ცნობილი კომპანიის, „ერნსტ ენდ იანგის“ მიერ ჩატარებული კვლევის თანახმად, მიმდინარე წელს უცხოური კაპიტალის უშუალო მონაწილეობით ევროპაში 3 303 ახალი საინვესტიციო პროექტი გამოიკვეთა.
კვლევის მიხედვით, უკვე ზედიზედ მერვე წელია, უცხოელი ინვესტორები უპირატესობას ევროპულ სახელმწიფოებს შორის დიდ ბრიტანეთს ანიჭებენ.
გასულ წელს ამ ქვეყანამ 678 საინვესტიციო პროექტი მიიზიდა, რომელთა საშუალებითაც ქვეყანაში 20 ათასამდე ახალი სამუშაო ადგილი შეიქმნა. ექსპერტები ბრიტანეთის საინვესტიციო მიმზიდველობის სტაბილურობას მნიშვნელოვან მიღწევად მიიჩნევენ.
„ერნსტ ენდ იანგის“ მიერ ჩატარებულ კვლევაში მეორე ადგილი საფრანგეთმა დაიკავა, სადაც შარშან 529 საინვესტიციო პროექტი დარეგისტრირდა. მესამე ადგილი გერმანიას ერგო 418 პროექტით. თუმცა, როგორც ანალიტიკოსები აცხადებენ, ამ ქვეყანას დიდი პერსპექტივა აქვს და 2015 წლის შედეგებით შეიძლება საფრანგეთს გადაასწროს.
ინვესტორები ინვესტიციებისთვის მსოფლიოში ყველაზე მიმზიდველ რეგიონად დასავლეთ ევროპას მიიჩნევენ.
