25 მარტს, ჩოხატაურში, საქართველოს ჩემპიონატის მეორე ლიგის მატჩი გაიმართა, რომელშიც ერთმანეთს ადგილობრივი "ბახმარო" და სენაკის "ეგრისი" დაუპირისპირდნენ. შეხვედრა, როგორც მოსალოდნელი იყო, დაძაბული გამოდგა. მიმდინარე სეზონში ეს გუნდები უკვე ორჯერ შეხვდნენ ერთმანეთს და ორივეჯერ სენაკელი ფეხბურთელები დარჩნენ გამარჯვებული, ორივეჯერ ერთი და იმავე ანგარიშით _ 2:1. მატჩის პირველი წუთები გარდამავალი უპირატესობით მიმდინარეობდა, უფრო მეტიც, მეხუთე წუთზე სტუმრებმა გოლიც გაიტანეს, თუმცა არბიტრმა თამაშგარე მდგომარეობა დააფიქსირა და გოლი არ ჩათვალა. ამის შემდეგ "ბახმაროელები" გამოფხიზლდნენ და ინიციატივაც ხელთ იგდეს. რამდენიმე ხელსაყრელი მომენტი ვერ გამოიყენა ლაშა ციცვიძემ, რომელიც ფლანგიდან საჯარიმოში შეიჭრა და დარტყმა არაზუსტი გამოუვიდა. სამაგიეროდ, შანსი ხელიდან არ გაუშვა მასპინძელთა ერთ-ერთმა ბომბარდირმა ხვიჩა დიდიამ, რომელმაც 32-ე წუთზე დაამწუხრა ეგრისის ფეხბურთელები. ტაიმიც 1:0-ით დასრულდა.
მეორე ტაიმში მასპინძლებს აშკარად დაეტყოთ, რომ მეორე გოლის სწრაფად გატანა და თამაშის დამშვიდება სურდათ. ეგრისის ფეხბურთელები კი კონტრშეტევებით პასუხობდნენ. 55-ე წუთზე სტუმრები კაცნაკლულნი დარჩნენ _ მსაჯის შეურაცხყოფისთვის მთავარმა არბიტრმა ცაავა მოედნიდან გააძევა. "ბახმარომ" ამის შემდეგ უამრავი სახიფათო მომენტი შექმნა მეტოქის კართან, თუმცა, ხან მასპინძელთა თავდამსხმელების შეცდომების და ხანაც მეკარის თავგანწირული თამაშის შედეგად ანგარიში არ იცვლებოდა. მე-80 წუთზე ისევ დიდიამ გამოიჩინა თავი და ეგრისს მეორე ბურთი გაუტანა. სენაკელმა ფეხბურთელებმა ტაიმის მიწურულს კიდევ ერთხელ სცადეს მატჩის შემოტრიალება, 85-ე წუთზე ანგარიში მინიმუმამდე შეამცირეს და კარგადაც ანერვიულეს სტადიონზე შეკრებილი არც თუ მცირე მაყურებელი, თუმცა სასწაულის მოსახდენად არც დრო ეყოთ და არც სათამაშო კლასი. მატჩი ბახმაროს გამარჯვებით_ 2:1 დასრულდა.
დღეს კი "ბახმაროელები" გათამაშების ლიდერს და პირველ ლიგაში გადასვლის მთავარ პრეტენდენტს, ხონის "იმერეთს" მარტვილის სტადიონზე ეთამაშებიან.
