ქალაქ ოზურგეთის მუნიციპალიტეტის საკრებულოს სამანდატო, საპროცედურო, იურიდიულ საკითხთა და ეთიკის კომისიის თავმჯდომარედ ირინა საჯაია ორშაბათს აირჩიეს.
მის არჩევას სკანდალების გარეშე არ ჩაუვლია_ "პოლიტიკური გვამი", "მძორი", "უზრდელი", "თავხედი" _ ამ და სხვა მსგავსი "ეპითეტებით" ამკობდნენ ერთმანეთს საჯაია და კომისიის ყოფილი თავმჯდომარე გოჩა ძიმისტარაშვილი საკრებულოს სხდომაზე.
დაპირისპირება გამოიწვია საკრებულოს 9 წევრის გადაწყვეტილებამ _ გადაეყენებინათ ძიმისტარაშვილი და აერჩიათ საჯაია.
საჯაიას ირგვლივ ხმაური ჯერ კიდევ მიმდინარე წლის 20 თებერვალს დაიწყო. მაშინ ქალაქ ოზურგეთის მერმა ბეგლარ სიორიძემ საკრებულოს წევრებს მიმართა ინიციატივით, რომ მიეცათ შესაძლებლობა ყოფილი ძველი ბაზრის ტერიტორიაზე, 160 კვ მიწის ნაკვეთის 35-წლიანი იჯარით პირდაპირი წესით გადაეცა ბიზნესმენ გოჩა სალუქვაძისთვის (სალუქვაძემ "გურია ნიუსისთვის" მიცემულ ინტერვიუში აღნიშნა, რომ ბიზნესმენი არ იყო და ფული არ ჰქონდა).
მაშინ დეპუტატებმა ამ ინიციატივას მხარი არ დაუჭირეს. მათ შორის იყო ირინა საჯაიაც, რომელმაც გადაწყვეტილება 2 მარტს შეცვალა და მერის ინიციატივას, რომელიც სიორიძემ ხელახლა შეიტანა საკრებულოში, მხარი დაუჭირა.
ამ გადაწყვეტილების გახმაურების შემდეგ ითქვა, რომ საჯაიაზე ზეწოლა გახორციელდა, მაგრამ ადრესატმა ეს უარყო და აღნიშნა, რომ გადაწყვეტილება დამოუკიდებლად მიიღო.
თუმცა, 3 მარტს, "ნაციონალურმა მოძრაობამ" სპეციალურ ბრიფინგზე საზოგადოებას ამცნო, რომ საჯაიამ საკრებულოს მანდატი სწორედ ამ გადაწყვეტილების გამო დათმო. მიუხედავად ამისა, 4 მარტს გაირკვა, რომ ირინა საჯაიამ პოზიცია შეიცვალა და საკრებულოში რჩება. მან საკრებულოს მანდატი კი არა, "ნაციონალური მოძრაობა" დატოვა.
პარტიაში საჯაიას გადაწყვეტილება კვლავ ზეწოლად შეაფასეს და ეს ყველაფერი ბეგლარ სიორიძეს დაუკავშირეს. სიორიძემ საჯაიას გადაწყვეტილება დადებითად შეაფასა და აღნიშნა, რომ "საჯაია კარგი პიროვნებაა": _ რა ზეწოლაზეა საუბარი?! უკვე სასაცილოა ეს ყველაფერი. ადამიანს, იმის გამო, რომ მხარი დაუჭირა თავისი ქალაქის საკეთილდღეო საკითხს და ამისთვის აირჩიეს ზუსტად ოზურგეთის საკრებულოში, გამოუტანეს უმკაცრესი განაჩენი _ ატოვებინებდნენ საკრებულოს. მან არ გადადგა ეს ნაბიჯი და ძალიან სწორი გადაწყვეტილება მიიღო, რადგან მისი მოვალეობაა დაიცვას თავისი ქალაქის ინტერესები, რაც არის ქალაქისთვის კარგი და მისაღები იმას მხარი დაუჭიროს და რაც საზიანოა, იმას არ დაუჭიროს, _ აღნიშნა სიორიძემ.
ამ პერიოდში აქტუალურ კითხვებზე ირინა საჯაიამ "კვირის თემას" ექსკლუზიურად უპასუხა:
_ პირველ სხდომაზე, როცა საკითხი შემოიტანეს, იგი აბსოლუტურად მოუმზადებელი იყო და ამიტომ არ დავუჭირე მხარი. თუმცა, შემდეგ მე თვითონაც მომიხდა ბაზრის უკანა ტერიტორიაზე შესვლა და ვიცი, იქ რა ხდება. მე ოზურგეთელი ვარ და ძალიან მტკივა, რაც ამ ქალაქში ხდება. აგრარულ ბაზარში, რომელიც ყოველთვის მოუწესრიგებელი იყო, თუ ინვესტორი შემოდის და მერი ითხოვს თანხმობას საკრებულოსგან, კეთდება კარგი საქმე, მე ჩავთვალე, რომ მხარი უნდა დავუჭირო. მით უმეტეს, რომ ყველაფერი დათვლილია და 60 000 ლარი შემოვა ყოველწლიურად ქალაქის ბიუჯეტში. ეს იყო ჩემი პირადი გადაწყვეტილება და არანაირ ზეწოლას ადგილი არ ჰქონია. ისეთი პოლიტიზირებული სახე მიიღო ამან, რომ ჩემთვის ყოვლად გაუგებარია, _ აღნიშნა საჯაიამ.
მისი განმარტებით, ე. წ. ინვესტორის _ გოჩა სალუქვაძის შესახებ ინფორმაცია მისი მეგობრებიდან გაიგო და იცის, რომ ის წარმატებული ბიზნესმენია.
კითხვაზე, რამდენად სწორი იყო ინფორმაცია, რომ გადაწყვეტილების შეცვლაში (დეპუტატის მანდატზე უარის თქმა და შემდეგ განცხადების უკან წაღება) 10 000 დოლარი აიღო, ასე უპასუხა:
_ სასაცილოა ეგ ყველაფერი. რა უბედურებაა, რა შუაშია ეგ?! ეტყობა, ოზურგეთში გიჟდებიან "მონაჩმახებზე", _ გვითხრა საჯაიამ და დასძინა, რომ ის "ქართულ ოცნებას" არ შეუერთდება.
ამ ინტერვიუდან თვენახევრის შემდეგ, საჯაია სამანდატო, საპროცედურო, იურიდიულ საკითხთა და ეთიკის კომისიის თავმჯდომარედ აირჩიეს ძიმისტარაშვილის მაგივრად, რის შემდეგაც გაკეთდა განცხადებები, რომ ეს იყო ხარკი, რომელიც ირინა საჯაიამ გადაწყვეტილების შეცვლაში მიიღო. ითქვა ისიც, რომ "ნაციონალური მოძრაობის" აწ უკვე ყოფილ წევრს "ქართულ ოცნებასთან", უფრო სწორად კი ბეგლარ სიორიძესთან გარიგება ჯერ კიდევ წინასაარჩევნო პერიოდში ჰქონდა დადებული.
"გურია ნიუსი" მიმდინარე კვირის ყველაზე აქტუალურ კითხვებზე პასუხის მიღებას მთავარი გმირისგან _ ირინა საჯაიასგან შეეცადა:
_ ქალბატონო ირინა, ჩვენი წყაროს ინფორმაციით, ბეგლარ სიორიძესთან ჯერ კიდევ არჩევნებამდე გქონდათ გარიგება _ არჩევნების პერიოდში თქვენ იმუშავებდით "ნაცმოძრაობის" დასახმარებლად, თუმცა დაეხმარებოდით მერობის კანდიდატს ხმებისთვის ბრძოლაში. სამაგიეროდ კი დაგპირდნენ საკრებულოში თანამდებობას.
_ რა გარიგებაზე უნდა წავსულიყავი მერთან, როცა ენმ-დან მაჟორიტარობის კანდიდატი ვიყავი ქალაქის ერთ ოლქში და თავით ვიყავი გადაშვებული საარჩევნო კამპანიაში ჩემი პარტიის ინტერესებიდან გამომდინარე და არა ბეგი სიორიძის?!
_ როცა მხარი არ დაუჭირეთ მერის ინიციატივას სალუქვაძისთვის ბაზრის ტერიტორიაზე მიწის ნაკვეთის იჯარით გადაცემის თაობაზე, შემდეგ კი შეცვალეთ გადაწყვეტილება. მიშინ გავრცელდა ინფორმაცია, რომ ფული გადაგიხადეს. ჩვენს საუბარში ამ ინფორმაციას ტყუილი უწოდეთ, თუმცა, ორშაბათის მოვლენებმა ეს ეჭვები გაამყარა, ეს ყველაფერი თანამდებობის გამო გაკეთდა?
_ ფულის აღებასა და ეჭვების განმტკიცებაზე, უბრალოდ მეღიმება. რა ვამტკიცო აბსურდზე? რაც შეეხება თანამდებობას _ თუ საკრებულოში გაჩნდა ვაკანსია და ჩემი კანდიდატურა დააყენეს დეპუტატებმა, ვფიქრობ, რომ ქალაქის საკრებულოს გამოცდილი კადრი სჭირდება (ხმამაღალი ნათქვამია, მაგრამ ჩემი სახით). ყოფილ კომისიის თავმჯდომარეს იმდენი უღირსი და სამარცხვინო ქმედებები აქვს ჩადენილი, მართლაც სამარცხვინო იყო ამ პოსტზე და საერთოდ დეპუტატად მისი ყოფნა. მარტო მისი გამოხტომები რად ღირს საკრებულოს სხდომაზე…
_ არ გეუხერხულებათ თქვენს ყოფილ თანაგუნდელებთან, რომ დიდი სკანდალის შემდეგ თანამდებობაზე დაინიშნეთ, რამაც გაამყარა ეჭვები, რომ "ქართულ ოცნებასთან" შეთანხმებულად მოქმედებდით?
_ საუხერხულო იქნებ ჩემს ზოგიერთ თანაგუნდელს ჰქონდეს ჩემს მიმართ. მოვა ამის დრო და მერე ვისაუბროთ.
_ ახლა, დამოუკიდებელი დეპუტატის თვალით რა პრობლემებს ხედავთ თქვენს ქალაქში?
_ პრობლემების მეტი რაა?! როგორც ბიუროს წევრს, ახლა უფრო მექნება შესაძლებლობა, მეტი ინფორმაციაც მქონდეს და მათი გადაჭრის გზებიც გამოინახოს.
_ ბოლო დროს თქვენი კოლეგები ქალაქის მერს ბევრ ბრალდებას უყენებენ…
_ ჩემი ზოგიერთი კოლეგა ჩემს მიმართაც ავრცელებს ცრუ ბრალდებებს. ოპოზიცია იმიტომ არ უნდა არსებობდეს, საყვირალი თუ არაა, ყველაფერზე იყვირონ. თუ დავინახავ მერის ან სულერთია ვინც იქნება, არაკანონიერ და შეუფერებელ ქმედებას, მექნება ობიექტური შეფასება.
სამანდატო, საპროცედურო, იურიდიულ საკითხთა და ეთიკის კომისიის ყოფილი თავმჯდომარე გოჩა ძიმისტარაშვილი ამბობს, რომ საჯაიამ ეს ყველაფერი ფულის გულისთვის გააკეთა:
_ პირველ რიგში, გეტყვით, რომ სახეზეა ჩემი პოლიტიკური დევნა. ძალიან მოკლე დროში გააკეთეს ეს ყველაფერი. რაც შეეხება საჯაიას, ამ მოქმედებით დადასტურდა, რომ ის მოსყიდულია
_ საჯაია ამბობს, რომ თქვენ ბევრი უღირსი და სამარცხვინო ქმედებები გაქვთ ჩადენილი და დეპუტატობასაც კი არ იმსახურებთ…
_ მე რა ჩავიდინე და რა არა, ხალხმა კარგად იცის. მთელი ცხოვრება სიმართლისთვის ვიბრძოდი და ასე იქნება ყოველთვის. ეს ქალბატონი კი ფულისთვის იბრძვის. ქალბატონ ირინას სულ არ ადარდებს, ხალხი რას იფიქრებს მასზე _ მისი ქცევით მან დაამტკიცა, რომ მოსყიდულია, _ გვითხრა ძიმისტარაშვილმა.
