20-21 აპრილს, ოზურგეთის მუნიციპალიტეტის გამგებელი მერაბ ჭანუყვაძე, ოზურგეთის მუნიციპალიტეტის საკრებულოს თავმჯდომარე დავით დარჩია, ქალაქ ოზურგეთის მერი ბეგლარ სიორიძე, ქალაქ ოზურგეთის მუნიციპალიტეტის საკრებულოს თავმჯდომარე გელა კობალაძე სოფელ შემოქმედის, ლიხაურის, ბოხვაურის, ოზურგეთის და ქალაქ ოზურგეთის #1, #2, #3, #4 საჯარო სკოლის მე-10 და მე-11 კლასის მოსწავლეებს შეხვდნენ.
ეს შეხვედრა "post-ალიონის" და გაზეთ „გურია ნიუსის" ერთობლივი პროექტის – "აირჩიე დემოკრატია" ფარგლებში გაიმართა. სკოლის მოსწავლეებს ორი დღის განმავლობაში ჰქონდათ საშუალება პირველი პირებისგან მოესმინათ თუ რა ნიშნავს ადგილობრივი თვითმმართველობა, რა არის თვითმმართველი ერთეული, რამდენი სახის უფლებამოსილება გააჩნია მუნიციპალიტეტს? რამდენ შტოდ იყოფა სახელმწიფო ხელისუფლება? რამდენად მნიშვნელოვანია მოსახლეობის ჩართულობა ადგილობრივ დონეზე გადაწყვეტილებათა მიღების პროცესში? და ა.შ.
პროექტის დირექტორის, ია მამალაძის თქმით, მსგავსი შეხვედრები განხორციელება მნიშვნელოვანია, რადგან სკოლის მოსწავლეებმა უფრო მეტად გაიგონ თვითმმართველობის არსი.
როგორც ოზურგეთის მუნიციპალიტეტის გამგებლი მერაბ ჭანუყვაძე აღნიშნავს, ის მზად არის ნებისმიერ დროს უპასუხოს ნებისმიერ კითხვას და მსგავს შეხვედრაში მიიღოს მონაწილეობა.
"ჩვენი ხელისუფლების ყველაზე დიდი მონაპოვარი სწორედ ასეთი ინიციატივების მხარდაჭერაა. ადგილობრივი ხელისუფლების პოლიტიკა არის – რაც შეიძლება ახლოს ვიყოთ ხალხთან, ამომრჩევლებთან და მინიმუმამდე დავიყვანოთ ბიუროკრატიული პროცედურები. მოხარული ვიქნები თქვენთან, ახალგაზრდებთან ერთად მივიღოთ მუნიციპალიტეტისთვის საჭირო და მნიშვნელოვანი გადაწყვეტილებები".
რაც შეეხება ქალაქის მერს, ის შეხვედრით კმაყოფილია.
"ჩვენს ქალაქში ბევრი აქტიური და ქალაქის განვითარების საკითხებით დაინტერესებული ახალგაზრდა ცხოვრობს. მათ უმრავლესობას ვიცნობ. მიუხედავად იმისა, რომ ჩვენს ქალაქში ჯერ კიდევ ბევრი სოციალური და ინფრასტრუქტურული პრობლემაა, ვთვლი, რომ ქალაქის კულტურულ განვითარებაზე აუცილებლად უნდა ვიზრუნოთ. კინოთეატრის აღდგენა ჩემი დიდი სურვილია და კულტურის სამინისტროს მხარდაჭერით ხსენებული პროექტი, ახლო მომავალში აუცილებლად განხორციელდება.''_ განაცხადა შეხვედრაზე ბეგლარ სიორიძემ.
