(გურია ნიუსი, ლანჩხუთი) _ ჩვენი წყაროს ინფორმაციით, ლანჩხუთის “გურია” უმაღლეს ლიგაში მოსახვედრად იბრძოლებს. პირველ ეტაპზე კლუბს ფინანსურ უზრუნველყოფას კვლავაც ადგილობრივი ბიუჯეტი გაუწევს, საამისო ხარჯები 2012 წლის ლანჩხუთის საფინანსო დოკუმენტში უკვე შეტანილია. როგორც ცნობილია, პრეზიდენტმა მიხეილ სააკაშვილმა მომავალი წელი გურიის რეგიონის აღორძინების წლად გამოაცხადა და ლანჩხუთისთვის ერთ-ერთ პრიორიტეტად სწორედ კლუბის უმაღლეს ლიგაში გადასვლა მიიჩნევა.
ლანჩხუთელებმა საუმაღლესლიგო პლეი-ოფში თამაში პირველი ლიგის გათამაშების დასრულებამდე 2 ტურით ადრე გაინაღდეს. რა თქმა უნდა, პლეი-ოფში იგივე შემადგენლობით მიზნის მიღწევა რთულია, მით უმეტეს, სეზონის ბოლოსკენ წარუმატებელი რამდენიმე მატჩის გამო, რამდენიმე წამყვანი მობურთალი დაითხოვეს, ხოლო წლის ბოლოს ყველა მოთამაშესა და სამწვრთნელო შტაბს ხელშეკრულების ვადა გაუვიდა, ამიტომაც გურულებს, ფაქტობრივად, ახალი გუნდის ჩამოყალიბება მოუწევთ.
ამჟამად კლუბის მთავარი მწვრთნელის, გიგლა იმნაძის განკარგულებაში მხოლოდ ადგილობრივი ახალგაზრდები არიან. ჯერ არ ახმაურებენ იმ მობურთალთა ვინაობას, რომელთა დამატებასაც გეგმავენ. როგორც გიგლა იმნაძემ გვითხრა, “გურია” 5 იანვრიდან ჯერ ადგილზე შეიკრიბება და შემდეგ უკვე საწვრთნელ შეკრებაზე გადავა. კლუბი, სავარაუდოდ, გრიგოლეთში საკუთარ ბაზაზე მოემზადება, თუმცა არ არის გამორიცხული, “გურიამ” თავისი არსებობის მანძილზე პირველი უცხოური შეკრება მოაწყოს და თუ ეს მოხერხა, სავარაუდოდ, კლუბმა ანტალიას მიაშუროს.
