საზოგადოების, ადვოკატებისა და მოსამართლის მოლოდინი, რომ დღეს საბოლოოდ დასრულდებოდა ოზურგეთის ყოფილი გამგებლის, გიორგი ტაკიძისა და დასუფთავების სამსახურის ყოფილი ხელმძღვანელის, მერაბ კურდღელაშვილის სასამართლო პროცესი, არ გამართლდა.
უკვე მეექვსედ დასვა მოსამართლე ლელა ნოზაძემ კითხვა – მიღწეული იქნა თუ არა საპროცესო მოლაპარაკებაზე შეთანხმება და მეექვსედ მოისმინა ადვოკატისგან თხოვნა, პროცესის გადადების შესახებ.
პროკურორმა პროცესის კიდევ ერთხელ გადადების მიზეზად გუშინდელი გარემოება დაასახელა _ როგორც მან აღნიშნა, გიორგი ტაკიძის ადვოკატებმა ახალი პირობა წამოაყენეს საპროცესოსთან დაკავშირებით, რის განხილვასაც გარკვეული პერიოდი დასჭირდებოდა.
“განსასჯელისთვის უკეთეს გარემოებებზე თუ არის საუბარი, სასამართლო არ შეგზღუდავთ”, _ განაცხადა მოსამართლემ და სიტყვა გიორგი ტაკიძის ადვოკატს, მირდატ ქამადაძეს გადასცა.
“ჩვენ მზად ვიყავით შეგვესრულებინა წინა პირობა, მაგრამ რადგან ახალ პირობაზეა საუბარი, თუ პროკურატურა დადებით პასუხს მოგვცემს, ჩვენ მოსამზადებლად ერთი კვირაც გვეყოფა”, _ განაცხადა ადვოკატმა.
შემდეგი პროცესი 22 დეკემბერს ჩაინიშნა.Gგიორგი ტაკიძის მხარემ, როგორც ყოველთვის, იქაურობა უკომენტაროდ დატოვა და რა თქმა უნდა, არც იმ ახალ და თანაც უკეთეს პირობაზე გვითხრა რაიმე, რაზეც პროკურატურასთან მოლაპარაკებებს აწარმოებენ.
გიორგი ტაკიძის მხარესა და პროკურატურას შორის საპროცესო შეთანხმებასთან დაკავშირებული მოლაპარაკებები დაახლოებით, ორი თვეა, რაც გრძელდება. წინა პროცესზე, თითქოს ყველაფერი გადაწყვეტილი იყო _ “საპროცესო გარიგებასთან დაკავშირებით ჩვენსა და პროკურატურას შორის შეთანხმება მიღწეულია, უბრალოდ გარკვეული დრო სჭირდება ჩვენს მხარეს ნაკისრი ვალდებულებების შესასრულებლად”, _ განაცხადა მაშინ მირდატ ქამადაძემ.
ქამადაძის განცხადებიდან ისეთი შთაბეჭდილება რჩებოდა, რომ მხოლოდ ტექნიკური მხარის მოგვარება იყო საჭირო, რაც თანხის შეგროვებასა და შეტანას გულისხმობდა.
რაც შეეხება ახალ პირობას, “გურია ნიუსისთვის” სანდო წყაროსგან ცნობილი გახდა, რომ გარდა პირობითი მსჯავრისა (რაზეც საპროცესო უნდა გაფორმდეს), საუბარია ერთწლიან საპატიმრო ვადაზე, რაც იმ კატეგორიისა და სიმძიმის ბრალისთვის, რომელიც ტაკიძეს აქვს წაყენებული, ნამდვილად კარგი პირობაა.
“იქნებ,. სჯობს, ამ დროისთვის თავი შეიკავოთ ამ პროცესის გაშუქებისგან, ხომ ხედავთ, საქმე ადამიანის სასიკეთოდ მიდის, რაც ძალიან კარგი ამბავია და არ არის საჭირო ამ ეტაპზე რაიმე ინფორმაციის გავრცელება”, _ გაგვიცხადა ტაკიძის საქმეში საკმაოდ კარგად ჩახედულმა ადამიანმა. რესპონდენტის ვინაობას მხოლოდ იმ მოტივით არ ვასახელებთ, რომ პირობა მივეცით, მის მიერ მოწოდებულ ინფორმაციას მისი სახელით არ გავაჟღერებდით.
ჩვენ კითხვაზე, _ “საქმეების 90 პროცესი საპროცესო გარიგებით სრულდება და საერთოდ გავანებოთ თავი სისხლის სამართლის საქმეებზე წერას?”, რესპონდენტმა გვითხრა, რომ ამ კითხვას არ დავსვამდით, რომ ვიცოდეთ რა ჯდება ციხეში პატიმრის “შენახვა” და რა პირობებში უხდებათ მათ ყოფნა.
მას შემდეგ, რაც ავუხსენით, რომ ამ საქმეს საზოგადოების მაღალი ინტერესი უკავშირდებოდა, გაგვიცხადა, რომ დანარჩენი ჩვენს პროფესიულ ეთიკაზე იყო დამოკიდებული.
მიგვაჩნია, რომ ღია და საჯარო სასამართლო პროცესის გაშუქება არანაირი ეთიკის ნორმებს არ არღვევს, ასევე პირნათლად ვასრულებთ რესპონდენტის თხოვნას, არ გავამჟღავნოთ მისი ვინაობას ამ ეტაპზე. ასე რომ, თავს უფლებას მივცემთ, გავაგრძელოთ თხრობა დღევანდელი პროცესის შესახებ.
რაც შეეხება ერთწლიან სასჯელს, რის შესახებაც დღეს შევიტყვეთ, მოგეხსენებათ, პროკურატურა მაქსიმალურ დათმომებზე იმ შემთხვევაში მიდის, რაც უფრო მაღალია მასთან თანამშრომლობის ხარისხი. როგორც ჩანს, არც ეს შემთხვევა იქნება გამონაკლისი.
“გურია ნიუსი” შეეცადა გარკვეული დეტალები კურდღელაშვილის ადვოკატთან, მარინა ფილაურთანაც გაერკვია, რომელმაც გაგვიცხადა, რომ ტაკიძესთან დაკავშირებული სიახლეები ანუ უკეთესი პირობები მისთვისაც სასიხარულო ამბავი იყო.
_ ქალბატონო მარინა, თქვენი დაცვის ქვეშ მყოფ მერაბ კურდღელაშვილს უკვე აქვს აღიარებითი ჩვენება მიცემული. გიორგი ტაკიძის მხარე ჩვენთან საუბრისას აცხადებდა, რომ ეს ერთადერთი აღიარებითი ჩვენება იყო საქმეში და სხვა მტკიცებულება არ არსებობდა.
_ არ ვიცი, თქვენ იწერთ თუ არა ახლა ამას, მაგრამ მე არ მინდა ამ ეტაპზე კონკრეტული განცხადებების გავრცელება, მხოლოდ იმას გეტყვით, რომ კურდღელაშვილის აღიარებით ჩვენებამდე, სხვა აღიარებებიც იყო საქმეში. ჩემი დაცვის ქვეშ მყოფი აღიარებდა თუ არა, ამას არანაირი მნიშვნელობა არ ჰქონდა, რადგან საქმეში სხვა ისეთი მტკიცებულებებიც არსებობს, რომელიც საქმის არსს საერთოდ არ შეცვლიდა.
რაც შეეხება ამ “სხვა მტკიცებულებებს” “გურია ნიუსისთვის” ცნობილი გახდა, რომ საუბარია აუდიოჩანაწერზე, რომელიც პროკურატურას საქმეში უდევს, მაგრამ ჯერ არ გამოუქვეყნებია.
რადგან მტკიცებულებებზე სასამართლოს ჯერ არ უმსჯელია, რადგან საპროცესო მოლაპარაკებებზე მიდის საუბარი, ვერ გეტყვით რამდენად სანდო და დამაჯერებელია ეს აუდიოჩანაწერი. თუმცა, როგორც ამბობენ, კურდღელაშვილმა აღიარებითი ჩვენება მას შემდეგ მისცა, რაც ციხეში ეს ჩანაწერი მოასმენინეს.
უახლოეს მომავალში “გურია ნიუსი” უფრო დეტალურად მოგაწვდით ამ გახმაურებული საქმის გასაიდუმლოებულ დეტალებს. ამავდროულად, იმედი გვაქვს, საპროცესო გარიგების გაფორმების შემდეგ მაინც გაკეთდება მედიისთვის კომენტარები.
მანამდე კი შეგახსენებთ, რომ ოზურგეთის მუნიციპალიტეტის გამგებელი გიორგი ტაკიძე, საქართველოს მთავარი პროკურატურის ანტიკორუფციული დეპარტამენტის თანამშრომლებმა საკუთარ სახლში, 4 აგვისტოს, დილის საათებში აიყვანეს. ოფიციალური ინფორმაციით, მას დიდი ოდენობით ქრთამის აღება და 180 000 ლარის მითვისებაში თანამონაწილეობა ედება ბრალად. ქრთამის მიღების სანაცვლო, როგორც ამას დასუფთავების სამსახურის ყოფილი ხელმძღვანელი, მერაბ კურდღელაშვილი აღიარებით ჩვენებაში ამბობს, 1 100 000 ლარის მომსახურების შესყიდვაზე ხელშეკრულების გაფორმების ლობირება იყო.
შემდეგი პროცესი 22 დეკემბერსაა ჩანიშნული.
