თუ პრეზიდენტი ერთ კვირაში მიაღწევს და მთავრობის შემადგენლობას შეცვალის, ეს აჩვენებს, რომ მას სიტყვა ეთქმის, მაგრამ თუ ერთი კვირის შემდეგ მარგველაშვილი იძულებული გახდება ამ ცვლილებებს დათანხმდეს ,ეს დაამტკიცებს, რომ ის არაფერს მართავს, _ ასეთ შეფასებას აკეთებს პოლიტილოგი სოსო ცინცაძე დღეს განვითარებული პროცესების შეფასებისას.
მისივე თქმით, მინისტრთა კაბინეტის წევრების პარლამენტისთვის წარდგენის ერთი კვირით გადაწევამ, კიდევ ერთხელ დაადასტურა, რომ პრეზიდენტსა და პრემიერს შორის ღია დაპირისპირებაა. ამიტომ ჯერჯერობით უცნობია გაითვალისწინებს თუ არა ირაკლი ღარიბაშვილი პრეზიდენტის რჩევას მინისტრთა კაბინეტი სიფრთხილით დააკომპლექტოს.
"გურია ნიუსთან" საუბრისას ცინცაძე ამბობს, რომ მინისტრების შეცვლის გადაწყვეტილება ღარიბაშვილს არ მიუღია.
"ღია დაპირისპირება პრეზიდენტსა და პრემიერს შორის დიდი ხანია არის, ამას არ სჭირდებოდა ეს უკანასკნელი აქცია, რომ კიდევ ერთხელ აფიშირებულიყო. თვითონ პრემიერიც უხერხულ მდგომარეობაშია. მან ჯერ კიდევ გუშინ განაცხადა, რომ მხოლოდ ორი ვაკანსიაა გამოცხადებული და ის მინისტრები შეიცვლებიან, რომელთა სავარძლებიც დაცარიელდა. უცებ ირკვევა, რომ იცვლება საკვანძო მინისტრიც. გამოდის, რომ პრემიერს ხელი აღარ მიუწვდება და არ აქვს ინფორმაცია იმაზე თუ ვის ცვლიან მის კაბინეტში და ვის ტოვებენ.
ერთი უბედურებაა, პრემიერი რომ აღარ წყვეტს, რომელი მინისტრი წავიდეს და რომელი დარჩეს, მაგრამ უფრო დიდი უბედურებაა ის, რომ მან არც იცის ვინ წავა და ვინ დარჩება. ე.ი. ორი დღის წინ ის არ აპირებდა თავდაცვის მინისტრის შეცვლას. დღეს გამოაცხადა, რომ მინისტრი იცვლება. ჩემი აზრით, ეს საკითხი ორი დღის წინ, ამერიკის ელჩის ვიზიტის დროს, ბიძინა ივანიშვილის კაბინეტში დაიგეგმა", _ აცხადებს ცინცაძე და განმარტავს, რომ ამერიკელთა ფავორიტი პარტია შეიცვალა.
"აქამდე ვაშინგტონის ფავორიტი პარტია "ნაციონალური მოძრაობა" იყო, შემდეგ ალასანიას პარტია. თუმცა, როგორც ჩანს, ამერიკელებმა გადაწყვიტეს, რომ ალასანიას პარტიას მომავალი ნაკლებად აქვს. ახლა ფსონი დადეს "რესპუბლიკელების", თინა ხიდაშელის პარტიაზე. მე არ ვიტყოდი რომ ეს სწორი ფსონია იმიტომ რომ "რესპუბლიკური პარტია" თუ მარტო დარჩება ძლიერი ლოკომოტივის გარეშე ის წინ ვერ წავა. მას საელექტორატო პოტენციალი დაბალი აქვს. ამიტომ უცებ გამოჩნდა ხიდაშელის კანდიდატურა. მიჭირს ვთქვა, მთავრობაში ვინ არის ღარიბაშვილის კადრი" , _ აღნიშნავს ცინცაძე.
მისივე თქმით, ახლა მთავარი პრეზიდენტისა და მთავრობის, პრეზიდენტის და პარლამენტის შეთანხმებაა.
"კიდევ ერთი საკითხია პრეზიდენტი და მთავრობა, პრეზიდენტი და პარლამენტი როგორ შეთანხმდება. თვითონ ხიდაშელი პარლამენტარია. ყველაფერს რომ თავი დავანებოთ პარლამენტის თავჯდომარის ცოლია. უსუფაშვილისგან მიკვირს, როცა აცხადებს მთავრობა სტაბილურიაო – მან უნდა იცოდეს აუცილებლად რომ ეს არის მეცნიერების ფილოსოფიის ამბავი. როდესაც ლიდერი იწყებს იმის მტკიცებას, რომ მთავრობა ეფექტურად მუშაობს ეს არის პირველი ნიშანი იმისა, რომ ამის თვითონაც არ სჯერა და იძულებული გახდა ეს განცხადება გაეკეთებინა. ცუდია, როდესაც ქვეყანაში ასეთი მძიმე მდგომარეობაა და მთავრობის წევრები ვერ რიგდებიან.
თუ პრეზიდენტი ერთ კვირაში მიაღწევს და მთავრობის შემადგენლობას შეცვალის, მაშინ პრეზიდენტის რეიტინგი აიწევს და ყველას დაანახებს, რომ პრეზიდენტსაც სიტყვა ეთქმის, მაგრამ თუ ერთი კვირის შემდეგ მარგველაშვილი იძულებული გახდება ამ ცვლილებებს დათანხმდეს ეს დაამტკიცებს რომ მარგველაშვილი არაფერს არ მართავს", _ ამბობს ცინცაძე.
პროცესების მმართველი რომ ირაკლი ღარიბაშვილი არ არის, ამაზე "თავისუფალი დემოკრატებიც" საუბრობენ. როგორც ფრაქცია "თავისუფალი დემოკრატების" თავმჯდომარის ირაკლი ჩიქოვანი აცხადებს, პრემიერ-მინისტრი მინისტრების კანდიდატების დასახელებისას დაბნეული ჩანდა.
ჩიქოვანის განმარტებით, მას ეჭვი აქვს, რომ მთავრობის ამ ახალ შემადგენლობას შეეძლოს ქვეყანა ეკონომიკური კრიზისიდან გამოიყვანოს.
,,ეს ცვლილება მთავრობაში არ არის არსებითი. კოლეგებს მინდა წარმატება ვუსურვო, მაგრამ ნებისმიერ ადამიანს, ნებისმიერ თანამდებობაზე მოუწევს იმის დამტკიცება, რომ იმ ნდობით რა ნდობითაც სარგებლობს საზოგადოებისგან, უნდა გაამართლოს. რაც შეეხება იმ გადაწყვეტილებებს, რომელიც დღეს იქნა მიღებული, თვითონ პრემიერ–მინისტრი დაბნეულია. ის ერთ დღით ადრე საუბრობდა იმას, რომ მხოლოდ ორი მინისტრი შეიცვლებოდა, მაგრამ შეიცვალა სამი მინისტრი. ვხედავთ, რომ გადაწყვეტილებებზე პრემიერ–მინისტრი ვერ იღებს რეალურ პასუხისმგებლობას. აქედან გამომდინარე, მე ეჭვი მაქვს, რომ ამ მთავრობასაც შეეძლოს აიღოს პასუხისმგებლობა თავის თავზე იმ ეკონომიკურ კრიზისთან დაკავშირებით, რომელშიც ჩვენ ვართ", _ განაცხადა ირაკლი ჩიქოვანმა
შეგახსენებთ რომ ირაკლი ღარიბაშვილმა მინისტრთა კაბინეტის წევრები დღეს წარადგინა, თუმცა პრეზიდენტმა პარლამენტში წარდგენის პროცესი ერთი კვირით გადადო და ამის მიზეზად მთავრობის ფორსმაჟორულ სიტუაციაში მუშაობა დაასახელა.
"არსებულ ვითარებაში, როდესაც რამდენიმე დღის განმავლობაში ვნახეთ მინისტრების მყისიერი ცვლილება, როდესაც ვხედავდით, რომ ერთ–ერთ მინისტრი ამბობს, რომ არ მიდის პოსტიდან და მერე წავიდა, როდესაც ვიცოდით, რომ მხოლოდ 2 მინისტრი იცვლება და შეიცვალა სამი, მე მრჩება შთაბეჭდილება რომ მთავრობა ცოტა ფორსმაჟორის რეჟიმში მუშაობს. მინდა ყველას გაგახსენოთ, რომ რთული გამოწვევების წინაშე ვდგავართ. როგორც მთავარსარდალმა, მე მინდა დავსვა კითხვა – რა სიხშირით უნდა ვცვლიდეთ თავდაცვის მინისტრებს? ამ რთული ვითარების ფონზე, მინდა მივცე შესაძლებლობა როგორც პრემიერს, ისე პარლამენტს, უფრო მშვიდ გარემოში განახორციელონ კონსულტაციები. ვიყენებ კონსტიტუციით მონიჭებულ ერთადერთ შესაძლებლობას და ერთი კვირის ვადით გადავდებ იმ ხელმოწერას, რომელიც უნდა დამესვა მთავრობის სიაზე", – განაცხადა მარგველაშვილმა.
პრეზიდენტის ეს გადაწყვეტილება უმრავლესობასა და ოპოზიციაში დადებითად შეფასდა.
საპარლამენტო უმრავლესობის ლიდერი დავით საგანელიძე მიიჩნევს, რომ გიორგი მარგველაშვილის მიერ მიღებულ გადაწყვეტილებაში არის ლოგიკური საფუძველიც.
როგორც საგანელიძემ ჟურნალისტებთან საუბრისას აღნიშნა, სასურველი იქნებოდა, მთავრობის დამტკიცება არ გაჭიანურებულიყო, თუმცა პრეზიდენტმა კონსტიტუციით მინიჭებული უფლება გამოიყენა.
"დროებით მთავრობაზე საუბარი არ არის. პრეზიდენტი არის იმ როლში, რასაც ჰქვია არაპარტიული, დამოუკიდებელი პირი, არა რომელიმე პარტიაზე ორიენტირებული პიროვნება, არამედ პირი, რომელსაც აქვს თავისი საკონსტიტუციო უფლებები და ცდილობს, გამოიყენოს ეს უფლებები", _ განაცხადა საგანელიძემ.
პრეზიდენტის მიერ გაკეთებულ განცხადებაში პრობლემურს ვერაფერს ხედავს გარემოს დაცვისა და ბუნებრივი რესურსების მინისტრობის კანდიდატი გიგლა აგულაშვილიც, რომელიც მიიჩნევს, რომ ეს არის ინსტიტუტებს შორის ჯანსაღი ურთიერთობის შედეგი და ამაში დაძაბულობის არანაირი ნიშანი არ არსებობს.
,,ყველაზე მნიშვნელოვანი ჩემთვის არის ის პასუხისმგებლობა, რომელიც აქვს მთავრობას ქვეყნის მართვის კუთხით. შექმნილ ვითარებაში, როდესაც ჩვენ ყველას გვაწუხებს ლარის კურსთან დაკავშირებით წუხილები, მე ვისურვებდი, რომ მთავრობას ჰქონდა შესაძლებლობა სრული მასშტაბით, სწრაფად შედგომოდა მუშაობას, მაგრამ როგორც ჩანს, პრეზიდენტი იყენებს კონსტიტუციით მინიჭებულ უფლებას. ვისურვებდი, რომ მოქალაქეებმა ადეკვატურად შეაფასონ შექმნილი ვითარება და ნუ იფიქრებენ, რომ რაიმე დაძაბულობის ფონი არსებობს.
ვერაფერს პრობლემურს ვერ ვხედავ. კარგია, როცა ქვეყანას ჰყავს ძლიერი ინსტიტუტები და ისინი ჯანსაღ პირობებში ახერხებენ სწორი გზით წაიყვანონ ქვეყანა", _ აცხადებს აგულაშვილი.
"ნაციონალური მოძრაობის" წევრი და საპარლამენტო უმცირესობის ლიდერი დავით ბაქრაძე მიიჩნევს, რომ არაფორმალური მართვის დასრულება და მთავრობის სრული ფორმირება უნდა მოხდეს.
"არსებული მართვის სტილმა წარმოდგენილმა კანდიდატმა, მთავრობის უნიათობამ, საზოგადოება და ქვეყანა ფინანსურ, ეკონომიკურ და პოლიტიკურ კრიზისში შეიყვანა. პარლამენტში წარმოდგენილი კაბინეტი არის იგივეს განმეორება, რაც აქამდე იყო და რამაც ქვეყანა ეკონომიკური კრიზისში შეიყვანა და არასტაბილურობის განცდა შექმნა. ვიზიარებთ გიორგი მარგველაშვილის პოზიციას, უფრო მეტიც ველით პრეზიდენტისგან, რომ ეს ერთი კვირა დროის გაწელვა არ იქნება და ის რეალურ ნაბიჯებს გადადგამს, რომ საზოგადოებამ და ქვეყანამ რეალური ცვლილებები მიიღოს. მზად ვართ ამ პროცესში ჩავებათ. ვითხოვთ პრეზიდენტთან შეხვედრას. მთავარია, რომ მივიღოთ ამ 7 დღეში რეალური შედეგი. ჩვენ ოპოზიციურ პოლიტიკურ პარტიას მიგვაჩნია, რომ უნდა მოხდეს არაფორმალური მართვის დასრულება და მთავრობის სრული ფორმირება. ჩვენ მზად ვართ ამ პროცესში ჩავერთოთ", _ განაცხადა ბაქრაძემ.
რა გადაწყვეტილებას მიიღებს პრემიერ მინისტრობის კანდიდატი ირაკლი ღარიბაშვილი და გაითვალისწინებს თუ არა ის პრეზიდენტის რჩევებს, ამის შესახებ ერთ კვირაში გახდება ცნობილი.
