უიღბლო გამოდგა გიგლა იმნაძის ხელახლა დაბრუნება „გურიის“ მთავარ მწვრთნელად. დღეს ქობულეთში ცარიელი ტრიბუნების თვალწინ, გურულებმა მარცხი იწვნიეს ჩემპიონატის ერთ-ერთ ლიდერ ბათუმის „დინამოსთან“, რომელმაც მასპინძლის რანგში უმნიშვნელოვანესი 3 ქულა მიითვალა.
იმნაძემ ფაქტობრივად იგივე რესურსით და იგივე სქემით დაიწყო შეხვედრა, როგორც ლორიამ წინა მატჩში და საწყის წუთებში თითქოს უფრო აქტიური ჩანდა მისი სამწყსო. თუმცა, შეტევაში გართულებს მალე ბათუმელთა კონტრშეტევა გაეპარათ და მე-15 წუთზე ანგარიშიც გაიხსნა. შეცდომების შედეგი იყო ეს გოლი, ჯერ მოედნის ცენტრში დაიკარგა ბურთი უწყინარ სიტუაციაში, მერე კი მცველები იდგნენ სტატისტებივით და ბერიაშვილს ახლოდან გატანა დაანებეს.
20 წუთში ამ ფეხბურთელმა დუბლი გააკეთა და აქაც სტუმართა შეცდომებით ისარგებლა. გაუგებარია სამ მეტოქესთან ჭიდილში, როგორ დაარტყა მან საჯარიმოს წინა ხაზის რკალიდან თავისუფლად და როგორ ვერ მოახერხა გოგუაძემ, არც თუ აუღებელი დარტყმული ბურთის მოგერიება.
ამ ორმა გაშვებულმა გოლმა სტუმრები ცოტა გამოაფხიზლა და თამაშიც მათი კარნახით გაგრძელდა. განსაკუთრებით ეს მეორე ტაიმში გამოჩნდა, როცა მათი უპირატესობა საგრძნობი ჩანდა. მომენტებიც შექმნეს და ყველაზე აქტიურ შალამბერიძეს ორჯერ მართებდა გატანა, მაგრამ მეკარე ალავიძეს ვერ აჯობა. მალე ალავიძეს გოგიაშვილმა აჯობა და გოლიც გაიტანა თავით, მაგრამ მსაჯმა მეკარეზე თავდასხმის გამო ის გააუქმა. საეჭვო ეპიზოდი იყო, რადგან, გოგიაშვილმა დარტყმა დაასწრო მეკარეს და კონტაქტი მას შემდეგ იყო.
ამ ეპიზოდმა ვერ შეაჩერა „გურია“ და მეტოქე საკუთარ საჯარიმოს მიაჯაჭვა. მომენტებმაც იმრავლა და ჯერ მჭედლიშვილს უმტყუნა მიზანმა, მოგვიანებით კი როგორ აუღო ბათუმელთა კარის დარაჯმა ბენაშვილს ახლოდან თავით დარტყმული ბურთი, საკვირველი იყო. არადა, კარგი შეტევა გამოვიდა, მარჯვნიდან ჭეიშვილის ჩაწოდებულს საპირისპირო ფლანგზე შალამბერიძე გამოეხმაურა და ბურთი თავით საჯარიმოში ჩააგდო, იქ კი თავითვე დაარტყა ბენაშვილმა და საქართველოს ნაკრებში ახალგამოძახებულმა ალავიძემ სასწაული რეაქცია აჩვენა და ბურთი კუთხურზე გადააგდო.
გურულების აქტივობამ შედეგი მხოლოდ 81-ე წუთზე გამოიღო, როცა იმავე გოგიაშვილმა, მაინც მოახერხა გატანა და ბოლო წუთებს ინტრიგაც დაუბრუნა. ამ ჯერზე მან ფეხით მოახერხა ეს, დაამატა რა ალავიძის მიერ მოსიაშვილის მოგერიებულ თავურს.
დარჩენილ წუთებში არაფერი შეცვლილა, სტუმრებს გასაყაიმებლად ძალა არ შერჩათ და მცდელობა ხეირიანად არც გამოუვიდათ. ამ შედეგით, „გურია“ კიდევ ერთი ადგილით ჩამოქვეითდა, ხოლო „დინამო“ მეორე ადგილზე აიწია და ლიდერ „დილასთან“ 3 ქულა აშორებს. თუმცა, ასეთი თამაშით ჩემპიონობისთვის ბრძოლა, ცოტა არ იყოს ნათელი დასტურია, თუ რა დონის ფეხბურთია საქართველოში.
იმნაძემ გუნდი შემდეგი შემადგენლობით ათამაშა: გოგუაძე, ჭეიშვილი, კილაძე, გოგიაშვილი, მჭედლიშვილი, ზაზულია, ბენაშვილი, მოსიაშვილი (ინგოროყვა 85),კოშკაძე (მათიაშვილი 88), შალამბერიძე, წილოსანი (ისიანი 46).
