ტელეკომპანია “გურიას” სასამართლო განაჩენს, რომელიც 5 დეკემბერს იქნა გამოტანილი, უზენაესი სასამართლო განცხადებით მხოლოდ 15 დეკემბერს ეხმიანება. “გურია ნიუსი” უცვლელად გთავაზობთ განცხადების ტექსტს:
“ბოლო რამდენიმე დღეა, სხვადასხვა საინფორმაციო საშუალებებში ვრცელდება უსაფუძვლო ბრალდებები უზენაესი სასამართლოს მიერ 2011 წლის 5 დეკემბერს მიღებულ გადაწყვეტილებასთან დაკავშირებით, რომელიც
ტელეკომპანია “გურიას” ყოფილი დირექტორის მერაბ სიორიძის წინააღმდეგ შემოტანილ საკასაციო საჩივარს ეხებოდა.
უზენაესი სასამართლო მიზანშეწონილად მიიჩნევს საზოგადოებას საქმესთან დაკავშირებით მიაწოდოს ინფორმაცია მხოლოდ სამართლებრივ არგუმენტებზე დაყრდნობით.
აღნიშნულ საქმეზე, ქუთაისის სააპელაციო სასამართლომ 2006 წლის 24 ივლისს სასამართლოს მთავარ სხდომაზე აპელანტების გამოუცხადებლობის გამო, დაუსწრებელი გადაწყვეტილება მიიღო, რომლის საფუძველზეც მერაბ სიორიძის სააპელაციო საჩივარი არ დაკმაყოფილდა.
სააპელაციო სასამართლოს დაუსწრებელი გადაწყვეტილება მერაბ სიორიძის ადვოკატმა, მისი მიღებიდან 4 წლის გასვლის შემდეგ გაასაჩივრა, იმ საფუძვლით, რომ მერაბ სიორიძემ სააპელაციო საჩივრის შეტანის შემდეგ საცხოვრებელი ადგილი შეიცვალა და სასამართლო უწყება არ ჩაბარებია. ამასთან, იგი 2008 წლამდე საზღვარგარეთ იმყოფებოდა.
ქუთაისის სააპელაციო სასამართლომ აღნიშნული საჩივარი მიიღო განსახილველად და 2010 წლის 11 თებერვლის განჩინებით გააუქმა დაუსწრებელი გადაწყვეტილება.
მხარეებმა დავა უზენაეს სასამართლოში გააგრძელეს. უზენაესმა სასამართლომ გააუქმა სააპელაციო სასამართლოს მიერ საქმეზე მიღებული ახალი გადაწყვეტილება და განჩინება დაუსწრებელი გადაწყვეტილების გაუქმების შესახებ, რის შემდეგაც სააპელაციო სასამართლოს მიერ 2006 წელს კანონიერად მიღებული დაუსწრებელი გადაწყვეტილება ძალაში დარჩა.
უზენაესმა სასამართლომ თავის გადაწყვეტილებაში განმარტა, რომ მერაბ სიორიძეს საცხოვრებელი ადგილის შეცვლის შესახებ სასამართლოსთვის არ უცნობებია, რისი ვალდებულებაც მას საპროცესო კანონმდებლობით ეკისრებოდა. წინააღმდეგ შემთხვევაში, სასამართლო უწყება მხარისთვის ჩაბარებულად ითვლება და სასამართლო ვალდებულია, დაუსწრებელი გადაწყვეტილება გამოიტანოს.
აღნიშნულის გათვალისწინებით, საქართველოს უზენაესი სასამართლოს 2011 წლის 5 დეკემბრის გადაწყვეტილება სრულ შესაბამისობაშია საპროცესო კანონმდებლობის მოთხოვნებსა და არსებულ პრაქტიკასთან”.
შეგახსენებთ ძირეულ პრობლემებს რაც სიორიძეების ადვოკატს საქმის მოსამართლე ვასილ როინიშვილის მიმართ ჰქონდა: საქმე განიხილა მხარეთა დასწრების გარეშე, რამაც მინიმუმამდე შეამცირა დავის მოლაპარაკებით დასრულების შანსი; უზენაესმა სასამართლომ წარმოებაში მიიღო საქმე 2010 წლის 17 მაისს _ სამოქალაქო საპროცესო კოდექსის 391-ე მუხლის მე-6 პუნქტის თანახმად საქმის განხილვა უნდა მომხდარიყო უახლოესი 6 თვის განმავლობაში. ზემოაღნიშნულ შემთხვევაში კი, გასულია 18 თვე _ 2010 წლის 17 მაისიდან 2011 წლის 28 ნოემბრამდე.
ადვოკატ თედო კობახიძეს არა ერთხელ განუცხადეს რომ სასამართლომ განაჩენი 28 ნოემბერს გამოიტანა, თუმცა როგორც შემდგომ აღმოჩნდა, განაჩენი მხოლოდ 5 დეკემბერს იქნა გამოტანილი.
როგორც თავად დარწმუნდით, სასამართლო მხოლოდ მშრალი ფაქტობრივი მონაცემებით შემოიფარგლა და არც ერთ მანამდე არსებულ არსებით კითხვას არ გასცა პასუხი. “გურია ნიუსი” კიდევ ერთხელ შეეცადა, ინტერვიუ ჩაეწერა თავად საქმის მწარმოებელ მოსამართლე ვასილ როინიშვილთან, თუმცა, უშედეგოდ _ უზენაესი სასამართლოს პრესსამსახურის მთავარმა კონსულტანტმა ქეთი ტყეშელაშვილმა გვითხრა, რომ “ამ თემაზე ვასილ როინიშვილთან ინტერვიუს ჩაწერა გამორიცხულია. სპიკერ-მოსამართლის პოზიცია კი განცხადების სახით დევს ჩვენს საიტზე. სხვა რაიმე კომენტარის გაკეთება ჩვენგან ვერ მოხერხდება”.
კითხვები, დაარღვია თუ არა თავად მოსამართლემ სამოქალაქო საპროცესო კოდექსი და მოატყუეს თუ არა ადვოკატი საქმის განაჩენის გამოტანის თარიღთან დაკავშირებით, კვლავ უპასუხოდ რჩება.
