7 მაისს იუსტიციის მინისტრი პარლამენტის ოთხი კომიტეტის გაერთიანებულ სხდომაზე სიტყვით წარდგა. თეა წულუკიანმა იურიდიული, ადამიანის უფლებათა, თავდაცვისა და საპროცედურო კომიტეტების წევრებს სამინისტროს მიერ განხორციელებულ და უწყებაში დაგეგმილ რეფორმებზე მიაწოდა ინფორმაცია. მინისტრმა განსაკუთრებული ყურადღება დაუთმო ევროკავშირთან ასოცირების პროცესს, სისხლის სამართლის მართლმსაჯულების გაძლიერებასა და ამ სფეროს დეპოლიტიზაციისთვის გატარებულ რეფორმებს.
იუსტიციის მინისტრის თქმით, რეფორმების შედეგად მოსამართლე დღეს უფრო თავისუფალია, ვიდრე ოდესმე ყოფილა.
„უზენაესი სასამართლოს ყოფილმა თავმჯდომარემ თავად ბრძანა, რომ ის, ჩვენი ხელისუფლებაში მოსვლის შემდეგ, იყო ყველაზე თავისუფალი. ეს შემთხვევით არ მომხდარა. ეს იმ რეფორმების დამსახურება იყო, რომლებიც ჩვენ, აღმასრულებელმა ხელისუფლებამ, თქვენთან ერთად ჩავატარეთ“, − აღნიშნა თეა წულუკიანმა.
იუსტიციის მინისტრმა იუსტიციის უმაღლესი საბჭოს დეპოლიტიზაციის შესახებაც ისაუბრა.
„იუსტიციის უმაღლესი საბჭოს დეპოლიტიზაცია განხორციელდა და გარდაიქმნა დისციპლინური პროცედურები, ამჟამად კი მიმდინარეობს უპრეცედენტო თანამშრომლობა უზენაესი სასამართლოს ახალ თავმჯდომარესთან საკანონმდებლო დარგში იმისათვის, რომ ის რეფორმები, რაც ჩვენ შევიმუშავეთ, პრაქტიკაში იყოს უფრო უკეთესად დანერგილი და ამან მოიტანოს ხელშესახები შედეგი ჩვენი მოქალაქეებისთვის − ვგულისხმობ დისციპლინურ პროცედურას და მის ეფექტიანობას“, − განაცხადა თეა წულუკიანმა.
მინისტრმა საკანონმდებლო რეფორმების შესახებაც ისაუბრა. მისი თქმით, ცვლილებები სისხლის სამართლის საპროცესო კოდექსში დაზარალებულების მეტ უფლებებს უზრუნველყოფს.
„დღეს ეს რეფორმა არის ძალაში და გვაქვს ის საკანონმდებლო ბაზა, რომელიც გამორიცხავს ადამიანის უფლებათა ევროპულ სასამართლოში საქართველოდან საჩივრების შედინებას“, − აღნიშნა მინისტრმა.
თეა წულუკიანმა დაგეგმილ რეფორმებზეც ისაუბრა და ხაზი გაუსვა, რომ წელს იუსტიციის სამინისტრო პარლამენტს მართლმსაჯულების სფეროში ახალ რეფორმებს შესთავაზებს, რომლებიც მოსამართლის ინსტიტუტის გაძლიერებას ისახავს მიზნად.
საუბრისას ყურადღება გამახვილდა არასრულწლოვანთა მართლმსაჯულების კოდექსზე. მინისტრმა აღნიშნა, რომ სხვა ქვეყნების საუკეთესო გამოცდილებისა და პრაქტიკის გაზიარების მიზნით იუსტიციის სამინისტრო თანამშრომლობს ევროკავშირის სხვადასხვა სტრუქტურასთან და ჩეხეთის იუსტიციის სამინისტროსთან.
თეა წულუკიანმა პროკურატურის რეფორმაზე საუბრისას აღნიშნა, რომ მალე წარმოდგენილი იქნება მთავრობის მიერ დამტკიცებული ახალი მოდელი. „რეფორმის ფარგლებში შეიქმნება საპროკურორო საბჭო, სადაც მონაწილეობას მიიღებს პროკურატურა და, რაც მნიშვნელოვანია, პროკურორის არჩევნებში ჩართული იქნება სამოქალაქო საზოგადოება და საბოლოოდ მთავარ პროკურორს პარლამენტი აირჩევს“, − განაცხადა მინისტრმა.
სიტყვით გამოსვლისას აღინიშნა, რომ იუსტიციის სამინისტრო ინფორმაციის თავისუფლების აქტზე მუშაობს. „უპრეცედენტო რეფორმები ჩატარდა და ჩვენი მთავრობის პირობებში საქართველო აღიარებულ იქნა როგორც ერთ-ერთი მაგალითი გამჭვირვალობისა, მაგალითი იმისა, თუ როგორ შეიძლება კარგი მმართველობა არსებობდეს ქვეყანაში, და ამისი გამოძახილი იყო, როდესაც შარშან, აგვისტოში, საქართველო აირჩიეს ღია მმართველობის პარტნიორობის მმართველი კომიტეტის წევრად. ეს თანამშრომლობა აქტიურად მიმდინარეობს და მიზნად ისახავს რამდენიმე ძალიან მნიშვნელოვან საკითხს. ეს არის, პირველ რიგში, სახელმწიფო სერვისების ხელმისაწვდომობა სოფლად. ეს ვაქციეთ ჩვენ პრიორიტეტად და ეს გაგრძელდება. გაიხსნა 21-ე საზოგადოებრივი ცენტრი, გავაგრძელებთ ამგვარი სახლების გახსნას, რომლებიც კერძო და საჯარო სერვისებს ხელმისაწვდომს გახდის იმ სოფლებში, სადაც 2000-ზე მეტი ადამიანი ცხოვრობს“, − განაცხადა თეა წულუკიანმა.
მინისტრმა იუსტიციის სახლების განვითარებაზე საუბრისას აღნიშნა, რომ თბილისისა და გურჯაანის იუსტიციის სახლებს დღეს ინფრასტრუქტურულად აქვთ ნაკლები პრობლემა, ვიდრე ჰქონდათ. იუსტიციის მინისტრის განმარტებით, ხელისუფლება მოიძიებს სამ მილიონ-ნახევარ ლარს, რომლითაც მთლიანად აღმოფხვრის იუსტიციის სახლების მშენებლობისას წინა ხელისუფლების დროს დაშვებულ ხარვეზებს.
გამოსვლის დასასრულ, თეა წულუკიანმა აღნიშნა, რომ იუსტიციის სამინისტრო აგრძელებს მუშაობას საარჩევნო სიებზე. მინისტრის თქმით, ამისთვის საჭიროა პარლამენტის მხარდაჭერა და მოქალაქეების აქტიურობა.
„მომავალ საპარლამენტო არჩევნებზე საქართველოს ექნება ერთ-ერთი ყველაზე დაზუსტებული და სანდო საარჩევნო სია. მოქალაქეებმა უნდა მიიღონ მონაწილეობა ყველა აქციაში, აიღონ ელექტრონული პირადობის მოწმობა“, − განაცხადა თეა წულუკიანმა.
