"დივერსანტის პასუხი სახელმწიფოს", _ ამ სათაურით ავრცელებს ორგანიზაცია „მწვანე მუშტი“ მიმართვას სოციალურ ქსელებში და საზოგადოებას კანცელარიასთან 14:30 საათზე აქციის გამართვისკენ მოუწოდებს.
"არა თუ დრონი, არა თუ მეფენი, არამედ შიში მეფობს"
ჩვენ დივერსანტები კი გეტყვით: ამ ქვეყანაში წინააღმდეგობა მეფობს და ეს წინააღმდეგობა მალე გამწვანდება, მოედება ყველაფერს და წერტილს დაუსვამს სოციალურ უსამართლობას. ამ წინააღმდეგობას სახელმწიფოს სახე, პრემიერ-მინისტრი, ვინმე ი.ღ. უწოდებს დივერსიას. ის სთხოვს საგამოძიებო და ძალოვან სტრუქტურებს, რეაგირება მოახდინონ ამ დივერსიაზე, რაც ძალაუფლების ბოროტად გამოყენებაა და ძალადობა. დიახ, ძალადობაა თავისუფალ აზრსა და წინააღმდეგობაზე, რომელიც მის მიერვე გამეფებულ უსამართლობის წიაღში იშვა ადამიანის ფუნდამენტური უფლებებისთვის. ამას ადრეც აკეთებდნენ, მაგრამ დღეს ამას ი.ღ აკეთებს. მან ამ ქმედებით სახელმწიფო მანქანას ძალადობის სული ჩაჰბერა ისევე, როგორც მისმა წინამორბედებმა.
წინააღმდეგობას, რომელიც არსებობს ჩვენში დივერსიას უწოდებს იმ ქვეყნის მმართველი რომელშიც: გამეფებულია ნეოლიბერალური აგრესიული პრივატიზაციის პოლიტიკა; ბიზნეს ელიტას მონოპოლიზირებული აქვს ყველა სფერო; ბიზნესის დაბეგრვა მინიმუმამდეა დაყვანილი; ინვესტორ-სახელმწიფოს კორუფციული გარიგებების ფონზე მოსახლეობის 15% სიღარიბის ზღვარს ქვემოთ იმყოფება; 250 000 ბავშვი მშიერია; თავად ი.ღ. ჩვენ დივერსანტებს გვადანაშაულებს "3000" ადამიანისთვის სამსახურის დაკარგვაში, არ არსებობს შრომის ნორმალური კოდექსი, არ არსებობს შრომითი ინსპექცია, საწარმოო ტრავმით კი ბოლო 10 თვეში დაიღუპა 46, ხოლო დასახიჩრდა 61ადამიანი; საწარმოთა აბსოლუტური უმრავლესობა სასტიკად აბინძურებს გარემოს; ყოვლად გაუაზრებლად დაგეგმილი 150-მდე ჰესის მშენებლობა გარემოს დაცვითი მახინჯი კოდექსის საფუძველზე ეკო-სოციალური და ეკონომიკური კატასტოროფის წინაშე აყენებს ქვეყანას; ჯანდაცვის სისტემა დღემდე წინა ხელისუფლების დროს დამყარებული მონოპოლიური წესრიგის მსხვერპლია; მსხვილი კორპორაციები დღემდე არ ასრულებენ გაფიცვის შედეგად დადებულ შეთანხმებებს, არ არსებობს სახელფასო მინიმუმი; პროფკავშირები ზეწოლის ქვეშაა; სოფლის მეურნეობა კატასტროფის ზღვარზეა; ქვეყანა ეკონომიკურ კრიზისშია; კრიმინალი ნორმად იქცა; არც ერთი უმცირესობა და სუსტი ჯგუფი დაცული არ არის კანონის ძალით; განათლება და მეცნიერება ფაქტობრივად დაფინანსების გარეშეა; სტუდენტების უმრავლესობას დავალიანების გამო შეჩერებული აქვს სტატუსი; უსახლკაროების რაოდენობა კატასტროფულად იმატებს; ურბანული უსივრცობა გუდავს ქალაქებს; მილიონები იხარჯება პრემიებსა და ღრეობებში; ელემენტარული დემოკრატიული პროცესები, როგორც წინამორბედი ხელისუფლებისას, დღესაც ფეხქვეშ არის გათელილი; კულტურული მემკვიდრეობა სავალალო მდგომარეობაშია და დიახ, საყდრისი ამ უსამართლობის შესანიშნავი მაგალითია.
დიახ, ამ ქვეყნის პრემიერ-მინისტრი ჩვენს მოძრაობას დივერსიად აფასებს – აპარტიულ სტუდენტურ მოძრაობას, რომელიც მოკლებულია ყოველგვარ დაფინანსებას; მოძრაობას, რომელიც ისევე აკრიტიკებს წინა ხელისუფლებას, როგორც დღევანდელს; მოძრაობას, რომელიც იბრძვის მდგრადი ეკონომიკური განვითარების, სოციალური, გარემოს დაცვითი და კულტურული სამართლიანობისთვის.
დიახ, ჩვენ დივერსანტები ვართ – წინაღობა იმ ადამიანთათვის, ვინც სოციალურ დისკრიმინაციასა და ჩაგვრას აკანონებს ქვეყანაში, წინააღმდეგობა ვართ მათთვის, ვინც ადამიანებს უზღუდავს სიცოცხლის უფლებას, ჯანმრთელ გარემოში სიცოცხლის უფლებას, კულტურული განვითარების უფლებას, და საერთოდ კონსტიტუციას იყენებს საკუთარი ხალხის წინააღმდეგ; მათთვის, ვინც ხელმძღვანელობს არა იმ პრინციპებით, რომლებისთვისაც კანონები შეიქმნა, არამედ ხელმძღვანელობს კანონებით ამ პრინციპების წინააღმდეგ. ეს ადამიანი ხართ თქვენ ბატონო ი.ღ. (ბ.ი) ძალაუფლება და რესურსები ეკუთვნის ხალხს და არა ბიზნეს და ჩინოვნიკ ელიტებს!
და როდესაც კანონით არ არის ადამიანის უფლებები დაცული, მაშინ სახელმწიფოც არ არის დაცული ლეგიტიმური წინააღმდეგობისგან!
ახლა განსაზღვროს საზოგადოებამ – ვინ არის ჩვენში დივერსანტი?!“, _ ნათქვამია „მწვანე მუშტის“ მიერ გავრცელებულ მიმართვაში.
