16 აპრილს, დღის ორ საათზე ლანჩხუთში, სახალხო დამცველი უჩა ნანუაშვილი და მისი აპარატის თანამშრომლები იმყოფებოდნენ. შეხვედრა საზოგადოების ნაწილთან ცენტრალური ბიბლიოთეკის დარბაზში შედგა, რომლის შემდეგაც ომბუდსმენი გამგეობაში აპირებდა სტუმრობას, სადაც თანამშრომლებსა და უშუალოდ მუნიციპალიტეტის გამგებელ ზაზა ურუშაძეს უნდა შეხვედროდა, თუმცა საბოლოოდ სახალხო დამცველს გამგეობაში მისვლა აღარ დასჭირვებია, რადგან მუნიციპალიტეტის პირველი პირი ადგილზე არ იმყოფებოდა, ხოლო საკრებულოსა და გამგეობის სხვა პირველები შეხვედრაზე ბიბლიოთეკაში იყვნენ შეხვედრაზე.
სახალხო დამცველს ლანჩხუთში მოსახლეობის წინაშე არსებული პრობლემების შესახებ უნდა მოესმინა ინფორმაცია, თუ რა მდგომარეობაა აქ ადამიანის უფლებათა დაცვის კუთხით და ასე შემდეგ, თუმცა შეხვედრაზე მოსახლეობის დიდი ნაწილი არ იყო წარმოდგენილი, რაც ჟურნალისტების მხრიდან თავიდანვე აღინიშნა. შესაბამისად, რეალური მდგომარეობა ვერ იქნებოდა განხილული.
ჟურნალისტების მხრიდან ყურადღების ამაზე გამახვილებამ ა (ა)იპ "ტექსერვისის" დირექტორის მოადგილე ნუგზარ ცინცაძის, იგივე "ცანცუა" და კულტურის დაწესებულებათა გაერთიანების დირექტორის მოადგილე, გია ფირცხალაიშვილის გაღიზიანება გამოიწვია. ცინცაძემ ომბუდსმენს ჟურნალისტებისგან თავის დაცვაც სთხოვა. აღსანიშნავია ისიც, რომ შეხვედრის პერიოდში ჟურნალისტებს სრულყოფილად შეკითხვების დასმის უფლებაც არ მიეცათ.
საუბარი ლანჩხუთის პოლიციაში, ძველი კადრების დანიშვნასაც შეეხო, რომლებსაც, როგორც ცინცაძემ აღნიშნა, უამრავი დანაშაული აქვთ ჩადენილი, რაზეც ომბუდსმენმა დეტალური ინფორამცია მოითხოვა და "ტექსერვისის" დირექტორი ცნობების მიწოდებას დაჰპირდა.
გამგებლის პირველმა მოადგილემ ვახტანგ ზენაიშვილმა თავის საუბარში აქცენტი იმაზე გააკეთა, რომ ადამიანებმა ნაკლებად იციან საკუთარი უფლებების შესახებ და ისინი ფაქტობრივად, ნებაყოფლობითი მონები არიანო.
შეხვედრაზე მყოფმა ერთ-ერთმა ადგილობრივმა, ლტოლვილების პრობლემებზე გაამახვილა ყურადღება. მისი თქმით, პერიფერიებში ლტოლვილები ვერ სარგებლობენ იმ შეღავათებითა და დახმარებებით, რაც ხელმისაწვდომია ქალაქებში ჩასახლებული დევნილთათვის.
საუბარი შეეხო საზოგადოებრივი ცნობიერების ამაღლების პრობლემასაც.
ასევე დაისვა საკითხი თუ რამდენად სამართლიანად განახორციელა გამგებელმა კულტურის სფეროში სტრუქტურული რეორგანიზაცია, როცა შექმნა ერთი დიდი "მონსტრი სამსახური", მაღალანაზღაურებადი თანამშრომლებით და ზოგიერთი ძველი თანამშრომელი სახლში გაუშვა, მითუმეტეს, როცა არსებობდა შესაბამისი შტატები.
"ნაციონალური მოძრაობის" ადგილობრივი ორგანიზაციის თავმჯდომარე კახა ასკურავამ ნეპოტიზმსა და საჯარო მოხელეთა კონკურსის მანკიერ მხარეებზე გააკეთა აქცენტი.
"სამსახურებში სპეციალურად ამა თუ იმ ადამიანზე მორგებულ თანამდებობებს ქმნიან და ხელფასსაც ამის მიხედვით უნიშნავენ. დიდ სიძნელეებთანაა დაკავშირებული საჯარო ინფორმაციის მოპოვება და აუცილებლად გადასახედია კანონი "პირად მონაცემთა შესახებ", _ აღნიშნა ასკურავამ.
ომბუდსმენი შეხვედრის მიმდინარეობისას დეკრეტულ შვებულებაში მყოფი იმ პირის ბედითაც დაინტერესდა, რომელიც სამსახურიდან უკანონოდ გაათავისუფლეს, თუმცა, მოგვიანებით კვლავ აღადგინეს.
შეხვედრის მიწურულს უჩა ნანუაშვილი ლანჩხუთში საავადმყოფოსა და სასწრაფო დახმარების ბედით დაინტერესდა. გამგეობის სოციალური სამსახურის უფროსმა მარინა კეიდიამ და გამგებლის მოადგილემ, დეტალურად აუხსნეს ამ სისტემაში არსებული მდგომარეობა, რომ მუნიციპალური საავადმყოფო ფაქტობრივად დანგრევის პირასაა მისული, მოძველებულია აპარატურა, არ არსებობს ელემენტარული პირობები, არადა საკმაოდ კვალიფიკაციური კადრებითაა დაკომპლექტებული.
