როგორც „დემოკრატიული მოძრაობის“ ერთ-ერთი ლიდერი, გიორგი ახვლედიანი აცხადებს, იუსტიციის ყოფილი მინისტრის ზურაბ ადეიშვილის ინტერპოლის ძებნილთა სიიდან ამოღებამ სერიოზული ეჭვები გააჩინა.
„ძალიან საინტერესო მდგომარეობა გვაქვს, სერიოზული ეჭვები არსებობს, ხომ არ გასცა ქართულმა მხარემ ნებართვა და თანხმობა, რომ იუსტიციის ყოფილი მინისტრი ბატონი ზურაბ ადეიშვილი ინტერპოლის ძებნილთა სიიდან ამოეღოთ? ძალიან ბევრი ინტერპოლით ძებნილი ადამიანი აცხადებს, რომ მათაც მისცეს ლტოლვილის სტატუსი, ისეთმა ქვეყნებამა როგორიცა აშშ, თუმცა რადგან საქართველოს ნებართვაა საჭირო ინტერპოლის წითელი ცირკულარით ძებნიდან ამოსაღებად, ისინი ვერ ამოიღეს. ჩნდება ეჭვი ადეიშვილის ძებნის გაუქმება ხომ არ უკავშირდება გარიგებას ხელისუფლებასა და ყოფილ ხელისუფლებას შორის, რაც ძალიან სერიოზული სიგნალი იქნება ქვეყანაში უარყოფითი პროცესების დასაწყებად. რეალურად, ეს იქნება კოჰაბიტაციის უკვე ის ეტაპი, რომელსაც შეიძლება ქორწინება დავარქვათ. ეს ჩვენი ქვეყნის აბსოლუტური უმრავლესობისთვის მიუღებელია და მივუახლოვდებით რევოლუციური განწყობების ფორმირებებს საზოგადოებაში. ეს იქნება მისი ერთ-ერთი მთავარი წინაპირობა“, – განაცხადა ახვლედიანმა.
„დემოკრატიული მოძრაობის“ ერთ-ერთი ლიდერის თქმით, განცხადება უფრო მკაფიოდ უნდა გააკეთოს თავად ინტერპოლმაც, იუსტიციის სამინისტრომაც, შესაბამისად საზოგადოებას არ უნდა დარჩეს ეს კითხვები.
„ასეც რომ არ იყოს და საქართველოს მთავრობის გარეშე იყოს გაკეთებული, არც ეგაა ამ შემთხვევაში სასიამოვნო, რადგან ეს ნიშნავს, რომ დღევანდელ ქართულ ხელისუფლებას ინტერპოლი პატივს არ სცემს, არ აღიარებს და არ თვლის საჭიროდ შეატყობინოს, ან ინფორმაცია მიაწოდოს, რომ კონკრეტულ რამეს აპირებს, როგორიცაა წითელი ცირკულარიდან ამ ქვეყნის დევნილის ამოღება. თუ ეს საქართველოს ნებართვის გარეშეა გაკეთებული, ძალიან მწვავე და მკაცრი შეფასება უნდა მოყვეს, თუმცა ჯერ არ მომისმენია საპროტესტო ნოტები გაეგზავნოს ჩვენს ხელისუფლებას, საგარეო საქმეთა სამინისტროს ინტერპოლში. ეს ყველაფერი კიდევ ერთხელ მაფიქრებს, ხომ არ არის რეალურად გარიგება და საქართველოს ნებართვა გაცემული, რომ ადეიშვილი ამოეღო ინტერპოლს ძებნილთა სიიდან“, – განაცხადა ახვლედიანმა.
