საპარლამენტო უმცირესობა, პარლამენტში პრეზიდენტის გამოსვლას ეხმაურება. როგორც ენმ-ს დეპუტატი სერტო რატიანი აღნიშნავს, პრეზიდენტი შეეხო ყველა პრობლემას, რომელიც დღეს საქართველოშია, მაგრამ არ შეეხო ამ პრობლემის საფუძვლებს. მან საერთოდ არ შეაფასა თუ რა არის ეკონომიკური პრობლემის საფუძველი და მთავრობის პასუხისმგებლობის საკითხი სართოდ არ განსაზღვრა.
"მან სწორი აქცენტი გააკეთა იმაზე, რომ საქართველოში დღეს ინსტიტუციების პრობლემაა და ინსტიტუციების პატივისცემა კლებულობს.
ახსენა აგრეთვე პარალელური მართვა და ეს იყო პოზიტიური, თუმცა ამ ფონზე მთავარი მმართველის არხსენება, ვფიქრობ რომ ძალიან უცნაური იყო.
მან ისაუბრა, რომ შსს საჭიროებს რეფორმირებას და ეს იყო პოზიტიური. მისი საუბარი ადამიანის უფლებებზე შეიძლება დადებითად შეფასდეს. თუმცა მან არ ახსენა, რომ რელიგიური ძალადობის მიმართულებით არის გაუარესება.
მისი მხრიდან საარჩევნო სისტემის რეფორმის ხსენებაც პოზიტიური იყო.
ჩვენ ხელი მოვაწერეთ იმ მემორანდუმს, სადაც საუბარია მაჟორიტარული სისტემის რეფორმაზე. საქართველოს საერთაშორისო ინსტიტუტების წინაშე აღებული აქვს ვალდებულება, რომ შეცვალოს დღეს არსებული სისტემა.
აღმასრულებელი ხელისუფლება დღეს აუცილებლად უნდა დასწრებოდა პრეზიდენტის გამოსვლას პარლამენტში. ეს შეიძლება ნეგატიურად შეფასდეს", _ აღნიშნა რატიანმა.
პრეზიდენტის გამოსვლას, ზოგადს უწოდებს საპარლამენტო უმცირესობის დეპუტატი ზურაბ ჯაფარიძე.
"პირდაპირ უნდა ითქვას, რომ დღეს პრეზიდენტმა ნახევარსიმართლეების გზა არჩია, არ აღნიშნა პრობლემის ძირითადი არსი, რომელიც არის ის რომ ამ ქვეყანას მართავს არა ინსტიტუტები ან მთავრობა, არამედ ამ ქვეყანას მართავს ერთი ადამიანია. სამწუხაროდ მან ამაზე არ ისაუბრა", _ აღნიშნავს გოკა გაბაშვილი.
"როდესაც საგარეო ფაქტორებზე საუბრობდა პრეზიდენტი აქაც თქვა, რომ ძალიან ბედნიერია იმით რომ გაერთიანდა და ანექსიად შეაფასა ის, რაც რუსეთმა გაუკეთა საქართველოს ბოლო წელს, მაგრამ სინამდვილეში ეს ასე არ იყო. უმრავლესობამ ჩააგდო რეზოლუცია, სადაც ეს ანექსიად ფასდებოდა ანუ მისი სურვილების ჩამონათვალი იყო კარგი, მაგრამ რეალობა არის სულ სხვა. რეალობა არის, რომ ჩვენ ნატოსთან დაახლოების გზით კი არ მივდივართ, რეალობა არის ის, რომ ჯანელიძე რეკავს ყოფილ თავდაცვის მინისტრთან და უკრძალავს თავდაცვის შეიარაღების შესახებ საუბარს დასავლეთ პარტნიორებთან, ეს არის რეალობა. რეალობა არის ის, რომ ქვეყნის რეალური მმართველი, ბიძინა ივანიშვილი მიდის სხვა მიმართულებით. ამ შემთხვევაში სურვილების ჩამონათვალს, რომლის მოსასმენადაც არ მოდის მთავრობა, დიდი მნიშვნელობა არ აქვს.
ერთადერთი გამოსავალი, რომ ქვეყანა სწორი მიმართულებით წავიდეს არის ის, რომ ეს მთავრობა შეიცვალოს, მოვიდეს მთავრობა, რომელიც იქნება ტექნიკური, რომელიც გადაგამს პირველ ანტიკრიზისულ ნაბიჯებს და ქვეყანას არჩევნებისთვის მოამზადებს", _ დასძინა დეპუტატმა.
