ქალაქ ოზურგეთში, შპს „სავაჭრო ცენტრში", ყოფილი ძველი ბაზრის ტერიტორიაზე, მშენებლობა მიმდინარეობს.
"გურია ნიუსი" დაინტერესდა, ვინ და რა თანხებით აწარმოებს ადგილზე მშენებლობას, რაზეც პასუხი არ აქვთ მუშებს.
მათი თქმით, არ იციან ადგილზე რა შენდება და ვინაა პასუხისმგებელი.
თუმცა, როგორც მოგვიანებით გავარკვიეთ, მშენებლობას "ოზურგეთის სერვისცენტრის", კეთილმწყობის განყოფილების თანამშრომლები აწარმოებენ.
მშენებლობაზე იმყოფებოდა ოზურგეთის მუნიციპალიტეტის სოფელ ბოხვაურის ყოფილი რწმუნებული ზურაბ კილაძე, რომელიც "ოზურგეთის სერვისცენტრში", კეთილმოწყობის განყოფილებას ხელმძღვანელობს.
ზურაბ კილაძემ, "გურია ნიუსის" კითხვებს თავი აარიდა და განაცხადა, რომ ის მშენებლობასთან დაკავშირებით ინფორმაციას არ ფლობდა, უბრალოდ იმყოფებოდა იქვე, მშენებლობის მიმდებარე ტერიტორიაზე სადაც გოჭებს წვავენ.
"მე არაფერი არ ვიცი, აგერ გვერდზე გოჭებს ვწვავ" – გვითხრა კეთილმოწყობის განყოფილების უფროსმა ზურაბ კილაძემ.
ერთადერთმა მუშამ, რომელიც აგურებს დებდა და თავი გურამ წიტაიშვილად წარმოგვიდგინა, გვითხრა, ადგილზე კეთილმოწყობილ საქათმეს ქალაქ ოზურგეთის მერია აშენებს.
"ქალაქის მერია აშენებს საქათმეს, კეთილმოწყობილი ვინტილიაციით და ეკოლოგიურად სუფთას, ევროსტანდარტებით. ვაშენებ, მე, არ იცით ვინ ვართ? კეთილმოწყობის განყოფილების თანამშრომლები ვართ, ხელფასები გვაქვს, რა თქმა უნდა".
"ოზურგეთის სერვისცენტრის" დირექტორი ვლადიმერ სალუქვაძე შვებულებაში იმყოფება, მის მოვალეობას ტარიელ ჟღენტი ასრულებს. ჟღენტმა "გურია ნიუსთან" განაცხადა, რომ ის მშენებლობასთან დაკავშირებით ინფორმაციას არ ფლობს.
"ყველაზე უბედურება ის არის, რომ არ ვარ საქმის კურსში, ამ წუთში კი ვასრულებ დასუფთავების სამსახურის უფროსის მოვალეობას, მაგრამ არ ვიცი რა ხდება, რა კეთდება, მოდი მე დაველაპარაკები კეთილმოწყობის განყოფილების უფროს ზურაბ კილაძეს და ჩვენ მოვალთ მერე თქვენთან,
უბრალოდ ინფორმაციით ვიცი, რომ კეთდება ფრინველების გასაყიდად ფარდული, ვინ აშენებს, რა თანხებით, ამაზე ინფორმაცია არ გვაქვს."
ჩვენს კითხვაზე, თუ ვინ არის ზურაბ კილაძე, ვისაც უნდა დაკავშირებოდა ტარიელ ჟღენტი, გვიპასუხა, რომ კილაძე არის ის პირი, ვინც უშუალოდ ფიზიკურად კურირებს აღნიშნულ მშენებლობას.
რამდენად ევალება კეთილმოწყობის განყოფილებას მშენებლობა? ამაზე დასუფთავების სამსახურის უფროსის მოვალეობის შემსრულებელი განმარტავს, რომ კეთილმოწყობის სამსახურს ევალება ქალაქ ოზურგეთში ბორდიურების მოწყობა, სანიაღვრე არხების გაკეთება, თუმცა რაც შეეხება კონკრეტულ მშენებლობას, ეს მის კომპეტენციაშია არაა.
"ჩვენს სამსახურს ევალება, ქალაქში ბორდიურების მოწყობა, სანიაღვრე არხების გაკეთება, ქალაქში საქმიანობები კი გვევალება, მაგრამ რომ გითხრათ, რომ მშენებლობა, არა", _ აღნიშნა ჟღენტმა და დასძინა, რომ დაფინანსებისა და მუშებისთვის მისაცემი ხელფასების შესახებ ინფორმაციას არ ფლობს.
რა შენდება ძველ ბაზარში, ვინ აშენებს, რა დანიშნულებისთვის, რა სახსრებით, რა თანხა ჯდება, შედის თუ არა ეს ტერიტორია ბიზნესმენ გოჩა სალუქვაძის მიერ 35 წლიანი იჯარით აღებულ ტერიტორიაში, აღნიშნულ კითხვებზე ქალაქ ოზურგეთის მერიაში ასეთ კომენტარს აკეთებენ:
"ბაზრის იმ ტერიტორიაზე, სადაც წვრილფეხა პირუტყვითა და ფრინველით ვაჭრობენ, მოვაჭრეებისთვის თანამედროვე ტიპის ღია ფარდულის მოწყობა იგეგმება. ეს ტერიტორია არ გახლავთ იმ ფართის ნაწილი, რომელიც ბიზნესმენ გოჩა სალუქვაძეს უზუფრუქტით გადაეცა. სამუშაოებს ა.ა.ი.პ. "ოზურგეთის სერვის-ცენტრის" თანამშრომლები ახორციელებენ. ა.ა.ი.პ.-ის სამუშაო მოვალეობებში პირდაპირ შედის ქალაქის ტერიტორიაზე კეთილმოწყობითი სამუშაოების შესრულება. რაც შეეხება თანხას, სავაჭრო ფარდულის აშენება ა.ა.ი.პ. "ოზურგეთის სერვის-ცენტრი"-ს სუბსიდიით ხორციელდება."
