დაბა ლაითურში გამართულ აქციაზე, ცოტა მოგვიანებით ოზურგეთის მუნიციპალიტეტის გამგებელის, მერაბ ჭანუყვაძე და გურიის გუბერნატორის მოვალეობის შემსრულებელი, ქეთი მოისწრაფეშვილი მივიდნენ. აქციის მონაწილეები წინა ხელისუფლების მიერ უკანონოდ გაყიდული მიწების მათ საკუთრებაში დაბრუნებას ითხოვენ. მოსახლეობის მიერ მოწოდებული ინფორმაციით, კომპანიებმა "ვანრიკმა" და "ჯეოპლანტმა" არარეალურ ფასად იყიდეს მიწის ნაკვეთები დაბა ლაითურში.
ოზურგეთის მუნიციპალიტეტის გამგებლის მერაბ ჭანუყვაძის თქმით, მათ ესმით ლაითურის მოსახლეობის პრობლემა, რომლის წინაშეც დაბის მაცხოვრებლები უკვე დიდი ხანია დგანან.
"საქმეს ართულებს ის, რომ ამ შემთხვევაში, საქმე გვაქვს კერძო კომპანიებთან, რომლის საქმიანობაშიც ადგილობრივი თვითმმართველობა პირდაპირ ვერ ჩაერევა. გუბერნატორის მოვალეობის შემსრულებელთან ერთად ვაწარმოებთ მოლაპარაკებებს კომპანია "ვანრიკთან" და "ჯეოპლანტთან." ვცდილობთ მივაღწიოთ შეთანხმებას, რაც შეიძლება ხელმისაწვდომ ფასებში გადასცენ მოსახლეობას სასოფლო-სამეურნეო დანიშნულების მიწები საკუთრებაში. თემასთან დაკავშირებით გუშინ გვქონდა შეხვედრა "ჯეოპლანტის" წარმომადგენლებთან, ხვალ "ვანრიკის" ხელმძღვანელობას შევხვდებით. საბოლოო გადაწყვეტილება საზოგადოებისთვის უახლოეს მომავალში გახდება ცნობილი", _ ამბობს მერაბ ჭანუყვაძე.
აქციაზე იმყოფებოდა გურიის გუბერნატორის მოვალეობის შემსრულებელი, ქეთი მოისწრაფეშვილი. ის დაბა ლაითურის მოსახლეობას რამდენიმე კვირის წინ შევხვდა.
"იქვე შევთანხმდით, და მე მათ დავპირდი, რომ "ჯეოპლანტის" წარმომადგენლებთან უშვამდგომლებდი, რომ ეტაპობრივად და ნაწილ-ნაწილ შეძლებოდათ მიწის გამოსასყიდის გადახდა. ეს პირობა დღესაც ძალაშია, მიდის მოლაპარაკებები აღნიშნულ კომპანიასთან, მაქსიმალურად ვეცდებით, რომ მოსახლეობის ინტერესები დავიცვათ, რა თქმა უნდა კერძო სექტორის ინტერესების გათვალისწინებით. შეთანხმება "ჯეოპლანტთან" თითქმის მიღწეულია.
მოსახლეობა მათთვის სასურველ მიწის ფართობს, ეტაპობრივად გადახდილი თანხით შეიძენს", – გვითხრა ქეთი მოისწრაფეშვილმა.
