სამი დაკავებული და ერთი ძებნილი _ სამართალდამცავების ინფორმაციით, სოფელ ოზურგეთის მუნიციპალიტეტის სოფელ შემოქმედში მომხდარი ყაჩაღობა გახსნილია და ეჭვმიტანილები დაკავებულები არიან. ჩვენი წყაროს ინფორმაციით, სამართალდამცავებმა ჩხრეკა ისე ჩაატარეს დაკავებულ კობა და ლაშა ლომჯარიების ოჯახში, რომ მათი ნათესავები და ახლობლები ამ პროცესს არ დასწრებიან. როგორც ოჯახის წევრები ჩვენთან საუბრის დროს ამბობენ, სამართალდამცავებმა მათ სიტყვიერი შეურაცხყოფაც კი მიაყენეს.
“გურია ნიუსი” იმ დეტალებზე გესაუბრებათ, რომელიც საზოგადოებისთვის უცნობია. ადვოკატმა გელა ნაცვალაძემ ჩვენთან საუბრისას თქვა, რომ 2011 წლის 11 დეკემბერს, საღამოს 9 საათზე, მას ლომჯარიების ოჯახის წევრებმა სამართლებრივი დახმარებისთვის მიმართეს:
_ ეს იყო პოლიციის მიერ დაკავებული ლაშა ლომჯარიას მხარე. საღამოს 10 საათისთვის უკვე გაფორმებული მქონდა ხელშეკრულება, გამაჩნდა ორდერი, მივედი პოლიციაში, სადაც ყურადღება საერთოდ არ მომაქციეს.
მორიგემ მითხრა, მიმართე პოლიციის უფროსსო და მეც მივმართე. რა თქმა უნდა, ყველამ მითხრა, ასეთი პიროვნება ჩვენთან არ არის დაკავებული, არაფერი ვიცითო. არადა, ნამდვილად დაკავებული იყო. შემდეგ დავურეკე გამომძიებლებს. ვეცადე, იქნებ, ასე მაინც მიმეღო ინფორმაცია. ყველა მეუბნებოდა, არ ვიცითო. არც სამმართველოს გამომძიებელმა მაჩვენა პატიმარი. შემდეგ მითხრეს, საერთოდ არ არის შენობაში ასეთი პიროვნებაო. ერთი სიტყვით, არ მომცეს საშუალება, შევხვედროდი ჩემი დაცვის ქვეშ მყოფ პირს.
ამის მიზეზი, ჩემი აზრით, არის პოლიტიკური სიტუაცია. მონაწილეობას ვიღებდი ივანიშვილისა და მისი მეუღლის მოქალაქეობის აღდგენასთან დაკავშირებით ხელმოწერების შეგროვებაში. მე პოლიტიკაში არ ვერევი _ უბრალოდ, დავაფიქსირე ჩემი მოქალაქეობრივი პოზიცია.
რადგან ვერ მივაღწიე პატიმართან შეხვედრას, ხელშეკრულების ორდერი გამიუქმა დაზარალებულის პატრონმა _ შენ პატიმართან ვერ შეხვედი, ვერ ნახე და მე რას დამეხმარებიო. იგივე პიროვნებამ მიმართა სხვა ადვოკატს, რომელიც პატიმარს უპრობლემოდ შეხვდა. რატომ უნდა იყოს აქ პოლიტიკური ორიენტაცია განმსაზღვრელი? მე რას დავაშავებდი ჩემი პოლიტიკური ორიენტაციით? რატომ უნდა შეეშალათ ჩემთვის ხელი?
_ გქონიათ თუ არა სხვა დროს ასეთი შემთხვევა?
_ კი. საფუძვლიანი ეჭვი მაქვს, რომ ჩემი დაბრკოლება ბიძინა ივანიშვილის პოლიტიკაში მოსვლას უკავშირდება. კონსტიტუციური უსაფრთხოების დეპარტამენტის აჭარა-გურიის სამმართველოს თანამშრომელმა ვანო საჯაიამ დამიძახა პოლიციის შენობის წინ და მითხრა, გავიგე, ივანიშვილის შესახებ ხელმოწერებს აგროვებო. მეტი არაფერი უთქვამთ, თუმცა, ეს ნათელი მაგალითია იმისა, რომ მაბრკოლებს პოლიცია. ხელისუფლება და პოლიცია ორივე ერთად არღვევს კანონს დაკავებულის მიმართ. ვაცხადებ საქვეყნოდ _ რა განაჩენიც უნდა დადგეს მომავალში, იქნება უკანონო და უსამართლო, იმიტომ, რომ ის პიროვნება, რომელმაც დასაცავად მომმართა, იყო დაცვის გარეშე. ეს დაფიქსირებულია პოლიციაში ვიდეოკამერებით. 2011 წლის 11 დეკემბრის საღამოს ათი საათიდან, 2011 წლის 12 დეკემბრის დილის 5 საათამდე ვცილობდი, შევხვედროდი პატიმარს.
_ ძალა ვინ გამოიყენა?
_ პოლიციელმა ოთარ გაბაიძემ. იყვნენ სხვა პოლიციელებიც. ხელი შემეშალა ჩემი საქმიანობის გახორციელებაში, შეილახა ჩემი რეპუტაცია და საქმიანი იმიჯი. აუცილებლად მივმართავ სასამართლოს სარჩელით, მორალური ზიანის ასანაზღაურებლად, მივალ ბოლო ინსტანციამდე, სტრასბურგამდე.
მოსამართლე ვიყავი 1995-2004 წლებში, ამ ხელისუფლების დროსაც. ბოლოს ვიყავი ჩოხატაურის რაიონული სასამართლოს თავმჯდომარის მოვალეობის შემსრულებელი და ასევე მომაგრებული ვიყავი ოზურგეთის რაიონულ სასამართლოშიც. 2004 წელს განვიხილე სამოქალაქო პენსიონერების საქმე, რომელიც ეხებოდა გაუცემელ პენსიებს. ამ საქმით, დაახლოებით მილიონნახევარი ლარი მოიხსნა ბიუჯეტიდან პენსიონერების სასარგებლოდ. იმთავითვე არ მოეწონა ამ ხელისუფლებას ჩემი გადაწყვეტილება, რომ ყოველგვარი შეთანხმების გარეშე, ხელისუფლებისგან დამოუკიდებლად მივიღე ეს გადაწყვეტილება. პირდაპირ სააკაშვილს მოახსენეს ამის შესახებ _ ვიღაც გელა ნაცვალაძემ გაანადგურა ბიუჯეტიო. ამის შემდეგ ჩემმა თანაკურსელმა მამუკა მამალაძემ, ყოფილი სააპელაციო სასამართლოს თავმჯდომარემ, დამიბარა იუსტიციის საბჭოში და მითხრა, ვიცი, რომ ძალიან კარგი ბიჭი ხარ, მაგრამ ხომ არ დაწერდი განცხადებას წასვლის შესახებო. მე არ ვიცოდი, თუ მაგ საკითხზე მეძახდით, მოიტანეთ ავტოკალამი, ფურცელი და დამაკვირდით კარგად, ხელი თუ ამიკანკალდება,-მეთქი, ვუთხარი. დავწერე განცხადება და სრულიად თავისუფალი წამოვედი.
იმ დროს, როცა პატიმართან არ მიშვებდნენ და ვერ დავადგინე, ვისთან და სად იმყოფებოდა ჩემი დაცვის ქვეშ მყოფი პირი, მივედი მორიგესთან, სადაც დავინახე დაგდებული ქაღალდი _ დაკავების ოქმი, რომელიც პოლიციელებს დარჩათ მორიგესთან.
19 საათსა და 20 წუთზე იყო დაკავებული, ანუ როცა მე მივმართე მაგათ, ეგ პირი დაკავებული იყო არა ყაჩაღობისთვის, არამედ ნარკოტიკების მოხმარების ბრალდებით. ჩემი პოლიციაში ყოფნისას, იქვე იმყოფებოდა ერთ-ერთი ძმის ადვოკატი გიორგი შალიკაშვილი. ჩემთვის უცნობია, აღიარებს თუ არა დაკავებული დანაშაულს, მაგრამ დანამდვილებით ვიცი, რომ ამ ადამიანს ნარკოტიკთან შეხება არასოდეს ჰქონია.
“გურია ნიუსთან” საუბარში ეჭვმიტანილის კობა ლომჯარიას მეუღლე, თინათინ სირაძე მაზლის, ლაშას უდანაშაულობაზე საუბრობს:
_ ჩემი მაზლი უდანაშაულოა. არ მომცეს იმის საშუალება, რომ ადვოკატის მომსახურებით გვესარგებლა. ორდერის მქონე ადვოკატი არ შეუშვეს მასთან. დიდხანს გვაწვალეს, საღამოს 8-ის ნახევრიდან დილის 7 საათამდე ვიყავით პოლიციის შენობაში. პოლიციელები ხან იძახდნენ ქუთაისშიაო, ხან _ ჩოხატაურშიაო, ბოლოს შეურაცხყოფაც კი მიაყენს ჩვენს ადვოკატს და როგორც მათ უნდოდათ, ისე გააკეთეს.
_ რა გაძლევთ იმის საფუძველს, როცა აცხადებთ, რომ თქვენი მაზლი უდანაშაულოა?
_ როცა ყაჩაღობა მოხდა, ის სახლში იყო.
_ როგორ დააკავეს ის?
_ მოდიოდა თბილისიდან. გააჩერეს ქუჩაში და აიყვანეს. ის ურეკში, დაკავების დროს სცემეს. ჩემი მეუღლის აყვანის დროს არც მეზობელი დაისწრეს, არც ჩემი დედამთილი, არც _ მე, არც _ ადვოკატი. როცა ჩემს მაზლს ცხოვრებაში წამალიც კი არ აქვს დალეული, სისხლში ოპიუმი აღმოუჩინეს. მაქვს ინფორმაცია, როგორ მიაღებინეს წამალი, დაალევინეს რაღაც სითხის სახით. ადვოკატს მასთან შესვლის უფლება არ მისცეს და მიაყენეს ფიზიკური შეურაცხყოფა. პოლიციის თანამშრომლებმა კიბეზე რომ არ აუშვეს გელა ნაცვალაძე, ეს ხომ არის დაფიქსირებული ვიდეოთვალში? ტანსაცმელი, რომელიც ლაშას ეცვა, არ მოგვცეს. ამბობენ, ნაცემია და ტანსაცმელი ტანზე შემოაგლიჯეს. იმასაც არ მეუბნებოდნენ, ამ საქმის გამომძიებელი ვინ იყო. ჩემი დედამთილი გეტყვით, როგორ შეურაცხყოფაზე გადადიოდნენ და რას აკეთებდნენ. გაგვიმარტონ, რატომ არ დაისწრეს არც ერთი მეზობელი ამ ოპერაციის ჩატარების დროს, მაშინ, როცა ნივთმტკიცება ამოიღეს? ვითხოვ კონკრეტული სამმართალდამცავების დასჯას.
_ რა იცით, რომ სცემეს?
_ ვინც იყო ჩემს მაზლთან ერთად, მისი მეგობარია. იმან თქვა. თუმცა, ის გამოუშვეს. ურეკში ისეთი ამბავი ყოფილა, ხალხი ქუჩაში გამოცვივდა. თუ ნარკოტიკი ჰქონდა და ეწეოდა რეალიზაციას, რატომ არ დაგვასწრეს? რატომ გადადიოდნენ შეურაცხყოფაზე? რატომ დაალევინეს რაღაც სითხე?
_ რა იცით, რომ დაალევინეს?
_ ადვოკატს უთხრა. მეტსაც გეტყვით _ მეც რომ ვყოფილიყავი იმ მანქანაში ჩემს მაზლთან ერთად, ალბათ, მეც ამიყვანდნენ და მეც ჩამიდებდნენ ნარკოტიკს. მაქვს ინფორმაცია, რომ ნარკოტიკის ჩადება ჩემთვისაც მზადდებოდა. მთელ ოჯახს წირავდნენ. მოვიდნენ და ახლაც გამწირონ, არ მეშინია. პასუხი არ უნდა მოეთხოვოს შეურაცხყოფისთვის? კი, ბატონო, ჩემმა მეუღლემ აღიარა, მე ჩემს ქმარზე პრეტენზია არ მაქვს, ჩემი მაზლი უდანაშაულოა.
ბრალდებულის სტატუსით დაკავებულის ბიცოლა “გურია ნისუთან” საუბარში აღნიშნავს, რომ როცა აიყვანეს კობა ლომჯარია, მამამისს უთხრეს სიურპრიზი გელოდება: _ თურმე მეორე შვილის აყვანას აპირებდნენ. მე მიყვირეს, არ შემოხვიდე შიგნით, არ შეიძლება, აქ ისეთი რაღაცები ვნახეთ, არავის შემოსვლა არ შეიძლებაო. მერე ერთ-ერთმა პოლიციელმა აგინა დედას.
ეჭვმიტანილის ადვოკატი, დავით მამალაძე “გურია ნიუსთან” საუბარში ამბობს, რომ მოპოვებული მტკიცებულების ოფიციალური დოკუმენტაცია ჯერ არ გააჩნია, თუმცა რაღაც მონახაზები აქვს:
_ ეს უნდა იყოს აუცილებლად დაუშვებლად ცნობილი, რადგან ადვოკატის გარეშე ჩატარებული ყველა საგამოძიებო მოქმედება არის უკანონო.
_ როცა თქვენ ჩაერთეთ საქმეში, ეს პროცედურები ჩატარებული იყო?
_კი. საგამოძიებო სამუშაოები ჩატარებული იყო, რაც უკანონოა. ექსპერტიზა ჩატარებული ჰქონდათ და მე შედეგები გამაცნეს, რაც დარღვევაა.
გელა ნაცვალაძე: _ მთავარი ისაა, რომ ადგილი არ ჰქონდათ, ოზურგეთის დროებითი მოთავსების იზოლატორში რომ მოეთავსებინათ პატიმარი. პირს დაკავების მომენტშივე უნდა განემარტოს დაცვის უფლების შესახებ. მე ვიცი, რომ მან განაცხადა, მე მსურს ადვოკატის მომსახურებაო. ანუ ქმედებები, რაც იქნა გახორციელებული, მოხდა ადვოკატის მონაწილეობის გარეშე. ეს ნიშნავს იმას, რომ დარღვეული იქნა ბრალდებულის დაცვის უფლება, რაც საქართველოს მოქმედი კანონმდებლობით და ძალიან ცუდი საპროცესო კოდექსის მიხედვით, არის განაჩენის გაუქმების საფუძველი.
“გურია ნიუსმა” ინფორმაციის გადამოწმება შინაგან საქმეთა სამინისტროს აჭარა-გურიის პრესსამსახურის უფროსთან, მაია გიორგაძესთან სცადა, თუმცა გიორგაძემ კითხვის დასმაც არ დაგვაცალა, ისე გადაგვამისამართა გვენეტაძესთან.
შინაგან საქმეთა სამინისტროს პრესსამსახურის ხელმძღვანელმა, ზურაბ გვენეტაძემ კი სატელეფონო საუბრისას “გურია ნიუსს” ერთი “რჩევა” მისცა: _ ჩვენს საიტზე დევს ყველანაირი ინფორმაცია და შეგიძლიათ, გადმოიღოთო, გვითხრა და ტელეფონი გაგვითიშა.
გურიის სამხარეო მთავარი სამმართველოს უფროსმა, დავით ცირეკიძემ “გურია ნიუსის” კითხვა მოისმინა და გიორგაძესავით, გვენეტაძესთან დაკავშირება “გვირჩია”.
ჩვენ ასევე დავუკავშირდით შინაგან საქმეთა სამინისტროს კონსტიტუციური უსაფრთხოების დეპარტამენტის აჭარა-გურიის სამმართველოს თანამშრომელს, ვანო საჯაიას და ვკითხეთ, ადასტურებდა თუ არა გელა ნაცვალაძის მიერ გაკეთებულ განცხადებას:
_ ხუთ წუთში მე თვითონ დაგირეკავთ, _ გვიპასუხა საჯაიამ და რასაკვირველია, აღარ დაურეკავს.
