“ფეხებზე ჰკიდია” თუ არა პენსიონერები “ლიბერთი ბანკს”

ოზურგეთის მუნიციპალიტეტის სოფელ ფამფალეთის მკვიდრი ავთანდილ მჟავია “გურია ნიუსის” ოზურგეთის განყოფილებას 22 დეკემბერს, დილის 9 საათზე ეწვია და თავისი გასაჭირის შესახებ უამბო _ მას მისივე სოფლის რწმუნებული “ინტრიგანს” უწოდებს, “ლიბერთი ბანკის” მმართველი კი უარყოფს, რომ მოქალაქეს სიტყვიერი შეურაცხყოფა მიაყენა.

_ ვცხოვრობ სოფელ ფამფალეთში, უმუშევარი ვარ, ჩვენს ოჯახს ეკონომიკურად ძალიან უჭირს, მყავს მოხუცებული, პენსიონერი, ახალნაოპერაციები, დავრდომილი დედა, რომელსაც გადაადგილება არ შეუძლია და ვერ ახერხებს აიღოს კუთვნილი პენსია. პურის ფულიც არ მაქვს, მჭადს კი ვერ ჭამს. ლუკმა-პური რომ ვუყიდო, მის ნაშრომს, მის კუთვნილ პენსიას არ მაძლევენ, _ გვითხრა ავთანდილ მჟავიამ, _ “ლიბერთი ბანკის” მმართველმა, ავთანდილ სვანიძემ მითხრა, ჩემთან ტყუილად არ მოხვიდე, მე ვერ დაგეხმარებიო. რომ ავუხსენი მდგომარეობა, არ მაქვს საშუალება, რომ მანქანით უზრუნველვყო დედაჩემის გადაადგილება და რა ვქნა,-მეთქი, მიპასუხა, ფეხებზე მკიდია, მე რა გიყოო. სოფელში როცა “ლიბერთი ბანკის” მანქანა ამოდის, ცენტრში ჩერდება. ვთხოვე, იქნებ, ჩემს სახლამდე მოხვიდეთ და ნახოთ, დედაჩემის მდგომარეობა, ხომ არ ვიტყუები,-მეთქი? უამრავი თანამშრომელი ჰყავს ბანკს. თვითონ ხომ იღებენ ხელფასებს? გაჭირვებულ ადამიანებს კუთვნილი ერთადერთი საარსებო წყარო _ პენსია არ უნდა მისცენ? გამოდიან ტელევიზიით და ამბობენ, გაჭირვებული ადამიანები არ გვყავს და ყველაფერი კარგადააო. ამოვიდნენ ჩემთან და ნახონ, როგორ ვცხოვრობ. სოფლის რწმუნებულმა ამის მეტად არ უნდა მომაქციოს ყურადღება? ან არ იცის, რომ გვიჭირს და არანაირი საშუალება არ გვაქვს?

“ლიბერთი ბანკის” ოზურგეთის ფილიალის მმართველი, ავთანდილ სვანიძე “გურია ნიუსთან” საუბარში აღნიშნავს, რომ მინდობილობა კეთდება უფასოდ. ამას “ლიბერთი ბანკი” თავად უზრუნველყოფს:

_ ჩვენ მინდობილობას მინდობილ პირზე, ვაკეთებთ უფასოდ, ერთი წლის ვადით. ასეთი პიროვნება მე არ მახსოვს. არ მქონია შემთხვევა, ვინმე ჩემთან მოსულიყოს და არ დავხმარებოდი. დაამზადოს მინდობილობა თავის სახელზე, მოვიდეს და მივცემთ კუთვნილ პენსიას. ეს პრობლემა რწმუნებულმა უნდა მოაგვაროს. ისე, ვეცდები, რომ მას ეს პრობლემა ორშაბათისთვის გადავუჭრათ.

_ მჟავია ამბობს, რომ თქვენ დახმარებისთვის მოგმართათ და თქვენგან კი პასუხი _ “ფეხებზე მკიდია”, მოისმინა.

_ მე მასე არ მივმართავ მოქალაქეებს და მსგავსი რამ ნამდვილად არ ყოფილა.

ოზურგეთის მუნიციპალიტეტის სოფელ ფამფალეთის რწმუნებული ივანე გობრონიძე “გურია ნიუსთან” საუბარში თანასოფლელს ინტრიგანს უწოდებს:

_ მას უნდა გაეკეთებინა მინდობილობა. ვასწავლეთ კიდეც, რა უნდა ექნა. თვითონ არ გააკეთა და ჩვენ ხომ ვერ გავუკეთებდით მის სახელზე? ახლა გავუკეთებთ.

_ თუ შეიძლებოდა, რომ დახმარებოდით, აქამდე რატომ არ დაეხმარეთ?

_ ჩვენ რატომ უნდა გაგვეკეთებინა? თვითონ უნდა გაეკეთებინა მას.

_ მაგრამ როცა ადამიანს უჭირს და ამის საშუალება არ აქვს?

_ ავუხსენით ყველაფერი. მაგი ინტრიგანია!

_ რა ნიშნავს, ინტრიგანია?

_ რას და რომ ავუხსენით, როგორ უნდა მოქცეულიყო და არ გააკეთა. როცა ამოდის “ლიბერთი ექსპრესი”, მასთან უნდა მოაგვაროს ეს საკითხი.

_ ამბობს, რომ არ მისცეს პენსია.

_ როცა ამოვა “ლიბერთი ექსპრესი”, მაგათ უნდა უზრუნველყონ, აბა ვინ? ჩვენ მანქანა არ გვყავს და ბენზინს შეძენის საშუალება არ გვაქვს. ჩვენ როგორ უნდა გადავიყვანოთ?

_ ადასტურებთ ინფორმაციას, რომ მას ძალიან უჭირს?

_მე იმასაც დავადასტურებ, რომ მას ჭკუითაც უჭირს.

_ რის საფუძველზე ამბობთ ამას და აყენებთ შეურაცხყოფას?

_ მაგას თქვენ თვითონაც მიხვდებით. ჩვენ რაც საშუალება გვქონდა, ის გავუკეთეთ, მეტი არ შეგვიძლია.