანული კანონის პროექტი „საქართველოს ორგანულ კანონში „ადგილობრივი თვითმმართველობის კოდექსი“ ცვლილების შეტანის შესახებ“, რეგიონული პოლიტიკისა და თვითმმართველობის კომიტეტის წევრებს პირველი მოსმენისათვის, ეკონომიკისა და მდგრადი განვითარების მინისტრის მოადგილემ, ნათია მიქელაძემ წარუდგინა.
მომხსენებლის განმარტებით, საქართველოს ვიზის გაცემაზე უფლებამოსილი ორგანოების ჩამონათვალი გაიზრდება და საქართველოს ვიზის გამცემ ორგანოებს (საზღვარგარეთ საქართველოს დიპლომატიური წარმომადგენლობა და საკონსულო დაწესებულება, საქართველოს სახელმწიფო საზღვარზე ვიზის გაცემისას საქართველოს შინაგან საქმეთა სამინისტროს მიერ განსაზღვრული ორგანო) საქართველოს საგარეო საქმეთა სამინისტრო დაემატება.
იმ უცხოელებისათვის, რომელთა მოქალაქეობის ქვეყანაშიც საქართველოს არ აქვს დიპლომატიური წარმომადგენლობა ან საკონსულო დაწესებულება, საქართველოს ვიზის გაცემა ან საქართველოს ვიზის გაცემისათვის საჭირო ცალკეული მოქმედებების განხორციელება მიენდობა იმ მესამე სახელმწიფოს, რომელიც მისაღები იქნება ადგილსამყოფელი სახელმწიფოსთვის.
კანონპროექტით იცვლება საქართველოს ვიზის განმარტება. დგინდება, რომ საქართველოს ვიზა არის ნებართვა და არა აღნიშვნა სამგზავრო დოკუმენტში, რომელიც უცხოელს საქართველოში შემოსვლის, ყოფნის ან ტრანზიტით გავლის უფლებას მხოლოდ იმ შემთხვევაში აძლევს, თუ აღნიშნული უცხოელის საქართველოში შემოსვლაზე უარის თქმის საფუძვლები ან უცხოელის საქართველოში ყოფნის ვადის შეწყვეტის ფაქტი არ არსებობს.
კანონპროექტით მოწვევის ცნება ახლებურად განიმარტება, ვიზის გაცემის ვადები ზუსტდება, საიმიგრაციო ვიზების კატეგორიას ახალი კატეგორია (D5) დაემატება, რომელიც გაიცემა უცხოელზე, რომელსაც საქართველოს ტერიტორიაზე კანონმდებლობით დადგენილი წესით უძრავ ნივთზე, რომლის საბაზრო ღირებულება 35000 აშშ დოლარის ექვივალენტს ლარში აღემატება, საკუთრების უფლება გააჩნია.
მომხსენებლის განმარტებით, საქართველოს ვიზის მიღების მსურველ უცხოელთა დიდი რაოდენობის გათვალისწინებით, არსებობს საჭიროება საქართველოს ვიზა გაიცეს გამარტივებულად – ელექტრონული ფორმით. შესაბამისად, საქართველოს საგარეო საქმეთა სამინისტროს საქართველოს ელექტრონული ვიზების გაცემის უფლებამოსილება ენიჭება. იმ შემთხვევაში, თუ ელექტრონული ვიზის მისაღებად საჭირო სავიზო განაცხადის წარდგენა მოხდება სამინისტროს სპეციალური ვებვერდის – "ელექტრონული ვიზის პორტალის“ მეშვეობით.
შესაბამისი ცვლილებები შედის "ადგილობრივი თითმმართველობის კოდექსში“. საკანონმდებლო ცვლილება საიმიგრაციო ვიზის (არაელექტრონული ფორმით) გაცემის, აგრეთვე დიპლომატიური და სპეციალური ვიზების, D3 და D5 კატეგორიის საიმიგრაციო ვიზების გაგრძელების შემთხვევებს ეხება. სახელმწიფო სერვისების განვითარების სააგენტოს უფლებამოსილება საჭირო დოკუმენტაციის მიღებისა ვიზის დატანის შესახებ, დელეგირების ხელშეკრულების საფუძველზე მუნიციპალიტეტს გადაეცემა.
მინისტრის მოადგილემ, კომიტეტის თავმჯდომარის მოადგილის, გია ჟორჟოლიანის და სხვა დეპუტატების მიერ კანონპროეტის ირგვლივ დასმულ შეკითხვებს უპასუხა. ნათია მიქელაძის განცხადებით:
“ცვლილებების განხორციელება საქართველოში უცხოელთა შემოსვლის, უძრავი ქონების სექტორში ფულადი რესურსის ჩადების და ინვესტიციების განხორციელების კუთხით მნიშვნელოვანი სტიმული იქნება“ _ აღნიშნა მინისტრის მოადგილემ.
