გურიის ახალადანიშნულ გუბერნატორს გია სალუქვაძეს გურიაში ზეგ ელოდებიან. როგორც გვითხრეს, მისი ოფიციალური წარდგენა 17 მაისს გაიმართება. ამ დღეს გურიაში პრემიერ-მინისტრს ელოდებიან. სანამ ღარიბაშვილი ჩამოვა, სალუქვაძის წარდგენას გააკეთებს და მოგვიყვება როგორ არჩევდა 6 თვის განმავლობაში "მისთვის საყვარელი გურულებისთვის განსაკუთრებულ გუბერნატორს", მანამდე "გურია ნიუსი" ახალი გუბერნატორის გეგმებით დაინტერესდა.
ჩვენთან ექსკლუზიურ საუბარში სალუქვაძე ამბობს, რომ პირველ რიგში თანამშრომლებს და მათ საქმიანობას გაეცნობა:
_ შემდეგ გურიაში განსახორციელებელ პროექტებს. ასევე ვაპირებ გაფართოებული შეხვედრის ჩატარებას ოთხივე მუნიციპალიტეტის ხელმძღვანელობასთან და აუცილებლად შევხდები მოსახლეობას მათთვისა საჭირბოროტო საკითხების განხილვის მიზნით.
_ რატომ მოინდომეთ გურიის გუბერნატორობა?
_ გურია ჩემი ისტორიული სამშობლოა. ჩემმა წინაპრებმა თამარის ჯვარი შემოუნახეს ქვეყანას და იგი ჩემს მიერ დაბრუნებული იქნა ეკლესიის წიაღში. მე კარგად ვიცნობ გურიის პრობლემებს იქ მცხოვრებ არაჩვეულებრივ მშრომელ ხალხს და მსურს ჩემი გამოცდილება სრულად მოვახმარო ამ კუთხეს. გურულები ისე როგორც საქართველოს მთელი მოსახლეობა იმსახურებს უკეთეს პირობებში ცხოვრობას. ვეცდები მოვიზიდო სახსრები რათა განვითარდეს გურიისათვის ადაპტირებული ტრადიციული დარგები.
_ მოადგილეები თუ გყავთ შერჩეული? უკვე დასახელდა ერთ-ერთი _ სოსო ერქომაიშვილი…
_ ჯერ ნაადრევია ამ თემაზე მსჯელობა. გავეცნობი თანამშრომლებს და გადაწყვეტილებას მოგვიანებით მივიღებ.
_ დავიჯეროთ თქვენი გუნდის, საახლობლოს წევრი არ იქნება თქვენი მოადგილე? ასე იყო ტრადიციულად… თუმცა, ტრადიცია თქვენმა წინამორბედმა დააღვია…
_ გადაწყვეტილებას მივიღებ მოგვიანებით.
_ ტრადიციული არც ვუარყოფ არც ვადასტურებ… საკადრო ცვლილებებს ხომ არ აპირებთ?
_ ახლა, აქედან, როცა ჯერ არ ვიცნობ თანამშრომლებს არასერიოზული იქნება ჩემგან ამ თემაზე საუბარი. ერთ რამეს კი გპირდებით _ ღია ვიქნები მედიასთან და ერთად შევეცადოთ ჩვენი ლამაზი კუთხის აღორძინება.
_ თქვენს სახელს უკავშირება ბოლო დროის ერთ-ერთი ყველაზე დიდი სკანდალი _ სააკაშვილზე მომზადებული ფილმის ჩვენება ბავშვებისთვის. ამ თემაზე ბევრი კომენტარი მოვისმინეთ და აღარ ჩაგეძიებით… ჩვენ სხვა რამ გავინტერესებს _ რატომ გაგიჩნდათ ფილმის გადაღების იდეა, ვინ დააფინანსა და აპირებთ თუ არა, რომ ფილმის ჩვენება გურიაშიც მოაწყოთ?
_ ფილმი არის მედიით გასული სიუჟეტების კრებული რომელიც სხვადასხვა დროს გაშუქდა. ის არ შეიცავ პირადი ცხოვრების შემცველ რაიმე სახის ინფორმაციას. მისი შექმნის იდეა დაიბადა ჩვენს ორგანიზაციაში და მიზანი იყო გაგვეცნო სართაშორისო თანამეგობრობისათვის სააკაშვილის პერიოდის ქრინიკა. იგი ნაჩვენები იყო ბრიუსელში და მაშინვე დავაანონსეთ რომ ვაჩვენებდით საქართველოს მისახლეობას. რაც შეეხება ფილმის გურიაში ჩვენებას მე აღარ ვარ დღეიდან არასამთავრობო ირგანიზაციის ხელმძღვანელი და თუ მიიღებენ ასეთ გადაწყვეტილებას ჩემი მეგობრები ეს მათი გადაწყვეტილება იქნება. ფილმი გადაღებულია გოგა ხაინდრავას სტუდიაში და დაფინანსდა შემოწირულობით. ძირითადად იმ ბიზნესმენების მიერ ვინც საკუთარ თავზე გადაიტანა ქონების წართმევა-ჩამორთმევა.
ამავე თემაზე: ექსკლუზივი _ პრემიერმა გურიის გუბერნატორად გია სალუქვაძე დანიშნა
