ოზურგეთის მუნიციპალიტეტის სოფელ მთისპირში, ე.წ. "უკანავაში" მცხოვრები მარკოიძეების ოჯახი ხელისუფლებას დახმარებას სთხოვს.
5 სულიანი ოჯახი, სადაც ერთი მცირეწლოვანი და ორი სიმსივნით დაავადებულია, თვიდან თვემდე მხოლოდ სოციალური დახმარების იმედზე არიან. მათი საცხოვრებელი კი ერთი უსახური ქოხია, რომელიც ორი ოთახისგან შედგება და ისიც ფანჯრებისა და იატაკის გარეშე.
ოჯახის რძალი, 22 წლის შორენა მარკოიძე, "გურია ნიუსს" თავისი გასაჭირის შესახებ ესაუბრა.
"დედამთილს სიმსივნე თავში აქვს და ლოგინშია ჩაწოლილი, ფიზიკურად არ შეუძლია, მამამთილს ყელზე აქვს სიმსივნე, ვერ საუბრობს, უმძიმესად არის დაავადებული, თითქმის მშივრები ვართ, ჩვენი შემოსავალი მხოლოდ სოციალური დახმარებაა, რომელიც ჩემს მამამთილს და დედამთილს წამლებში არ ჰყოფნის", _ ამბობს შორენა მარკოიძე.
მისივე თქმით, ოჯახი ღატაკების ფენას მიეკუთვნება, რომელსაც სახელმწიფოსგან არანაირი დახმარება არ აქვს.
"ვართ უმძიმესად გაჭირვებულები, ღატაკები, შეიძლება ითქვას ღატაკზე უარესად მცხოვრებლები. აქვე ბახვი ჰესის მშენებლობაა, სადაც ჩემი ქმარი ადრე მუშაობდა და ისიც გამოუშვეს, არაფერს არ ვითხოვთ იმის გარდა, რომ ჩემს მეუღლეს სადმე სამუშაო ჰქონდეს, პურის ფული მოიტანოს სახლში, ის კი არა, ტყეში, ჩვენს საკარმიდამო ნაკვთში შეშა მოჭრა და იმაზეც დაგვაჯარიმეს, სად გვაქვს ჩვენ ჯარიმის გადახდის საშულება? აბა რითი ვიარსებოთ? გვაქვს ფული რომ შეშა ვიყიდოთ? წლინახევრის ბავშვი გავყინოთ? როგორ სახლში ვცხოვრობთ ამასაც ხედავთ, აქ ვიძინებთ და ვჭამთ 5 სული, ყველანაირად გვიჭირს, დაგვეხმარეთ ძალიან გთხოვთ. ერთჯერადი დახმარებისთვის გვაქვს დაწერილი განცხადება, თუმცა ჯერ პასუხი არ მოგვსვლია."
სოფელ მთისპირის მაჟორიტარი დეპუტატი ვლადიმერ ჩავლეშვილი "გურია ნიუსთან" აღნიშნავს, რომ მარკოიძეების ოჯახი მართლაც უმძიმესს პირობებში ცხოვრობს, თუმცა რა გააკეთა ადგილობრივმა ხელისუფლებამ აღნიშნული ოჯახის დასახმარებლად, მაშინ როცა ვლადიმერ ჩავლეშვილი წლების განმავლობაში იყო მთისპირის დეპუტატი, რწმუნებული და ახლა კვლავ დეპუტატია, ამაზე კონკრეტული პასუხი ვერ მოგვცა.
"რა თქმა უნდა გაჭირვებული ოჯახია, გეთანხმებით, აქვთ ჯანმრთელობის პრობლემაც, როცა მოგვმართეს დახმარებისთვის, ყოველთვის დავაკმაყოფილეთ, ახლა თუ დაწერილი აქვთ განცხადება, ამასაც მიიღებს "_აღნიშნავს დეპუტატი.
