"დემოკრატიული მოძრაობის" ოზურგეთის ორგანიზაცია, დაბა ლაითურში უმიწოდ დატოვებული ეკომიგრანტების სამართლიან პროტესტს მხარს უჭერს და განვითარებულ მოვლენებს ეხმაურება:
"ჩვენ არაერთხელ მოვუწოდეთ დღეს არსებულ ხელისუფლებას, რომ ამ საკითხისადმი განსაკუთრებული ყურადღება გამოეჩინა, სრულფასოვნად შეესწავლა იგი და დაესახა მისი გადაჭრის გზები, რაც სამწუხაროდ არ მომხდარა.
მიგვაჩნია, რომ მიმდინარე პროცესები სახელმწიფოს მხრიდან განსაკუთრებულ რეგულირებას საჭიროებს, რადგანაც პრობლემის მასშტაბი და არეალი არ იძლევა იმის საშუალებას, რომ მხოლოდ ადგილობრივი ხელისუფლების ჩარევის შედეგად ან მიწის მესაკუთრეებთან მოლაპარაკების (ხელსაყრელ ფასად გლეხებისათვის მიწის მიყიდვასთან დაკავშირებით) გზით გადაიჭრას იგი, რადგანაც პრობლემა შემხებლობაშია ოზურგეთის მუნიციპალიტეტის სამი დაბის ათიათასზე მეტ მოსახლესთან.
ფაქტია, რომ 1992-1998 წლებში მიმდინარე მიწის რეფორმის მიმდინარეობისას და შემდეგშიც ამ ადამიანების მიმართ ხელისუფლების მოქმედებები აშკარად დისკრიმინაციულ ხასიათს ატარებდა. უსამართლო დამოკიდებულების შედეგად ეკომიგრანტებით დასახლებული დაბების მოსახლეობის უფლებრივი მდგომარეობა, პრობლემები და ინტერესები მნიშვნელოვნად განსხვავდება ოზურგეთის მუნიციპალიტეტის და მთლიანად ქვეყნის მოსახლეობისაგან. აღნიშნული ფაქტი, გარდა იმისა, რომ არ აძლევს მათ ადგილობრივ საზოგადოებასთან სრულფასოვანი ინტეგრაციის საშუალებას, ასევე ანგრევს მათში მოქალაქეობრივ ცნობიერებას. ყველაფერი ეს კი მთლიანობაში მნიშვნელოვნად აფერხებს ჩვენში მიმდინარე პოლიტიკურ-სოციალური და კულტურული პროცესების განვითარებას.
გაერთიანებული დემოკრატიული მოძრაობის ოზურგეთის ორგანიზაცია მიიჩნევს, რომ პრობლემის გადაჭრის მიზნით აუცილებელია საკანონმდებლო და აღმასრულებელი ხელისუფლების მხრიდან განხორციელდეს შემდეგი ღონისძიებები:
– მიეცეს სათანადო სასმართლებრივი და პოლიტიკური შეფასება 1992-1998 წლებში განხორციელებული მიწის რეფორმისას ეკომიგრანტებით დასახლებული დაბების მცხოვრებთა განსხვავებულ სამართლებრივ რეჟიმში მოქცევას, რამაც მათი მიწის გარეშე დატოვება გამოიწვია;
– სათანადოდ შესწავლილი იქნას ის მოსალოდნელი საფრთხეები, რაც შესაძლებელია წარმოიშვას მთიანი აჭარიდან ჩამოსახლებული ეკომიგრანტებისადმი უსამართლო დამოკიდებულებით;
– შემუშავებული იქნეს სათანადო ნორმატიული ბაზა, რომელიც უზრუნველყოფს უმიწოდ დარჩენილი მოსახლეობის ინტერესების დაკმაყოფილებას.
მოვუწოდებთ ხელისუფლებას, სრულად გაითავისოს პრობლემის არსი, მისი მასშტაბები და ის მოსალოდნელი პროცესები რამაც შესაძლებელია განვითარება ჰპოვოს იგივე დამოკიდებულების შენარჩუნებით ამ მეტად მტკივნეული პრობლემისადმი.
გაერთიანებული დემოკრატიული მოძრაობის ოზურგეთის ორგანიზაცია დაბების – ლაითურის, ნასაკირალის და ნარუჯის მოსახლეობას უცხადებს სრულ მხარდაჭერას და სთავაზობს მათთან ერთად პრობლემების რეალურად გადაჭრის გზების დასახვას და რეალიზებას", _ნათქვამია ოფიციალურ განცხადებაში.
