ლანჩხუთის სპორტული ცენტრის კარატისტთა ჯგუფმა ქალაქ ბათუმში გამართულ აჭარის ღია პირველობაზე მორიგი გამარჯვება იზეიმა და სახლში რვა ოქროს, ორი ვერცხლისა და ხუთი ბრინჯაოს მედლით ხელდამშვენებული დაბრუნდა.
„ლანჩხუთში კარატე ერთ-ერთ ყველაზე წარმატებულ სპორტის სახეობად ითვლება და ჩვენი კარატისტებიც, შეიძლება ჩაითვალოს, რომ წარმატების მწვერვალზე არიან. ყველაფერ ამას წინ თავდაუზოგავი შრომა და უდიდესი მონდომება უძღვის. მიღწეულ წარმატებებში დიდი ამაგია ჩადებული როგორც თავად სპორტსმენების, ასევე მათი მწვრთნელების – მანუჩარ ჩხაიძის, ლაშა ბერიძის და ნათია თურქიას მხრიდან.
აჭარის პირველობაზე 15 საპრიზო ადგილის მოპოვება ნამდვილად არაა იოლი საქმე, თუმცა არც მანამდე გვაკლდა წარმატებები, ქვეყნის მასშტაბით გამართულ არაერთ პირველობაზე ღირსეულად ვიასპარეზეთ და სხვდასხვა სინჯის მედლებიც მოვიპოვეთ. ახლა მსოფლიოს თასის ჩემპიონატისთვის ვემზადებით, რომელიც თბილისში გაიმართება და სადაც უამრავი სპორტსმენი იქნება წარმოდგენილი სხვადასხვა ქვეყნიდან. გასულ წელს ამ ჩემპიონატზე არც თუ ურიგოდ გამოვედით და ერთი ოქროს მედლის მოპოვებაც შევძელით გიორგი კეჭეხმაძის თავდადების წყალობით, წელს დაგეგმილი გვაქვს შედეგი გავაუმჯობესოთ და გაცილებით მეტი საპრიზო ადგილი მოვიპოვოთ“, – გვითხრა ლანჩხუთის მთავარმა კარატისტმა მერაბ თურქიამ.
რაც შეეხება აჭარის პირველობას აქ ლანჩხუთელებიდნ ჩემპიონები გახდნენ – ზურა ბერიძე, მერაბ და გიორგი ჩხაიძეები, ანრი ჩხარტიშვილი, ქეთი გოგიჩაიშვილი, გიორგი ზენაიშვილი და გიორგი კეჭეხმაძე, რომელმაც საკუთარ აქტივზე ორი ოქრო მიითვალა. ვერცხლის მედლები კი მოიპოვეს დათო დუმბაძემ და გუგა ივანაშვილმა, ხოლო ბრინჯაო – ზურა ზარიძემ, ზურა ლომაძემ, გუგა ხოფერიამ, გიორგი საჯაიამ და ონისე ცინცაძემ.
