(გურია ნიუსი, ლანჩხუთი) _ პარასკევს, ლანჩხუთის მუნიციპალიტეტის საკრებულომ, 2012 წლის ბიუჯეტი დაამტკიცა. დაახლოებით 2 საათის მანძილზე, ლანჩხუთის მთავარ საკანონმდებლო ორგანოში მომავალი წლის ბიუჯეტის პრიორიტეტებზე და მასში ასახულ სხვადასხვა სოციალურ თუ კულტურულ ღონისძიებებზე მსჯელობდნენ. საკრებულოს სხდომამ, რომელსაც 23 დეპუტატი ესწრებოდა, საკმაოდ მშვიდ გარემოში ჩაიარა და წლის მთავარი საფინანსო დოკუმენტის მიღებას დეპუტატთა უმრავლესობამ მხარი დაუჭირა. მხოლოდ ერთი დეპუტატი, ოპოზიციონერი მაკა კვირკველია იყო გამონაკლისი _ მან ბიუჯეტთან დაკავშირებული საკითხების განხილვის შემდეგ კენჭისყრაში მონაწილეობაზე უარი განაცხადა.
საკრებულომ წლის მთავარი საფინანსო დოკუმენტის დამტკიცების გარდა, გუშინწინდელ სხდომაზე 12 საკითხი განიხილა. დღის წესრიგით გათვალისწინებული ბოლო 6 საკითხი, რომელიც სხვადასხვა საკითხებზე ადმინისტრაციული წარმოების დაწყებას შეეხებოდა რეკორდულად მცირე დროში _ 3,5 წუთში განიხილეს.
_ ზამთრის პირობაზე, გარეთ საკმაოდ კარგი ამინდია. ვფიქრობთ, ნაყოფიერი დღე გვექნება. დღეს ბიუჯეტის დამტკიცება მოგვიწევს. წლის მთავარ საფინანსო დოკუმენტზე მუშაობა აპრილში დავიწყეთ. აგვისტოში ფინანსთა სამინისტროსთან შეთანხმდა პარამეტრები. საკრებულოს ხუთივე კომისიამ განიხილა წარმოდგენილი პროექტი და მათ მიერ შესაბამისი დასკვნებიც იქნა წარმოდგენილი. ბიუჯეტში არ არის მოცემული ინფრასტრუქტურის და სოფლის პროგრამებისთვის გამოყოფილი თანხები. ამ თანხების რაოდენობა იანვარში გახდება ცნობილი, როდესაც მთავრობა მიიღებს შესაბამის განკარგულებას და ბიუჯეტში აისახება, მაგრამ ამისთვის მოგვიწევს ცვლილებების შეტანა. ჩემი აზრით, 2012 წლის ბიუჯეტი უფრო პროგრამული იქნება, ვიდრე წელს გვქონდა. ალბათ, 2013 წლიდან გვექნება ვალდებულება, რომ ბიუჯეტი სრულად პროგრამული იყოს, _ აღნიშნა საკრებულოს თავმჯდომარე რევაზ ჩიტიძემ.
როგორს სხდომაზე ითქვა, მომავალი წლის ბიუჯეტის ხარჯების ნაწილი გარკვეულ მუხლებში შემცირებული იქნება. სატელეფონო, ინტერნეტ მომსახურების, საწვავის ხარჯები მცირდება. საბანკო მომსახურების ხარჯი კი აღარ იქნება.
2012 წლის ბიუჯეტის შემოსავლები 5 241 600 ლარით განისაზღვრა, ხოლო ხარჯები 5 167 570 ლარით. აქედან ხელფასებზე 1 169 530 ლარი დაიხარჯება, რაც გასულ წელთან (1 052 300 ლარი) შედარებით გაზრდილია!
ბიუჯეტიდან 189 890 ლარი ლარი ტრანსპორტის შენახვისა და ექსპლუატაციის ხარჯებს მოხმარდება. როგორც საკრებულოს პირველმა პირმა თქვა, გასულ წელთან შედარებით თანხა შემცირებულია. ოფისის ხარჯებისთვის მომავალ წელს 315 840 ლარი დაიხარჯება, გასულ წელს კი ამისთვის 331 820 ლარი აითვისეს.
დასუფთავების კუთხით 300 560 ლარია გამოყოფილი. ამ თანხაში მაწანწალა ძაღლების პრობლემის მოგვარებაც შედის. გარე-განათების მოვლა-პატრონობაზე 61 ათასი ლარი დაიხარჯება; 692 950 ლარია სკოლამდელი საგანმანათებლო-სააღმზრდელო ცენტრის ბიუჯეტი; სპორტის ცენტრს 225 ათასი ლარი გამოეყოფა; უფასო სასადილოსთვის 60 ათას ლარს გაითვალისწინებენ; საფეხბურთო კლუბ “გურიას” 300 ათასი ლარით დააფინანსებენ.
როგორც სხდომაზე ითქვა, 2012 წელს, ცენტრალური ბიუჯეტიდან 647 ათასი ლარი გამოიყოფა, რომელიც მუნიციპალიტეტში არსებული სკოლების ნაწილის რემონტზე დაიხარჯება.
საკრებულომ 2012 წლის ბიუჯეტი მუხლობრივი განხილვის შემდეგ დაამტკიცა. ამის შემდეგ ტრიბუნასთან საფინანსო სამსახურის უფროსი როლანდ ლაშხია მივიდა, რომელმაც 2012 წლის ბიუჯეტის პრიორიტეტებზე ისაუბრა. მანვე დეპუტატებს უთხრა, რომ როდესაც ბიუჯეტი კეთდება, მას თან ახლავს სამწლიანი გეგმა, რომელიც პრიორიტეტულად განიხილება: _ ამჯერად 2012-2015 წლების გეგმა გვაქვს, რომლის გასახორციელებლად დაახლოებით 18 მილიონი ლარი იქნება საჭირო, _ თქვა ლანჩხუთის მთავარმა ფინანსისტმა.
ამის შემდეგ შესყიდვების გეგმა და სოციალური პროგრამები დაამტკიცეს. განსაკუთრებული ყურადღება ამ ბოლო საკითხმა მიიქცია. როგორც ითქვა, 2012 წელს სოციალური კუთხით მხოლოდ 390 ათასი ლარი დაიხარჯება;
დაქვეითებული მხედველობის მქონე პირთა დახმარება (მუნიციპალიტეტის მასშტაბით 28 ადამიანი ყოფილა) 4 200 ლარი იქნება; სტიქიური უბედურების შედეგების აღმოსაფხვრელად 50 ათასი ლარი გამოიყოფა; მრავალშვილიანი ოჯახები დახმარებას 30 ათასი ლარი მოხმარდება; მეორე სამამულო ომის ვეტერანებისთვის 8 000 ლარია გათვალისწინებული (როგორც სხდომაზე ითქვა, ლანჩხუთის მუნიციპალიტეტში 70 ვეტერანია) _ ამ თანხაში შედის, როგორც 9 მაისისადმი მიძღვნილი ღონისძიების დროს ერთჯერადი დახმარების გაცემა, ასევე გარდაცვლილი ვეტერანის დაკრძალვის სარიტუალო ხარჯი _ 250 ლარის ოდენობით; ბავშვთა ცენტრ “იავნანას” გადაეცემა 10 ათასი ლარი, პოლიციელთა ერთჯერადი დახმარებისთვის კი 2 100 ლარს გამოყოფენ. ეს ეხება იმ პოლიციელთა ოჯახებს, რომლებიც სამსახურეობრივი მოვალეობის შესრულებისას დაიღუპნენ. ასევე ცვლილებები იქნება ტერიტორიული მთლიანობისათვის დაღუპულთა ოჯახების დახმარების პროგრამაში (ასეთი ჩვენს მუნიციპალიტეტში 34 ოჯახია) _ მათთვის 27 400 ლარს გაითვალისწინებენ. აქედან, 50-50 ლარს თითოეული ოჯახი ყოველთვიურად მიიღებს, ხოლო გიორგობის ბრწყინვალე დღესასწაულთან დაკავშირებით ერთჯერადი დახმარების სახით 200-200 ლარი გადაეცემათ. მოგეხსენებათ, ჩვენს ქვეყანაში გიორგობა წელიწადში ორჯერ _ 6 მაისს და 23 ნოემბერს აღინიშნება, თუმცა, სხდომაზე არ დაუკონკრეტებიათ, რომელ გიორგობას მოხდება თანხის გადაცემა; იძულებით გადაადგილებულ პირთა დახმარებისთვის ბიუჯეტში 14 ათასი ლარია გათვალისწინებული; 100 წლის და ზემოთ ასაკის ადამიანებისთვის 2 000 ლარს გაითვალისწინებენ; მშობიარობის თანადაფინასებისთვის 30 ათასი ლარია გამოყოფილი; 15 ათას ლარს სოციალურად დაუცველი მოსახლეობის სარიტუალო ხარჯებისთვის გაითვალისწინებენ; 3-18 წლამდე ბავშვების ოპერაციებისთვის _ 20 ათასი ლარია გამოყოფილი, ხოლო სოციალურად შეჭირვებული მოსახლეობის შეშით უზრუნველყოფისთვის _ 23 ათასი ლარი.
საკრებულოს ოპოზიციონერმა დეპუტატმა, მაკა კვირკველიამ სოციალურ პროგრამებთან დაკავშირებით საკმაოდ მწვავედ ისაუბრა: _ კარგია, როცა სოციალური პროექტებისთვის თანხა იყოფა, მაგრამ აქ მთელი რიგი შენიშვნები მაქვს. ჩვენ გვქონდა წამლების დახმარების პროგრამა _ 100 ლარი ეძლეოდათ მოქალაქეებს. ბევრმა ლანჩხუთელმა ისარგებლა ამ დახმარებით. გამოდის, რომ მომავალ წელს ეს პროგრამა საერთოდ არ გვექნება, რაც ძალიან ცუდია. ასევე აღარ გვაქვს ახალშობილთა ერთჯერადი დახმარების პროგრამა, რომელიც სტიმულის მიმცემიც გახლდათ. ასევე უნდა ვისაუბრო შეშის თემაზე. თანხა, რომელიც ამისთვის არის გამოყოფილი ძალიან მცირეა. წელს მოსახლეობის დიდი ნაწილი შეშის გარეშე დარჩა. მათ განუცხადეს, რომ შეშას მეორე ეტაპზე მოგცემთო. როცა ეს იცოდით, უფრო მეტი თანხა უნდა გაგეთვალისწინებინათ.
როგორც სხდომაზე ითქვა, გასულ წელს შეშით დახმარების კუთხით 15 ათასი ლარი ყოფილა გამოყოფილი, ხოლო მომავალი წელს ეს თანხა 8 ათასით იზრდება: _ საერთოდ, იმდენი განცხადება შემოვიდა, რომ ყველა მათგანს რომ დავეხმაროთ, ალბათ, სოციალური პროექტებისთვის ჯამში გამოყოფილი თანხა არ გვეყოფა, _ განმარტეს უმრავლესობის წევრებმა.
საკრებულოს თავმჯდომარის მოადგილე ზვიად აფხაზავამ ლანჩხუთის მუნიციპალიტეტის სიმბოლიკის (გერბის და დროშის) შესარჩევი კონკურსის შესახებ ისაუბრა (აფხაზავა ამ საკითხთან დაკავშირებით შექმნილი კომისიის თავმჯდომარეა). მისი თქმით, კომისიის მიერ ორჯერ იქნა კონკურსი გამოცხადებული, მაგრამ მისაღები ვარიანტის შერჩევა ვერ მოხერხდა. 5 იანვრიდან გამოცხადდება მესამდე კონკურსი. ნამუშევრების მიღება შესაძლებელი იქნება პირველ თებერვლამდე, ხოლო გამარჯვებული 15 თებერვალს გამოვლინდება. იმედია, რომ მესამე ცდაზე ლანჩხუთის სიმბოლიკა შერჩეული გვექნება.
ამის შემდეგ, რამდენიმე საკითხზე ადმინისტრაციული წარმოება დაიწყო და მათი განხილვის შემდეგ, სხდომა მოწვეული სტუმრებისთვის დასრულებულად გამოცხადდა.
