ათიოდე დღეა, რაც ოზურგეთის პოლიციის სამმართველოს უფროსი, გია ურიდია დაკავებული თანამდებობიდან გადააყენეს და სამხარეო სამმართველოში, დეტექტივის თანამდებობაზე გადაიყვანეს.
გურიის სამხარეო პოლიციის სამმართველოს უფროსი გიგა ჯაფარიძე ჩვენთან საუბრისას ამბობს, რომ მას ამ თემაზე პრესასთან საუბარი არ შეუძლია:
_ ბატონო გიგა, რა გახდა ოზურგეთის პოლიციის სამმართველოს უფროსის გათავისუფლების მიზეზი?
_ თქვენ რაში გაინტერესებთ?
_ ფიქრობთ, რომ ეს თემა პრესას არ უნდა აინტერესებდეს?
_ პრესამსახურს მიმართეთ და გეტყვით.
_ თქვენი პრესსამსახურის ხელმძღვანელი მუდმივად არ პასუხობს ჩვენს ზარებს.
_ ალბათ, იმ დროს ურეკავთ, როცა არ სცალია. მე როცა ვურეკავ, სულ მპასუხობს.
_ თქვენ რომ გპასუხობთ, ამაში დარწმუნებული ვართ, როგორც იმაში, რომ თავის მოვალეობას არ ასრულებს და პრესასთან ყველაზე ნაკლებად ურთიერთობს.
_ რა ვქნა? მე არ მაქვს თქვენს შეკითხვაზე პასუხის გაცემის უფლება.
როგორც გავარკვიეთ, საქმე ჩოხატაურის მუნიციპალიტეტის სოფელ ქვენობანში, გია ურიდიას საცხოვრებელი სახლის უკან მდებარე, მის და მამამისის, თამაზ ურიდიას საკუთრებაში არსებულ რამდენიმე ჰექტარ მიწას ეხება.
_ ერთადერთი, რაც ამ მიწებთან დაკავშირებით შეიძლება სადავო იყოს, ისაა, რომ საჯარო რეესტრში არ არის დარეგისტრირებული. მე ის კაცი არ ვარ, რაიმე უკანონოდ გავაკეთო და ამით ჩემი და ჩემი ოჯახის წევრების რეპუტაციას საფრთხე შევუქმნა, _ აღნიშნა ჩვენთან საუბრისას თამაზ ურიდიამ.
წყაროს ინფორმაციით, ურიდიას ბრალად დასდეს, რომ მიწების დამტკიცებისას კომისია შეცდომაში შეიყვანა, თუმცა როგორც მიწის ლეგალიზაციის კომისიის წევრები იხსენებენ, მიწები ყველა წესის დაცვით, კომისიაზე გავლით და შესაბამისი დოკუმენტაციის წარდგენის შემდეგ დაუკანონდათ ურიდიებს. თუკი ჩვენი წყაროს ინფორმაცია მართალია, მაშინ პასუხი კომისიის წევრებსაც უნდა მოსთხოვონ.
გია ურიდია ამ საკითხზე კომენტარს არ აკეთებს. თამაზ ურიდია კი არ გამორიცხავს, რომ ეს თემა, შესაძლოა, ოზურგეთის პოლიციის სამმართველოს უფროსის მოსაცილებლად გამოიყენეს. ჩვენი წყარო კი ამბობს, რომ ურიდია დიდ პოლიტიკას შეეწირა.
აღსანიშნავია ისიც, რომ ზემოთ აღნიშნული მიწის ნაკვეთი გია ურიდიას ქონებრივ დეკლარაციაშიც აქვს შეტანილი.
არსებობს ინფორმაცია, რომ გურიაში მიწებთან დაკავშირებული ახალი სკანდალი ღვივდება. ჩვენს ხელთ არსებული ინფორმაციით, ჩოხატაურის მუნიციპალიტეტის საკრებულოდან გამოძიებამ უკვე წაიღო მიწებთან დაკავშირებული ყველა სახის დოკუმენტაცია.
