ქალაქ ოზურგეთის მერია, "დემოკრატიული მოძრაობის" განცხადებას ეხმაურება, სადაც აღნიშნული იყო, რომ ოზურგეთის მერის მიერ ფოლკლორული ანსამბლების – "იადონისა" და "ელესა"-სთვის დაფინანსების შეწყვეტა მიუღებელი და დასაგმობი იყო.
როგორც უწყებაში აღნიშნავენ, ანსამბლის მუდმივი დაფინანსებიდან მოხსნის თემას გარკვეული ჯგუფები პოლიტიკური ინტერესებისთვის იყენებენ
"საზოგადოების მაღალი ინტერესიდან გამომდინარე, გადავწყვიტეთ, რამდენიმე განმარტება გავაკეთოთ ა.ა.ი.პ.-ების "ოზურგეთის კულტურის ცენტრისა" და "ოზურგეთის მოსწავლე-ახალგაზრდობის სახლის" რეორგანიზაციისა და რამდენიმე ანსამბლის მუდმივი დაფინანსებიდან მოხსნის შესახებ. აღნიშნული ანსამბლების თემა სხვადასხვა მიზნით აიტაცეს კონკრეტულმა პოლიტიკურმა ჯგუფებმა, მედია-საშუალებებმა და გარკვეულმა ადამიანებმა. აქტიურად მიმდინარეობს ამ თემის უტრირება, დამახინჯებული ინტერპრეტაცია და პოლიტიკური მიზნით გამოყენება.
სამწუხაროა, რომ თავად აღნიშნული ანსამბლების წევრებსაც ემოციების ფონზე გაუჭირდათ იმის გაცნობიერება, რომ მათი უკმაყოფილება "ჩასაფრებულმა" ადამიანებმა ისევ და ისევ ქალაქის ხელისუფლების მიმართ წესებისა და მორალის გარეშე ბრძოლაში გამოიყენეს. გვერწმუნეთ, არცერთ მხარეზე ნაკლებად არ გვაინტერესებს ფოლკლორის მოღვაწეების ბედი და არც მათი შემოქმედებითი ცხოვრებისადმი გულგრილ მოპყრობას ვაპირებთ.
ოზურგეთი ფოლკლორის ქალაქია და ხელისუფლება ფოლკლორის სფეროს მოღვაწეებს ყოველთვის დააფასებს. ამის ერთ-ერთი დასტურია ის ფაქტიც, რომ ქალაქის მერიამ ფოლკლორის ცენტრს უსასყიდლოდ გადასცა შენობა ქალაქის ცენტრში და 37 000 ლარითაც დაეხმარა. ასე გაგრძელდება მომავალშიც.
პირველ რიგში უნდა ითქვას, რომ ქალაქ ოზურგეთის მუნიციპალიტეტის ბიუჯეტისთვის შეუძლებელია 12 ანსამბლის ფინანსური უზრუნველყოფა, შესაბამისად, გადავწყვიტეთ, მუდმივ დაფინანსებაზე ამ ეტაპისთვის მხოლოდ ექვსი ანსამბლი დაგვეტოვებინა. ეს სრულიად არ ნიშნავს იმას, რომ ჩვენ დანარჩენი ანსამბლების რამე ფორმით წინააღმდეგნი ვართ. პირიქით, შესაძლებლობების მიხედვით, ყოველთვის ვიდგებით მათ გვერდით და ჩავრთავთ კულტურულ ღონისძიებებში, რისთვისაც ისინი შესაბამის ჰონორარსაც მიიღებენ. რაც შეეხება უკვე გაერთიანებულ ა.ა.ი.პ.-ს თანამშრომლებს, მათ სახელფასო სარგო 24%-ით გაეზარდათ. რეორგანიზაციის და ბიუჯეტის ხარჯზე გაბერილი შტატების შემცირების შედეგად გამოთავისუფლდა 80 000 ლარი, რომელიც, დაგვეთანხმებით, საკმაოდ დიდი თანხაა და ერთობ წაადგება ჩვენს ქალაქს. გამოთავისუფლებული თანხა მიზნობრივად დაიხარჯება ოზურგეთის საჭიროებებისთვის."
