სატურნირო სიტუაციითაც მეზობლების მატჩი დაძაბული გამოდგა. პირველმა ტაიმმა „გურიას“ უპირატესობით ჩაიარა და ეს ანგარიშშიც ნათლად აისახა _ ჯერ ისიანმა გამოიჩინა გოლის ალღო და ანგარიში ახლო მანძილიდან გახსნა, ტაიმის ბოლოსკენ კი უკრაინელმა ზაზულიამ თავით ივარგა, მასპინძლები 2:0 დააწინაურა და სადებიუტო გოლიც აღნიშნა.
თითქოს ინტრიგა ცოტა იყო, მაგრამ სამტრედიელები ასე არ ფიქრობდნენ, რომლებიც გამოფხიზლდნენ და მეორე ტაიმი რიხიანად დაიწყეს. აკი შედეგიც მალე მოიმკეს _ შეცვლაზე შემოსული გეწაძის ფლანგიდან ჩაწოდებულ ბურთს ზაზულია ჩაუწვა და საკუთარ კარში მიუჩინა ადგილი. ამ გოლმა სიტუაცია დაძაბა და თამაშიც საინტერესო გახადა. მომენტებიც მრავლად იყო, განსაკუთრებით გამორჩეული შანსი მასპინძელთაგან ინგოროყვას და ჭეიშვილს ებოძათ, ხოლო სტუმართაგან კაპანაძემ ორი ისეთი შანსი გაანიავა, საკვირველიც იყო. და მაინც, გასატანი ბოლო წუთზე „გურიამ“ გაიტანა. შეცვლაზე შესულმა კიდევ ერთმა უკრაინელმა შეველმა, ძელის დახმარებით მოახერხა გატანა და თამაშს საბოლოო წერტილი დაუსვა _ 3:1.
აღსანიშნავია, რომ გიგლა იმნაძემ შესუსტებული შემადგენლობით შეძლო ზედიზედ მეორედ მოგება. ორი ლიდერი _ კილაძე და შალამბერიძე დისკვალიფიკაციის გამო ტოვებდა ამ მატჩს, ხოლო კიდევ ერთი _ ცენტრალური მცველი ცინცაძე, მესამე თამაშია ტრავმირებულია. ფეხმტკივანმა ითამაშა გოგიაშვილმაც, რომელიც ბოლოს შესაცვლელიც შეიქნა. ამის მიუხედავად გუნდმა ზედმიწევნით შეასრულა მწვრთნელის დავალებები და ღირსეულადაც იმარჯვა.
ძნელია ვინმეს გამორჩევა, მაგრამ მაინც კოშკაძის გარჯას გამოვყოფდით _ ის გუნდის ლიდერი იყო უდავოდ, ბევრიც იბრძოლა და რაც მთავარია, ჩვეული ორგანიზებით წარმართა შეტევები და სეზონის ყველაზე საუკეთესო შეხვედრა გამოუვიდა. რაც შეეხება მეკარე თებიძეს, მან რამდენიმე რთული ბურთი მოიგერია და ეტყობა, სასურველ სათამაშო ფორმასაც მიუახლოვდა.
ამ 3 ქულით „გურიამ“ ერთი დღით დაკარგული მეშვიდე ადგილი დაიბრუნა და ექვსეულს ორიოდე ქულა აშორებს. ამ ტურში ჩემპიონის ბედი მთლად არა, მაგრამ თითქმის გაირკვა _ ქობულეთში „ბათუმისა“ და „დინამოს“ უგოლო ფრემ, გორის „დილა“ 5 ქულით დააწინაურა და დარჩენილ სამიოდ ტურში, წარმოუდგენელია შიდაქართლელებმა ეს შანსი გაანიავონ.
ზაზულიამ იქეთაც გაიტანა და აქეთაც
