სამმატჩიანმა წაგებათა სერიამ ლანჩხუთის "გურიას" სატურნირო სიტუაცია ცოტათი გაურთულა და დღევანდელ მეტოქესთან სხვაობა 3 ქულამდე დაუყვანა. ამან და მოჭარბებულმა მოტივაციამ, გიგლა იმნაძის გუნდს სტიმული მოუმატა და ზუგდიდურ კლუბს ლანჩხუთში სტუმრობა ძვირად დაუჯდა.
5 უპასუხო გოლი იხილა მაყურებელმა და ერთმანეთზე უკეთესი საცქერი. განსაკუთრებით პირველი ტაიმის ორ გოლზე ითქმის ეს და გადაჭარბებული ამაში არაფერია. პირველი გოლი სწრაფიც გამოდგა. მერვე წუთი იყო, შალამბერიძემ მარცხნიდან რომ შეუტია , მცველს დაუსხლტა, ოდნავ შუაგულისკენ დაიძრა და საჯარიმოს კიდიდან შორეულ კუთხეში მოჭრილი დარტყმით ეფექტურად გაიტანა.
ათიოდ წუთში უფრო ლამაზი გოლი გავიდა. ბენაშვილმა მეტოქის პასი ჩაჭრა, ბურთი წინ გაიგდო და დაახლოებით 25 მეტრიდან უცნაური ტრაექტორიით კარში გაუშვა და შორეულ ძელთან ბადეში გაახვია. ეს იმდენად მოულოდნელი იყო სტუმართა მეკარე გაოგნებული დარჩა.
"ზუგდიდის" კარს გურულთა ყოფილი მეკარე ბობღიაშვილი იცავდა და მისი კლასი ამ შეხვედრაში გაფერმკთალებული დარჩა. მეორე ტაიმში კიდევ სამჯერ მოუწია მას დამწუხრება და კიდევ გაუმართლა, მეტჯერ რომ არა. იმდენად დიდი ჩანდა მასპინძელთა უპირატესობა, ერთი შეხედვით საკვირველიც იყო. შემადგენლობაში დაბრუნებულ ქებიძეს საქმე ფაქტობრივად არ ქონია და ამ შეხვედრაში მის სათამაშო ფორმას, რეალურად ვერც შეაფასებდა კაცი.
მეორე ტაიმის დასაწყისში ინტრიგა საბოლოოდ ჩააცხრო ისიანმა, რომელსაც მანამდე ბევრი არაფერი შეუქმნია, მაგრამ ამ ეპიზოდში საჯარიმოს მისადგომებიდან აუღებელი ბურთი გაიტანა. ის მალე დუბლსაც გამორჩა, როცა ბენაშვილის დაწყებულ და მარჯვნიდან ჭეიშვილის გაგრძელებულ იერიშს, საჯარიმოში დაუხვდა და ცარიელ კარში ბურთი უპრობლემოდ შეაგორა.
მატჩს წერტილი ერეკლე კილაძემ დაუსვა. ცენტრალურმა მცველმა ბურთი მეკარის ბაქანთან მოიგდო და გოლი თავის გარდაცვლილ ძმას – ნიკას მიუძღვნა. დარჩენილ წუთებში კიდევ იყო გატანის შანსი, მაგრამ სტუმრები უფრო სამარცხვინო მარცხს გადაურჩნენ, თუმცა, 0:5-იც ფრიად მწუთხე გამოდგა მათთვის.
გიგლა იმნაძემ გუნდი ასეთი შემადგენლობით ათამაშა: ქებიძე, ჭეიშვილი, კილაძე, გოგიაშვილი (რეხვიაშვილი 46), მჭედლიშვილი, ზაზულია, ბენაშვილი, მოსიაშვილი, კოშკაძე (მათიაშვილი 78), შალამბერიძე, ისიანი.
