ვანო მერაბიშვილის ლანჩხუთში სტუმრობამდე რამდენიმე საათით ადრე, ოზურგეთში, სოფელ შემოქმედში ყაჩაღობა მოხდა. ავტომატური ცეცხლსასროლი იარაღით შეიარაღებული ოთხი პირი თავს დაესხა ია აბაშმაძის ოჯახს.
შინაგან საქმეთა სამინისტროს პრესამსახურის ხელმძღვანელი ზურაბ გვენეტაძე: “ბრალდებულებმა ე.წ “სკოჩის” გამოყენებით ოჯახის წევრებს შეუკრეს ხელფეხი, გააცხელეს უთო და დაშინების მიზნით ითხოვდნენ ძვირფასეულობას. ფიზიკური ზეწოლის შედეგად, ბრალდებულებმა მოახერხეს ოჯახიდან ოქროსა და ვერცხლის ნივთების, მობილური ტელეფონის, სანადირო თოფისა დაа”მერსედესის” მარკის ავტომობილის გატაცება, რის შემდეგაც მიიმალნენ შემთხვევის ადგილიდან”.
პოლიციამ დანაშაულის გახსნა მესამე დღეს შეძლო:
_ დაკავებულია ბოროტმოქმედთა ჯგუფის წევრები: ედიშერ ცისკარიძე და ძმები _ ლაშა და კობა ლომჯარიები, ხოლო ერთი ბოროტმოქმედის, 1975 წელს დაბადებული ზაზა თოიძის მიმართ ტარდება ოპერატიული ღონისძიება მისი ადგილსამყოფელის დადგენა-დაკავების მიზნით, _ აღნიშნა გვენეტაძემ.
დაკავებულებმა ბრალი უკვე აღიარეს. ერთ-ერთი ბრალდებული, კობა ლომჯარია აღიარებით ჩვენებაში ყაჩაღობის დეტალებს იხსენებს:
_ როდესაც ოჯახში შევედით, მამაკაცმა წინააღმდეგობის გაწევა დააპირა და ჩავარტყი. მასთან შეჭიდების დროს, მანდილოსანმა წამოიწია და მოცილების მიზნით მანდილოსანსაც მოხვდა თავის არეში დანის ტარი. ამ დროს ხელები შევუკარი და საწოლთან, იატაკზე დავსვი ყველა. მანდილოსანმა მიმანიშნა სად იყო ოქრო, ავდექი და თითონ ავიღე. მივხვდი, რომ მეტი არაფერი ჰქონდათ, თორემ იმასაც მეტყოდნენ. აზრი აღარ ჰქონდა იქ გაჩერებას და წამოვიყვანე ოჯახის კუთვნილი “მერსედესის” ფირმის ავტომანქანა და იმ მანქანით წამოვედი, _ აღნიშნულია ლომჯარიას ჩვენებაში.
ჩვენი ინფორმაციით, სამართალდამცველებს დანაშაულის გახსნა იმან გაუადვილა, რომ შეჭიდების დროს, ერთ-ერთ ბრალდებულს ხელი გაეჭრა და სწორედ ამ “ნიშნით” შეძლეს მისი დაკავება.
გავრცელებული ინფორმაციით, აღნიშნული პირები ჩოხატაურში მომხდარ ყაჩაღობებშიც მონაწილეობდნენ. ჩვენი წყაროს ინფორმაციით, ლომჯარიას გოგოლესუბანში ნათესავები ჰყავს და როგორც ამბობენ, მან ჩოხატაური ძალიან კარგად იცის. შესაბამისად, ჩოხატაურში მომხდარ ყაჩაღობებში ამ ჯგუფის მონაწილეობას პოლიცია რეალურ ვერსიად განიხილავს. როგორც გვითხრეს, ლომჯარიამ ეს აღიარა კიდეც და გოგოლესუბანში, შემთხვევის ადგილზეც ჰყავდათ, თუმცა ამ ინფორმაციას ოფიციალურად არ ადასტურებენ სამართალდამცველები. შინაგან საქმეთა სამინისტროს პრესსამსახურის ხელმძღვანელის, ზურაბ გვენეტაძის თქმით, ჩოხატაურში მომხდარ ყაჩაღობებზე სისხლის სამართლის საქმეებია აღძრული და გამოძიების ინტერესებიდან გამომდინარე კომენტარის გაკეთება მიზანშეწონილი არ არის.
