იუსტიციის მინისტრ თეა წულუკიანის ნიგოითში ვიზიტის შემდეგ, რომელიც გასულ პარასკევს შედგა და რომლის ფარგლებშიც მან "იუსტიციის საზოგადოებრივ ცენტრი" დაათვალიერა, ამ ადმინისტრაციულ ერთეულში გამგებლის წარმომადგენელ ზაზა წულაძის დაკავებული თანამდებობიდან გათავისუფლება მოჰყვა.
შეგახსენებთ, რომ მსგავსი ტიპის ცენტრები იუსტიციის სამინისტროს კუთვნილებაა და იქ მოსახლეობას შესაძლებლობა აქვს სხვადასხვა სერვისით ისარგებლოს. შენობაში ასევე განთავსებულია სოფლის ადმინისტრაციაც
როგორც "გურია ნიუსს" წყარომ განუცხადა, წულაძის გათავისუფლების მიზეზი "იუსტიციის საზოგადოებრივ ცენტრში" არსებული შიდაგანაწესის დარღვევამ განაპირობა.
საქმე ისაა, რომ აღნიშნულ ცენტრში წულუკიანის ვიზიტის დროს, გამგებლის წარმომადგენელი შენობაში არ იმყოფებოდა. იგი იმ მომენტში სტუმრად ჩამოსულ გეოლოგების ჯგუფთან ერთად სოფლის საყანე ფართობებს ათვალიერებდა. მის კაბინეტში კი გარეშე პირები იმყოფებოდნენ და მინისტრის გაღიზიანებაც, წყაროს თქმით, ამან გამოიწვია.
"გურია ნიუსის" ინფორმაციით, სწორედ ამის შემდეგ მიმართლა მინისტრმა გურიის გუბერნატორის მოვალეობის შემსრულებელ ქეთევან მოისწრაფეშვილს. თუმცა, თავად მოისწრაფიშვილი აღნიშნულს უარყოფს.
"როცა მინისტრი რეგიონს სტუმრობს, აუცილებლად მაქვს მასთან შეხვედრა. პარასკევს ქალბატონი თეას ვიზიტი გურიაში დაუგეგმავი იყო და მე მასთან არანაირი შეხვედრა არ მქონია. შესაბამისად არც ინფორმაციას ვფლობ ზემოაღნიშნულ ინციდენტთან დაკავშირებით".
ჩვენი წყაროს ინფორმაციით, იუსტიციის მინისტრს გარკვეული შენიშვნები უშუალოდ მუნიციპალიტეტის ხელმძღვანელობასთანაც ჰქონდა.
საქმე იმაშია, რომ თავის დროზე იუსტიციის სამინისტრომ კონკურსის შედეგად გამოავლინა ორი თანამშრომელი და შესაბამისი გადამზადების შემდეგ ისინი აღნიშნულ ცენტრში დასაქმდნენ და ითვლებოდნენ როგორც ადგილობრივი საჯარო მოხელეები. ხელშეკრულებაც მუნიციპალიტეტის ხელმძღვანელობასთან ჰქონდათ გაფორმებული.
ამათ გარდა ასევე ხელშეკრულებით იყო დარაჯისა და დამლაგებლის შტატიც. თუმცა, ახალი თვითმმართველობის კოდექსის ამოქმედების შემდეგ, საჯარო მოხელეთა რიცხოვნობის შემცირება მოხდა და გარკვეული კვოტაც დაწესდა ხელშეკრულების გაფორმებაზე. ადგილობრივმა გამგეობამ მაშინ ხელშეკრულების არსებითი ლიმიტი ძირითადად გამგეობასა და საკრებულოში გამოიყენა და აღმოჩნდა, რომ ზემოთ ხსენებული თანამშრომლებიდან მხოლოდ ერთი სპეციალისტის ადგილი დარჩა. შესაბამისად, "იუსტიციის ცენტრი" თვეების მანძილზე დამლაგებლისა და დარაჯის გარეშე ფუნქციონირებდა.
მნიშვნელოვანია ის ფაქტიც, რომ სწორედ იუსტიციის მინისტრის ამ მოულოდნელი ვიზიტის შემდეგ მუნიციპალიტეტის გამგეობამ განუახლა ხელშეკრულება იუსტიციის სერვისების კიდევ ერთ სპეციალისტსა და დარაჯს.
"ხელშეკრულება დარაჯსა და იუსტიციის სერვისების სპეციალისტთან 20 აპრილს გაფორმდა, რაც შეეხება დამლაგებელს, ის დაახლოებით ერთი თვეა რაც მუშაობს", _ გვითხრა ადმინისტრაციის თანამშრომელმა ელიკო იმნაძემ.
თანამდებობიდან წასული ზაზა წულაძე ჩვენთან საუბარში მოკლე პასუხით შემოიფარგლა და აღნიშნა, რომ თანამდებობა საკუთარი განცხადების საფუძველზე დატოვა.
აღნიშნულზე კომენტარის გაკეთება მოუცლელობის გამო არ ისურვა ლანჩხუთის მუნიციპალიტეტის გამგებელმა ზაზა ურუშაძემ.
