დღეს, ოზურგეთში, სოხუმის დაცემის დღესთან დაკავშირებით, ოზურგეთის მუნიციპალიტეტის მერის მოვალეობის შემსრულებელმა ალექსანდრე სურგულაძემ, მერიის კულტურის სამსახურის წარმომადგენლებმა და სხვა თანამშრომლებმა, ასევე ოზურგეთელმა ვეტერანებმა ყვავილების გვირეგვინებით შეამკეს ტერიტორიული მთლიანობისთვის დაცემულ გმირთა მემორიალი. დაანთეს სანთლები მათი სულების უკვდავსაყოფად.
ოზურგეთის საბრძოლო დიდების პარკში, ასევე ეროვნული გმირის ზაზა დამენიას საფლავზე მიიტანეს ყვავილები და პატივი მიაგეს გმირის ხსოვნას.
_მე ახლა 83 წლის ვარ. ყველა ომში მაქვს მონაწილეობა მიღებული, რაც საქართველოს ტერიტორიულ მთლიანობას ეხებოდა. აგვისტოს ომში კი, შვილთან, ემზარ ურუშაძესთან ერთად ვმონაწილეობდი. მეტად მძიმე დღეა, გმირების ხსოვნის წინაშე უდიდესი სიამაყით ვიხრი ქედს. ჩვენ- ქართველებს, ოსებს და აფხაზებს დიდი შეცდომა მოგვივიდა. ამ ომებს გამარჯვებული არ ჰყავს. მე, ამ ასაკის და ამდენი ომების მონაწილე, ვამბობ, რომ ერთმანეთისკენ სავალი გზა ჩვენვე უნდა ვეძებოთ. უნდა მივუტევოთ ერთმანეთს. კარგად გავაცნობიეროთ, ვინ არის აგრესორი და დაღუპულთა საფლავებზე, იქეთაც და აქეთაც, ერთად მივიდეთ და მუხლი მოვიყართ პატიებისთვის, რომ საუკუნოდ აღდგეს და გაგრძელდეს ჩვენი ერთობა. რუსეთი აგრესორია და დეოკუპაცია აფხაზებთან შერიგებით უნდა მოხდეს _ თქვა ომის ვეტერანმა ზურაბ ურუშაძემ.
ომის ვეტერნებმა თენგიზ თავბერიძემ, გურამ ასათიანმა, თემურ მგელაძემ და სხვებმა ერთობლივი აზრი გამოთქვეს, რომ ოკუპანტის წინააღმდეგ ბრძოლა მშვიდობიანი გზით უნდა გაგრძელდეს.
_მიზანი არის ერთადერთი: დაკარგული ტერიტორიები, აფხაზეთი და სამაჩაბლო, როგორც ჩვენი ქვეყნის განუყოფელი ნაწილი, მუდამ უნდა ვიბრძოლოთ და საქართველოს იურისდიქციაში მოვაქციოთ, როგორც იურიდიულად, ისე ფაქტიურად. თაობებმაც რომ იბრძოლონ, სანამდეც უნდა გაგრძელდეს, საბოლოოდ ეს მაინც ასე უნდა მოხდეს, _ განაცხადეს მათ.
ოზურგეთის მუნიციპალიტეტის მერის მოვალეობის შემსრულებელმა ალექსანდრე სურგულაძემ თქვა, რომ ტრაგედია, რომელიც 1993 წლის 27 სექტემბერს მოხდა, რუსეთის აგრესიით გამოწვეული ოკუპაციაა და ჩვენ მუდამ უნდა გვახსოვდეს საქართველოს ტერიტორიული მთლიანობისთვის დაღუპული გმირები და რომ ქვეყანა გასაერთიანებელია და ოკუპირებული ნაწილი დასაბრუნებელი.
_ძალიან მძიმე დღეა. სოხუმის დაცემით მოხდა აფხაზეთის ოკუპაცია. ჩვენი ქვეყნის მოქალაქეები, ძმები-ქართველები და აფხაზები შეეწირნენ ამ ომს. მიუხედავად უმძიმესი შედეგისა, როგორც ტერიტორიის, ისე ადამიანთა დაკარგვის. ქართველებმა და აფხაზებმა ერთმანეთისკენ სავალი გზები უნდა ვეძებოთ და ასე მოხდეს საქართველოს ტერიტორიული და ყველანარი გამთლიანება. ქრისტესმიერი ქვეყანაა ჩვენი სამშობლო, ბუნებით გულმოწყალე და შემრიგებელი ერი ვართ და ამ გზით უნდა ვიაროთ, რომ მოხდეს დეოკუპაცია და ქართველთა, აფხაზთა და ოსთა დიდი შერიგება, _ თქვა მან.
[sexy_author_bio]
