2004 წლის საქართველოს საპრეზიდენტო არჩევნები პირველი რიგგარეშე საპრეზიდენტო არჩევნები იყო, რომელიც 2004 წლის 4 იანვარს ჩატარდა.
არჩევნებს წინ უსწრებდა "ვარდების რევოლუცია" და ედუარდ შევარდნაძის პოსტიდან გადადგომა.
საპრეზიდენტო არჩევნების პარალელურად, ტარდებოდა პარლამენტის მაჟორიტარი წევრების არჩევნები იმ 11 საარჩევნო ოლქში, რომელშიც გამარჯვებული ვერ გამოვლინდა 2003 წლის ნოემბრის საპარლამენტო არჩევნებში.
მათ შორის ლანჩხუთშიც, სადაც ბიძინა გუჯაბიძემ, რომელიც "ნაციონალური მოძრაობის" კანდიდატი იყო, დიდი უპირატესობით გაიმარჯვა.
საპრეზიდენტო არჩევნებში მონაწილეობდა 6 კანდიდატი _ თეიმურაზ შაშიაშვილი, როინ ლიპარტელიანი, ზაზა სიხარულიძე, ქართლოს ღარიბაშვილი, ზურაბ ქელეხსაშვილი და მიხეილ სააკაშვილი.
პარტიებს, რომლებიც არ უჭერდნენ მხარს "ვარდების რევოლუციას" ან დისტანცირებულნი იყვნენ მისგან (ახალი მემარჯვენეები, საქართველოს ლეიბორისტული პარტია, დემოკრატიული აღორძინების კავშირი"), საპრეზიდენტო კანდიდატები რ წარუდგენიათ.
არჩევნები მიხეილ სააკაშვილის გამარჯვებით დამთავრდა _ მან ხმათა თითქმის 97% მიიღო და 1 890 256 ხმით საქართველოს პრეზიდენტი გახდა.
ამავე წლის 28 მარტს ხელახალი საპარლამენტო არჩევნები ჩატარდა პროპორციული საარჩევნო სისტემით. არჩევნებში მონაწილეობდა 17 პარტია. 7%-იანი ბარიერი გადალახა ორმა პარტიამ.
"ნაციონალური მოძრაობა – დემოკრატები" პარლამენტში 66.24% მოხვდნენ (992 275 ხმა), ხოლო "მემარჯვენე ოპოზიცია – მრეწველები, ახლები" 7.56%-ით 113 313 ხმით.
შესაბამისად "ნაციონალურ მოძრაობა _ დემოკრატებს" 135 მანდატი ერგოთ, "მემარჯვენე ოპოზიციას" კი _ 15.
ამ არჩევნებისთვის არ არსებობდა საქართველოს მოქალაქეთა შესახებ მონაცემთა სრულყოფილი ბაზა, რომელსაც შეიძლება დაყრდნობოდა ცენტრალური საარჩევნო კომისია. ცენტრალური საარჩევნო კომისიის ინფორმაციით, ამომრჩეველთა სიის ფორმირების მიზნით მოხდა მოქალაქეთა წინასწარი საარჩევნო რეგისტრაცია, ამისათვის შეიქმნა საუბნო საარჩევნო კომისიები, რომლებიც ახორციელებდნენ მოქალაქეთა წინასწარ რეგისტრაციას შინაგან საქმეთა რაიონულ სამმართველოებთან ერთად.
საპრეზიდენტო არჩევნებზე ყველა საარჩევნო უბანზე იყო ამომრჩეველთა საუბნო ხელნაწერი სია, დადასტურებული საუბნო კომისიის თავმჯდომარის, მდივნისა და შინაგან საქმეთა შესაბამისი რაიონული სამმართველოს პასუხისმგებელი პირის მიერ.
მათთვის, ვინც არ გაიარა წინასწარი საარჩევნო რეგისტრაცია, არჩევნების დღეს გათვალისწინებული იქნა პროცედურა, რათა არ დარღვეულიყო საარჩევნო უბანზე მისული საქართველოს ნებისმიერი მოქალაქის კონსტიტუციური უფლება – მისცეს ხმა, გამოხატოს საკუთარი ნება.
ცესკო-ს მონაცემებით, რომლის თავმჯდომარე იმ დროს ზურაბ ჭიაბერაშვილი გახლდათ, 2004 წელს ამომრჩეველთა რაოდენობა იყო 2 343 087, არჩევნებში მონაწილეობა მიიღო 1 498 012 ადამიანმა.
არჩევნებმა, როგორც მთელ საქართველოში, გურიაშიც მშვიდ ვითარებაში ჩაიარა და შედეგები მთელი საქართველოს იდენტური იყო.
