ეროვნული ბანკის ყოფილი პრეზიდენტი რომან გოცირიძე აღნიშნავს, რომ ც ჰეპატიტის პროგრამის განხორციელების ნიადაგი წინა მთავრობამ შექმნა, ახალმა კი ის წარმატებით განახორციელა.
""ც"ჰეპატიტის პროგრამაც, როგორც ყველაფერი, პოლიტიკური სპეკულაციების საგანი გახდა.
ეს არის უნიკალური შანსი, რომელიც მიეცა ქვეყანას როგორც იბიექტური,ასევე, შეიძლება ითქვას, შემთხვევითობის, გამართლების ფაქტორის გამო.
რატომ ტარდება ეს მსოფლიო ექსპერიმენტი საქართველოში? იმიტომ, რომ მესამე ადგილზე ვართ მსოფლიში ერთ სულ მოსახლეზე დაავადებულთა რაოდენობით; იმიტომ, რომ ქვეყნის ჯანდაცვის სისტემა მზადაა ამ საერთაშირისო აქციის წარმატებით ჩასატარებლად; იმ მიზეზის გამო, რომ ქვეყანა არის პატარა და ადვილია ამ პროცესის მონიტორინგი.
ამ პროგრამის განხორციელების ნიადაგი შექმნა წინა ხელისუფლებამ და წარმატებით გააგრძელა ახალმა.
ეს პროგრამა ჯდება საქართველოს წლიური ბიუჯეტის თითქმის ნახევარი და რომ არა გარემოებათა თანხვედრა, ვერასდროს განხორციელდებოდა იგი არა თუ საქართველოში, არამედ მასზე რამდენჯერმე მდიდარ სახელმწიფოშიც კი.
ამასთან, მთავრობა არ უნდა ხვდებოდეს აგრესიულად მის შესახებ ადგილობრივ თუ უცხოურ პრესაში გამოთქმულ შენიშვნებს.
მკურნალობა არის ნებაყოფილებითი და ვერავის დააძალებ მასში მონაწილეობას, თუმცა ადამიანებს აქვთ სრული უფლება მიიღონ ამომწურავი ინფორმაცია, თუნდაც კრიტიკული, მრავალი წყაროდან.
მე რომ ვიყო "ც" ჰეპატიტით დაავადებული, აუცილებლად მივიღებდი მონაწილეობას ამ პროგრამაში იმ ინფორმაციის საფუძველზე, რაც დღეს არსებობს, რადგან მოსალოდნელი ეფექტი გაცილებით დიდი მგონია, ვიდრე მოსალოდნელი რისკები. თანაც, ეს ისეთი ვერაგი დაავადებაა, რომ ღირს გარისკვაც.
ამასთან, არ ვისურვებდი პოლიტიკური მანიპულაციის და საარჩევნო ხმის მომტანად განმიხილოს ვინმემ, ვინაიდან სწორედ ქართველ ხელისუფალთაც მიუძღვის წვლილი იმაში, რომ მსოფლიოში "ლიდერი" ვართ ამ მძიმე სენის გავრცელებაში."
