საფეხბურთო კლუბ ლანჩხუთის "გურიაში", შიდა პრობლემებისა და განხეთქილების ნიშნების არსებობის შესახებ ადრეaც ვწერდით და ამის თვალნათელი გაგრძელება წითელ პარასკევსაც ვიხილეთ. საუბარია კლუბის ბავშვთა და ჭაბუკთა ლიგის გუნდების მწვრთნელების დემარშზე, რომლებიც ამ ლიგების კალენდარულ შეხვედრებზე გუნდების გაყვანას არ ფიქრობდნენ.
ფედერაციის ეგიდით გასამართ ამ გათამაშებებზე ართამაში, ბუნებრივია გარკვეულ ფინანსურ სანქციებს გულისხმობს და ესეც რომ არა ასეთი დემარში თავად კლუბის ავტორიტეტის შელახვა გამოდის და კლუბის მესვეურებმა ყველაფერი იღონეს აბუნტებულ მწვრთნელებს გადაწყვეტილება შეეცვალათ. მაშინ როდესაც სტუმარი გუნდის – ბოლნისის "სიონის" ბავშვები სათამაშოდ მზად იყვნენ, მასპინძელი კლუბის დირექტორატსა და მწვრთნელებს შორის ცხარე კამათი მიმდინარეობდა.
აღმოჩნდა, რომ აღნიშნულ მწვრთნელებს გასული წლის აგვისტოდან მხოლოდ ერთი თვის ხელფასი ჩაურიცხეს, ისიც სააღდგომოდ, მაშინ როცა დაპირება მინიმუმ სამი თვის ანაზღაურებაზე იყო.
"ვერ გავიგე რა ხდება, 6 თვის ხელფასს ვითხოვთ, დიდ გუნდში ასე თუ ისე ეს პრობლემა ნაკლებია, ჩვენ კი არავინ არაფრად არ გვთვლის. ახალნაზიარები ვარ და ამ წითელ პარასკევს ჩხუბი მიწევს იმისთვის, რომ რაც მეკუთვნის მომცენ. კარგი, სულ დავალიანების დაფარვასაც არ ვითხოვთ, მაგრამ მათხოვარივით ერთი თვის ფულის წამოგდება აგდებაა კაცის აბა რაა. ზოგს ყველა თვის ხელფასი გაუსტუმრეს, ჩვენ კი რატომღაც ასე დაგვჩაგრეს. რა ჩვენი საქმე საქმე არაა"?-ცხარობდა ჭაბუკთა ლიგის გუნდის მთავარი მწვრთნელი ავთო ნარიაშვილი.
პროტესტს ასევე იზიარებდნენ ბავშვთა ლიგის მწვრთნელები – დავით იმნაძე და სოსო ქურიძე, რომლებმაც 2 საათზე დანიშნულ მატჩზე გუნდის გაყვანა კატეგორიულად იუარეს- "გუნდს არ ვათამაშებთ, რა ვქნათ იძულებულები ვართ ასე მოვიქცეთ, რადგან არავინ არ ფიქრობს ჩვენზე. აგვისტოს შემდეგ ახლა მოგვცეს ერთი თვის ხელფასი. ჩვენც ხალხი ვართ, ოჯახები გვაქვს და ვალებში ვიხრჩობით, მაშინ როცა გამგებელი გაზეთში წერს ყველა დავალიანება ამ კვირაში დაიფარებაო, ესაა სიმართლე? ერთი თვის ხელფასის დაფარვა რა საქციელია, როცა უკვე 700 ათას ლარამდეა უკვე კლუბში დახარჯული. სად წავიდა ეს თანხა?"
ამასობაში კლუბის სპორტულმა და ფინანსურმა მენეჯერებმა – ედიშერ ჟორდანიამ და გოჩა იმნაიშვილმა მწვრთნელებს გადაწყვეტილების შეცვლა სთხოვეს, მაგრამ კარგა ხანი კომპრომისი ვერ შედგა. საქმეში აღმასრულებელი დირექტორი, ოთარ ჩხაიძეც ჩაერთო, რომელიც თავიდან კატეგორიული იყო.
"არ გავლენ და ნუ გავლენ, ჯარიმას გადავიხდით და კლუბშიც ბევრ რამეს შევცვლით. სადაც მოკლეა იქ გაწყდეს ბოლოს და ბოლოს. მე სულაც არ მეხება ფინანსები, მიმართონ კლუბის პრეზიდენტს. არაა ეს ფული და რა ვქნათ, ბანკმა 32 ათასი ლარი ისე ჩამოგვაჭრა, არც უკითხია. ვალები შარშანდელი გადმოგვყვა და ამან წაიღო თანხები.
დაგვხვდნენ ადამიანები აქ, ვისაც 2-3 წლიანი კონტრაქტები აქვთ გაფორმებული და რა ვქნათ, ვერ ვერ ვაუქმებთ და ფულიც იხარჯება ასე. არ ესმის ხალხს, რომ ძნელია ლანჩხუთისთვის გუნდის შენახვა, როცა თავად ბილეთში ლარის გადახდა ენანებათ" -განაცხადა ჩხაიძემ.
ჩვენს შეკითხვაზე, თუ ვინ არის გუნდში 2 ან 3 წლიანი კონტრაქტით, მან დუმილი ამჯობინა და არც ის დააკონკრეტა, თუ როდის გაიცემა ამ მწვრთნელების დარჩენილი დავალიანება.
"მე კონკრეტულ თარიღს ვერ დავასახელებ. რომ ვერ გაიცეს დროულად პასუხს მომთხოვენ. ისე კი აღნიშნული დავალიანება აუცილებლად დაიფარება" – დასძინა აღმასრულებელმა დირექტორმა.
მოკლედ ერთსაათიანი კამათი დასრულდა იმით, რომ ბავშვთა ლიგის გუნდი მწვრთნელებმა სათამაშოდ მაინც გაიყვანეს. ამავდროულად კლუბის დირექტორატისა და მწვრთნელების საუბარი უკვე კლუბის ოფისში გაგრძელდა და ჭაბუკთა ლიგის კიდევ ერთი შეხვედრის ბედიც იქ გაირკვა- მატჩი მაინც შედგა.
ასე თუ ისე სკანდალი ჩაცხრა, მაგრამ სანამდის? გასაცემი თანხები კი გროვდება. აღმოჩნდა, რომ დუბლშემადგენლობის გუნდშიც ანალოგიური სიტუაციაა, არადა რას ერჩი ამ გუნდს, რომელიც დუბლების გათამაშებაში ჩემპიონობის რეალური კანდიდატია. დიდი გუნდის ფეხბურთელების დავალიანება გასტუმრებულია თითქმის, მაგრამ რა დააშავეს მწვრთნელებმა და ტექნიკურმა პერსონალმა, რომლებსაც 3 თვის ხელფასი და მოგებული თამაშების ყველა პრემია აუღებელი აქვთ? ამ კითხვაზე პასუხის გამცემი კლუბში არავინ ჩანს.
აი, რაც შეეხება თანხების ხარჯვის თემას, კლუბის დირექტორატი დაგვპირდა, რომ სამშაბათს გამოაქვეყნებენ სრულ ინფორმაციას თუ რა თანხა სად დაიხარჯა და ამით გარკვეულ სპეკულირებას ამ თემაზე, ბოლოს მოუღებენ.
