თქმა არ უნდა, ხელისუფლების ერთ-ერთი უმთავრესი პრიორიტეტი ინფრასტრუქტურული პროექტების გახორციელებაა, განსაკუთრებით, რეგიონებში და ამ მხრივ, გურია გამონაკლისი არაა.
ქვეყნის პრემიერის მიერ გაკეთებულ შეფასებას გურიაში გახორციელებული პროექტების შესახებ, ლანჩხუთში არაერთგვაროვანი გამოხმაურება მოჰყვა.
მთავარი "შავი ლაქა" კი ორი დიდი პროექტის ჩავარდნა იყო, რომელთაგან პირველი, ჯერ 2013 წელს ვერ დასრულდა და მეორე, უკვე გასულ წელს იგივე განმეორდა და ეს სამუშაოები რამდენიმე დღის წინ დასრულდა.
ოპოზიცია აღიარებს, რომ ინფრასტრუქტურის კუთხით ბევრი რამ გაკეთდა, მაგრამ ამ ფაქტებმა და სხვა მნიშვნელოვანმა ხარვეზებმა განაპირობა ის, რომ ლანჩხუთი წარმატებულთა შორის არ დასახელდა. ამ მხრივ, შენიშვნები აქვს საკრებულოს წევრ გია გოგუაძეს, რომელიც რამდენიმე კონკრეტულ მაგალითს ასახელებს.
"პრემიერმა ინფრასტრუქტურული სამუშაოების შეფასების დროს გურიის მუნიციპალიტეტებზე საუბრისას, ლანჩხუთი საერთოდ არ მოიხსენია. ამის მიზეზები, სამწუხაროდ, თვალხილულია. აი, ერთი მაგალითი _ შარშან მაისში გაუფორმეს ხელშეკრულება ტენდერში გამარჯვებულ ფირმას, რომელმაც შესასრულებელი სამუშაოებისთვის ყველაზე აქტიურ ხუთ თვეში არაფერი გააკეთა. წინასაარჩევნო რეჟიმში კი მომკითხველიც არავინ იყო. საბოლოოდ, გააუქმეს მასთან ხელშეკრულება და რადგან მთელი ქვეყნის მასშტაბით, ასეთი ფაქტები მრავლად იყო, მთავრობას სთხოვეს ტენდერის გარეშე, ერთ პირთან მოლაპარაკების გზით, მოენახათ ახალი შემსრულებელი. ერთ კვირაში ოპერატიულადაც მიიღეს ამის უფლება, მაგრამ, რად გინდა _ ორი თვე მოანდომეს სასურველი კომპანიის შერჩევას, რომელსაც დეკემბრის ბოლოს გაუფორმეს ხელშეკრულება და მარტის ბოლომდე მისცეს ვადა. წარმოგიდგენიათ, იანვარში, თებერვალსა და მარტში არსებულ ტემპერატურაზე ასფალტის დაგება, როგორი ხარისხის უნდა გამოსულიყო.
გამგებელმა ერთ-ერთ სატელევიზიო ეთერში, როგორც მას სჩვევია, თავი იმართლა, აქაოდა, ვერ ვაკონტროლებ ტენდერში ვინ შემოდის და რას გააკეთებსო. სიმართლე უნდა ითქვას, მთავრობიდან თანხები საკმაოდ ბევრი წამოვიდა, მარტო სტიქიაზე, შარშან ხუთი მილიონი ჩამოირიცხა. მაინტერესებს, ტენდერს თუ არა, ერთ პირთან მოლაპარაკებას მაინც ხომ აკონტროლებენ? მაშინ ვინ მოიყვანა თბილისური ფირმა "გალაქტიკა", რომელმაც 600 ათასი ლარის სამუშაო კი შეასრულა, მაგრამ რამდენიმე გაბიონი იმ წელსვე დაენგრა? როცა ამ გაბიონების აღდგენაზე წავიდა საუბარი, ეს ფირმა უკვალოდ გაქრა და დღემდე ვერ პოულობენ. დანგრეულის აღსადგენად კი მთავრობას კიდევ ერთხელ მოსთხოვეს თანხები და გამოდის, ერთი და იმავე სამუშაოსთვის ფული ორჯერ გაიხარჯა და ეს ყველაფერი სტიქიას გადააბრალეს, მთავრობა კი შეცდომაში შეიყვანეს.
არსებობს ინფრასტრუქტურისა და ზედამხედველობის სამსახური, რომელიც საკმარისი აღჭურვილობით დავტოვეთ, როგორც ტექნიკით, ასევე, ჩასაცმელ-დასახურითაც და რომელმაც კეთილი უნდა ინებოს, ყოველკვირეულად მოახდინოს შესრულებული სამუშაოების მონიტორინგი, აწარმოოს ჟურნალი და მშენებლებს გრაფიკი გააკეთებინოს და ჩაიბაროს კვირის ბოლოს. ჩვენს დროსაც იყო ასეთი შემთხვევა, როცა ბარათაშვილის ქუჩაზე შეფერხდა სამუშაოები. ტენდერში გამარჯვებულმა ორგანიზაციამ დაარღვია გრაფიკი და ეს შევნიშნეთ თუ არა, მყისიერად მივმართეთ ინფრასტრუქტურის სამინისტროს. იქ არსებობს სპეციალური სამსახური, რომელიც ასეთ ფაქტებზე რეაგირებას აკეთებს. ჰოდა, ამის შემდეგ ამ ფირმამ კეთილი ინება და გაათკეცებული ენერგიით მოახერხა ჩამორჩენის დაძლევა და ობიექტის ვადებში ჩაბარება.
ეს რომ გამგებელს განვუცხადე, მან ისევ იმართლა თავი _ სამჯერ მივმართე სამინისტროს, მაგრამ ვერაფერს მივაღწიეო და ეს გამოსავალია? მოკლედ გაექცათ სიტუაცია, ამას შარშან წინასაარჩევნო კამპანიამაც შეუწყო ხელი, შარშანწინდელი მაგალითი კი არავინ გაითვალისწინა.
კოსტავას ქუჩაზე გახორციელებულ სამუშაოზე უნდა ვთქვა აუცილებლად. აქ ჯერ წყლის კომპანიას უნდა დაეგო პირველი პირი ასფალტის ფენა და შემდეგ უნდა გადაგვეგო ჩვენ. ამ კომპანიამ ვალდებულებები არ შეასრულა, პასუხიც არავინ მოსთხოვა და გამოვიდა ისე, რომ იქ დაგებული ასფალტი უხარისხოა.
ქალაქის შესასვლელ-გამოსასვლელში და მთლიანად ცენტრალურ ქუჩაზე, ამავე კომპანიის ვალდებულება იყო გადათხრილი ტროტუარების აღდგენა. ამასაც არავინ აკეთებს და ჩვენი ფულით უნდა მოხდეს სხვისი საქმის კეთება. ამასთან ქალაქში რამდენიმე ქუჩა გადათხრილია და წყლის კომპანიას არავინ სთხოვს საქმის ბოლომდე მიყვანას. სირცხვილია რა, უბრალოდ, რაც ხდება," _ ამბობს გოგუაძე.
ამ თემებზე საუბარი სამშაბათს გამართულ ინფრასტრუქტურის კომისიის სხდომაზე გაგრძელდა და გია გოგუაძის შენიშვნებზე პასუხის გაცემა გამგებელს და მის მოადგილეს მოუხდათ.
გამგებლის ზაზა ურუშაძის განმარტებით, პრემიერმა თავის გამოსვლაში მხოლოდ ის მუნიციპალიტეტები დაასახელა, სადაც ეფექტურად მოხდა ინფრასტრუქტურული სამუშაოებისთვის თანხების ათვისება:
"ბუნებრივია, ჩვენ ამ ჩამონათვალში ვერ მოვხვდებოდით, რადგან გარკვეული სამუშაოები ჩაგვივარდა და თანხაც მთლიანად ვერ ავითვისეთ. რაც შეეხება ჩავარდნილ ტენდერს, ფირმას, რომელიც სამუშაოებს აწარმოებდა, ვერ გავუწყვიტეთ ხელშეკრულება, რადგან გარკვეული ეტაპის სამუშაოები მათ დაიწყეს და არ გვქონდა უფლება, დაგვერღვია ხელშეკრულებით გათვალისწინებული პირობები. საარჩევნო კამპანიის პერიოდში მე არ ვასრულებდი გამგებლის მოვალეობას და, აქედან გამომდინარე, ამ თემასთან შეხება ნაკლებად მქონდა.
მას შემდეგ, რაც გავწყვიტეთ ხელშეკრულება, ჩემი სურვილი იყო, ისევ ტენდერით შეგვერჩია ახალი შემსრულებელი, მაგრამ მხარის ხელმძღვანელობამ ერთ პირთან მოლაპარაკება არჩია და ამ გარკვეულ მიმოწერაში ერთი თვეც გავიდა, ახალი ხელშეკრულების გასაფორმებლად ორის ნაცვლად ერთი თვე დაგვიგვიანდა.
რაც შეეხება ერთი და იმავე ობიექტის ორჯერ აღდგენას, ამასთან დაკავშირებით საქმის კურსში არ ვარ და არ ვიცი, რაზეა საუბარი და თუ მართლაც ასეა, ძალიან ცუდი. აუცილებლად შევისწავლით ამ საკითხს", _ განაცხადა ურუშაძემ.
განმარტებები ამავე თემაზე გამგებლის პირველმა მოადგილემ ვახტანგ ზენაიშვილმაც გააკეთა: "ყველა იმ ფირმას, ვისაც შესრულებული სამუშაო უხარისხო გამოუვიდა, წერილები დავუგზავნეთ. ზოგი გამოგვეხმაურა და თავადაც შეაკეთა, რაც დაზიანებული იყო. რაც შეეხება "გალაქტიკას", ზუსტად ვერ ვიხსენებ, მაგრამ მგონი, ამ ფირმის წარმომადგენლები არჩეულში დაზიანებული გაბიონის მოსანახულებლად ჩამოსულები იყვნენ და მოითხოვეს იქ გარკვეული სამუშაოები ჩაგვეტარებინა, რომ შემდგომ მათ მოეხდინათ ობიექტის აღდგენა. რა თქმა უნდა, გავარკვევთ, რა ხდება, მაგრამ არ მგონია, გაორებას ადგილი ჰქონდეს".
ზაზა ურუშაძე: "წყლის კომპანიასთან დაკავშირებით გეტყვით, რომ ამ კომპანიამ გზების აღდგენის ნაკისრი ვალდებულებებისთვის საჭირო თანხები სახელმწიფოს უკან დაუბრუნა და ბუნებრივია, ჩვენ მათ ვერ მოვთხოვდით აღნიშნული სამუშაოების შესრულებას".
კომისიის სხდომაზე განხილულ სხვა თემებს უახლოეს მომავალში გაგაცნობთ.
