ადრე არაერთხელ გვითქვამს, რომ ლანჩხუთის „გურიაში“ არსებული შიდა კონფლიქტი თანდათან უფრო ღვივდებოდა და საბოლოოდ ის ძაფიც გაწყდა, რომელიც აკავებდა იმ პროცესებს, რაც ადრე თუ გვიან გარდაუვალიც იყო.
მოსახდენი „ტორპედოსთან“ წაგებული მატჩის შემდეგ მოხდა. ჯერ კიდევ „ვიტ-ჯორჯიასთან“ საშინაო მატჩის წინ ალაპარაკდა მუნიციპალიტეტის გამგებელი ზაზა ურუშაძე წვრთნელთა შესაძლო ცვლილებაზე. მაშინ მან გაგვიცხდა, რომ თუ „გურიამ“ ეს მატჩი ვერ მოიგო, თემურ ლორიას და მის გუნდს აუცილებლად გაუშვებდა.
მაშინ ეს პროცესი გადაიდო, რადგან „გურიამ“ დამაჯერებლად იმარჯვა, მაგრამ ამას ზედიზედ ორი მარცხი მოჰყვა და აქამდე შინ დაუმარცხებელი გუნდის მარცხმა, საბოლოოდ „აუსრულა საწადელი“ კლუბის ხელმძღვანელობას. „ტორპედოსთან“ მატჩის დასრულებისთანავე თემურ ლორია და საწვრთნელო შტაბი, ურუშაძემ დაიბარა და მათ წასვლა მოსთხოვა. თუმცა, სამშაბათამდე, ანუ ჩვენი წერილის დაწერის მომანტამდე, შესაბამისი ბრძანებები თვალით არავის უნახავს.
კომენტარისთვის ჯერ თემურ ლორიას დავუკავშირდით, რომელმაც საკმაოდ ვრცლად ისაუბრა გუნდში არსებულ დაპირისპირებაზე.
„რა უნდა გითხრათ, კლუბის ხელმძღვანელობა წაგებას რომ ჩასაფრებული ელოდება, საერთოდ რაზეა აქ საუბარი. ჯერ კიდევ მარტვილში წაგების შემდეგ დირექტორატმა წასვლა მომთხოვა, აქაოდა გამგებლის სურვილი ასეთიაო, მაგრამ უარი ვუთხარი.ჰოდა, კვირას კარგი შანსიც გაუჩნდათ. მეორე დღეა ბრძანებას ველოდები, სადაც ჩემი გათავისუფლების მოტივი იქნება დაფიქსირებული, მაგრამ აქამდე არ ჩანს. მეორე წრის დასაწყისშივე სურდათ ჩვენი გაშვება, არადა, ეროვნული ჩემპიონატის დაწყებამდე ორი დღით ადრე ჩავიბარე გუნდი. ვიცოდით, რომ ფული არ იქნებოდა და რამენაირად მეორე წრემდე უნდა მიგვეყვანა გუნდი. ამ ამოცანას რომ თავი გავართვით, ეს სატურნირო ცხრილიდანაც ჩანდა და ფედერაციიდან მოსული ორასი ათასი ლარი მხოლოდ ფეხბურთელებს გადავუნაწილეთ, ჩვენ თეთრიც არ აგვიღია. მეორე წრეში კი თანხა გამოჩნდა და გამგებელს თურმე უეფაზე გასვლის პრეტენზიაც გასჩენია, მაშინ, როცა უმაღლესი ლიგის შენარჩუნებაზე გვქონდა დავალება. სამწუხაროა, რომ გამგებელმა, რომელიც ამავდროულად კლუბის პრეზიდენტიცაა, არ იცის უეფას დონე, თორემ იმას არ იტყოდა, ისეთ პირობებშია გუნდი, რომ თბილისის „დინამოსაც“ კი შეშურდებაო. ვაღიარებ, საშუალო გუნდისთვის პირობები მართლაც კარგია, მაგრამ გუნდი სადაც ვარჯიშობს, ნახეთ ის სტადიონი თუ გავს რამეს.
ჩემზე და ფეხბურთელებზე უფრო არავის არ უნდა მაღალი ადგილის დაკავება, მაგრამ თავის დროზე, როცა გარკვეული ფეხბურთელების მოყვანა მინდოდა, უარი მითხრეს. რომელ მაღალ მიზნებზე უნდა ისაუბრო ამის შემდეგ, როცა მთავარ მწვრთნელს ვინც სურს, იმის გუნდში მოყვანის შანსი არ აქვს.
თითქმის ყველაზე გვიან დავიწყეთ სამზადისი. ყველა პატივმოყვარე გუნდი საზღვარგარეთ მოემზადა.
მხოლოდ სამი გუნდი დარჩა და აქედან ორი – „ზესტაფონი“ და „მეტალურგი“ ჩათვალეთ უკვე გავარდნილია. ამაზე გამგებელი არ საუბრობს, იმიტომ რომ არ იცის ფეხბურთი, არადა იბრალებს ვიციო.
კლუბში ასეთი სიტუაცია რომ არის, დირექტორატის არაპროფესიონალიზმის ბრალიცაა. გოგი ფაცურიასა და კახა ებრალიძის დროს ფული არ იყო და ასეთი ქაოსი არ ყოფილა, ახლა კი ფული გამოჩნდა, მაგრამ ამ ფულის სწორად ხარჯვა არ შეუძლიათ. არადა მილიონია გამოყოფილი, 800 ათასი უკვე დახარჯულია და შარშანდელი პრემიები არ აგვიღია, ხელფასები კი მოგვცეს და „ტორპედოსთან“ თამაშამდე ნარჩენი ორი თვისაც გამისტუმრეს, ახლა ვხვდები რატომაც.
კლუბში საქმისადმი არასერიოზული მიდგომა რომ არის ორ ფაქტს გეტყვით. პირველი ის, რომ მეორე წრეში ექვსი თამაში იყო ჩავლილი, გამგებელი ანუ კლუბის პრეზიდენტი ინიციატივით შემოდის იმ ფეხბურთელებს, რომლებსაც თამაშების ნახევარი არ უთამაშიათ, ხელფასი გაუნახევრდესო. ეს ყოვლად უაზროობა იყო და შევეწინააღმდეგე, რადგან კონტრაქტის დარღვევა იყო და ადამიანურადაც მიუღებელი. მაგალითად მიხეილ გოგუაძის ფაქტი მოვიყვანე, რომელსაც ხელფასი გაეზარდა და შემდგომ ტრამვის გამო თამაშები გამოტოვა. რატომ უნდა დაკლებოდა მას ხელფასი? საპრემიო სისტემის შეცვლაზეც ალაპარაკდა, მაშინ როცა კლუბში შეთანხმება იყო, რომ პრემიის ას პროცენტს იღებს ძირითადის მოთამაშეები, 75%-ს კი შესვლაზე შესულები, ნახევარს კი 18 კაციან განაცხადში მოხვედრილები. ჰოდა, პრეზიდენტი აცხადებს, რომ ვინც არ ითამაშებს, იმას პრემია არ ექნებაო. ასეთია უეფას დონის გუნდისადმი მიდგომა?
მეორე – ერთ დღეს, კლუბის ბუღალტერი შემოდის და ფეხბურთელებს რაღაც დოკუმენტზე ხელის მოწერას სთხოვს, სადაც წერია რომ მათი ხელფასების დავალიანება განულებულია. ფეხბურთი ვინც იცის, კარგად გაიგებს თუ რა მიდგომაზეა საუბარი.
რამდენიმე დღის წინ დაგვირიგეს ფარატინა ფურცლები, რაზეც თანამშრომელთა შეტყობინებაზე იყო საუბარი. კერძოდ, გვთხოვდნენ ხელი მოგვეწერა შესაძლო გათავისუფლებაზე, რაც სამუშაო ძალის შემცირების და ორგანიზაციური ცვლილებების გატარებით იყო ვითომ ახსნილი. რა თქმა უნდა, ამ აბდა-უბდაზე ხელი არ მოგვიწერია, რადგან დოკუმენტს არც ხელწერა და ბეჭედი ახლდა და არც გამომგზავნი აღმასრულებელი დირექტორის ბრძანების ნომერი.
მე მაქვს კონტრაქტი და ჩვენი ურთიერთობის იურიდიული მხარე სულ სხვაა და კლუბში ვინც იცოდა თუ რას ნიშნავს ეს, წასულები არიან. მაჩვენონ ერთი სად წერია კონტრაქტში უეფას ზონაში უნდა გავსულიყავით და იმიტომ გათავისუფლებთო. ცუდია ერთი ფაქტი, რომ კაცი უფულობის დროს რომ მოგიხმარს და მერე უცერემონიოდ გაგიშვებს. სწორედ ამიტომ არ ვაპირებ ჩემი ნებით წასვლას“,- ამბობს ლორია.
„გურია ნიუსი“ კლუბის აღმასრულებელ დირექტორს ოთარ ჩხაიძეს დაუკავშირდა, რომელიც გათავისუფლების ბრძანებაზე თავად აწერს ხელს.
„ბრძანება დაწერილია და ამ საღამოს ჩაბარდება ადრესატს. რაც შეეხება მის შინაარს, ამას ახლა ვერ გავასაჯაროებთ. ერთს გეტყვით მხოლოდ, რომ თემურ ლორიას შემცვლელად გიგლა იმნაძეს მოვიაზრებთ, ამ ეტაპზე მეტი არაფრის თქმა არ შემიძლია“, – გვითხრა ჩხაიძემ.
გიგლა იმნაძე, რომელსაც გუნდში კონსულტანტის პოსტი უკავია, ამ ფაქტს არ ადასტურებს.
„კონკრეტული საუბარი არ ყოფილა, ახლა გუნდთან ერთად ვარ და ველოდები ხელმძღვანელობას. ჯერჯერობით არაფერი არ გადამიწყვეტია, ვნახოთ, დაველოდოთ მოვლენების განვითარებას“ – გაგვიცხადა იმნაძემ.
ლორია პოზიციების დათმობას არ აპირებს, გიგლა იმნაძეც გაურკვევლობაშია, გუნდს კი ვარჯიში და ბათუმის „დინამოსთან“ მოახლოებული გასვლითი მატჩისთვის მომზადება სჭირდება.
