ქალაქ ოზურგეთში, ა.(ა) .ი.პ. მოსწავლე ახალგაზრდობის სახლისა და ა.(ა) .ი.პ. კულტურის ცენტრის რეორგანიზაციასა და მათ გაერთიანებასთან დაკავშირებით, თანამშრომლებში აჟიოტაჟია ატეხილი, ისინი შემცირებაზე საუბრობენ.
"გურია ნიუსის" წყაროს ინფორმაციით, გუშინ მოსწავლე ახალგაზრდობის სახლში თანამშრომლებთან შესახვედრად ქალაქ ოზურგეთის მერი, მისი მოადგილე კობა დუნდუა და კულტურის სამსახურის უფროსი მარინა ჯაფარიძე იმყოფებოდნენ.
ცენტრის დირექტორის, მაია ნიკოლაიშვილის თქმით, ადგილობრივი ხელისუფლების წარმომადგენლებმა მათ უკეთესი პირობები შესთავაზეს, დაჰპირდნენ, რომ გაერთიანებული ა.ა.ი.პ. ოზურგეთის კინო- შენობაში განთავსდება, რომელსაც ევროდონეზე ჩაუტარდება რეაბილიტაცია. იქნება დიდი საკონფერენციო, სტუმრების მისაღები და სარკეებიანი დარბაზები. თანამშრომლებს კი მოემატებათ ხელფასები.
ჩვენს კითხვაზე, თუ როდის მოხდება აღნიშნული შენობის რეაბილიტაცია, ნიკოლაიშვილი გვპასუხობს, რომ არ უკითხავს და შესაბამისად ინფორმაციას არ ფლობს.
მაია ნიკოლაიშვილის განმარტებით, თუ კი ისე განვითარდება მოვლენები, როგორც მათ ქალაქ ოზურგეთის მერი დაპირდა, ეს მისთვის მისაღებია.
"გუშინ დაგვირეკეს და გაგვაფრთხილეს, რომ მოდიოდა ქალაქის მერი და უნდოდა ჩვენთან შეხვედრა, რადგან წინა დღეს საკრებულოს სხდომაზე გაჟღერდა ინფორმაცია ჩვენი ა.ა.ი.პ. რეორგანიზაციასთან დაკავშირებით, დეტალებს ნამდვილად ვერ გეტყვით, არც მე ვიცი, თანამშრომლები შევახვედრე მათ, იმყოფებოდნენ ქალაქ ოზურგეთის მერი, მისი მოადგილე კობა დუნდუა და კულტურის სამსახურის უფროსი მარინა ჯაფარიძე. ასევე ჟურნალისტი ახლდათ.
იყო ასეთი შეკითხვა კოლექტივის წინაშე, როგორ გვესახებოდა თემა, რომ მოსწავლე ახალგაზრდობის სახლი შეუერთდეს კულტურის ცენტრს. მეც არ ვფლობდი ინფორმაციას აქამდე, რადგან დღემდე ჩვენთვის არავის არაფერი განუცხადებია, ამიტომ ცოტა გაურკვევლობა იყო, მერმა აგვიხსნა, რომ სამსახურის ლიკვიდაცია არ მოხდებოდა, პირიქით მათ როგორც განგვიმარტეს, მოხდება კინო-შენობის რეაბილიტაცია, ევროდონეზე, იქ იქნება საკონფერენციო დარბაზები, კაბინეტები, ცეკვისთვის სარკეებიანი დარბაზები, და ასე შემდეგ. გაერთიანებულ ა.ა.ი.პ.-ს დაერქმევა კულტურისა და მოსწავლე ახალგაზრდობის ცენტრი.
ჩვენ ქართველები ვართ და ვართ ამბიციური ხალხი, ყველას უნდა დირექტორობა, მე დირექტორი ვარ 15 წელია, მაგრამ არ ვარ შეუცვლელი, სამსახურია შეუცვლელი, არც მე მომეწონება გვერდზე გადაჩოჩება, თუმცა როგორც კი დაგვიხასიათეს სქემა, გეგმა გაგვაცნეს, თუ როგორ ჰქონდათ მათ ეს დასახული, ჩვენ ამას შევხედეთ გაგებით. მათივე განმარტებით, ხელფასები მოიმატებს, არავინ შემცირდება, არავინ დაზარალდება, პირიქით შეიქმნება უკეთესი პირობები" , _ გვითხრა მაია ნიკოლაიშვილმა.
როდის დაიწყება და დასრულდება კონოს შენობის ევრო -დონეზე რეაბილიტაცია? ვინ ჩაატარებს ამ სამუშაოებს და როდის დასრულდება ორი ა.ა.ი.პ.-ის რეორგანიზაცია?
ქალაქ ოზურგეთის მერია გვპასუხობს – "ქალაქ ოზურგეთის მერია არასამეწარმეო იურიდიული პირების "ოზურგეთის მუნიციპალური კულტურის ცენტრი" – ს და "ოზურგეთის მუნიციპალიტეტის მოსწავლე-ახალგაზრდობის სახლი" – ს რეორგანიზაციას გეგმავს. რეორგანიზაციის დაწყების საკითხზე გუშინ საკრებულოს სხდომაზე დეპუტატებმაც იმსჯელეს. რაც შეეხება მერის ვიზიტს მოსწავლე ახალგაზრდობის სახლში, ის მიზნად თანამშრომლებთან რეორგანიზაციის საკითხებზე მსჯელობასა და რეფორმის შედეგად მიღებულ, გაუმჯობესებულ პირობებზე საუბარს უკავშირდებოდა. ორი ა.ა.(ი). პ- ის რეორგანიზაცია ყველა საჭირო იურიდიული პროცედურების გავლის შემდეგ დასრულდება. რაც შეეხება კინო-თეატრს, ის ეკონომიკის სამინისტრომ ქალაქ ოზურგეთს რამდენიმე თვის უკან გადმოსცა. კინო-თეატრის რეაბილიტაციასა და შენობისთვის პირველადი მნიშვნელობის დაბრუნების აუცილებლობაზე ქალაქის მერმა, კულტურის მინისტრს, გასულ კვირას ოზურგეთში სტუმრობის დროს, ესაუბრა. ჯერ-ჯერობით ჩვენთვის უცნობია დააფინანსებს თუ არა კულტურის სამინისტრო კინო-თეატრის რეაბილიტაციას."
