საქართველოს ყოფილმა პრემიერ-მინისტრმა, ბიძინა ივანიშვილმა გადაცემაში "კვირის 2030"-ში ქალების პოლიტიკაში მეტ ჩართულობაზე და კვოტირების სისტემის დანერგვაზე ისაუბრა.
"ის, რომ კანონის დაფუძნებით მოვახერხოთ და ვაიძულოთ საზოგადოება პირველ ხანებში, ჩემი აზრითაც ცუდი არ იქნება, სანამ შეეგუება და შეეჩვევა. პირადად მე მხარს დავუჭერდი დიდი სიამოვნებით, ორივე ხელს ავწევ მაღლა. ჩვენც, რაც შეიძლება, დავეხმაროთ. ქალების ყველაზე დიდი ფუნქცია სიცოცხლის გაგრძელებაა, შვილებს გვიჩენს ქალბატონი და გამოდის, რომ ამისთვის საზოგადოება ქალებს სჯის და მეორე რანგში გადაჰყავს. გენდერული საკითხი აქედან ისმება, რომ ჩვენ ეს საკითხი უნდა დავაბალანსოთ", – თქვა ბიძინა ივანიშვილმა.
ექსპერტი გენდერის საკითხებში თამარ ბაგრატია ჩვენთან საუბარში აღნიშნავს, რომ ბიძინა ივანიშვილმა აღნიშნული განცხადებით მხარი დაუჭირა იმ პროცესებს და ინიციატივებს, რომელიც ქალთა პოლიტიკაში მონაწილეობის გაზრდისკენაა მიმართული.
"კანონის დონეზე " გენდერული კვოტირების" შემოღება მნიშვნელოვნად გააჯანსაღებს პოლიტიკური პარტიების მიერ კანდიდატთა ნომინირების პროცესს და უფრო მეტად დემოკრატიულს გახდის მას. ასევე, იმედი მაქვს, ის სუბიექტები და ინდივიდები, რომლებიც ეწინააღმდეგებიან კვოტირების იდეას, კიდევ ერთხელ გადახედავენ საკუთარ ხედვებსა და მოსაზრებებს, ღრმად გააანალიზებენ ქალებისათვის დაწინაურების უამრავ ბარიერს და საკუთარი გადაწყვეტილებითა და მხარდაჭერით ხელს შეუწყობენ ქვეყნის დემოკრატიულ განვითარებას.
ამ განცხადების მერე ველი გამოხმაურებებს არასამთავრობო სექტორის სხვა წარმომადგენლებისგან, პოლიტიკური პარტიების ლიდერებისა თუ ნებისმიერ მოქალაქისაგან, ვინაიდან ამ პროცესში, რომელიც ახლა იწყება ( დაწყებული შემუშავებული ინიციატივიდან – კანონის მიღებამდე) მნიშვნელოვანია ყველას მხარდაჭერა, რა თქმა უნდა, კვოტირების დანერგვას ჰყავს მომხრეები და მოწინააღმდეგეები და ბუნებრივია, მსგავს "ხელოვნურ ინტერვენციას" აქვს დადებითი და უარყოფითი მხარეები. თუმცა არგუმენტების გაზომვადობის თვალსაზრისით, კვოტას დადებითი ეფექტი უფრო მეტი აქვს, ვიდრე – უარყოფითი. კვოტა ეს სოციალური კონსენსუსია დადებითი ცვლილებებისათვის", _ გვითხრა თამარ ბაგრატიამ.
