ევროპის დღესთან დაკავშირებით, ახალქალაქს ევროკავშირის ელჩი საქართველოში, იანოშ ჰერმანი სტუმრობდა. ელჩმა ახალქალაქში სამცხე-ჯავახეთის გუბერნატორთან და ახალქალაქის გამგებელთან შეხვედრა გამართა, სადაც რეგიონის გამოწვევებსა და ევროკავშირის მხარდაჭერის შესახებ ისაუბრეს. შეხვედრისას განსაკუთრებული აქცენტი სოფლის მეურნეობის საკითხებზე გაკეთდა.
შეხვედრის დასრულების შემდეგ, ევროკავშირის ელჩმა ახალქალაქის კულტურის სახლში სოფლის მეურნეობის პროდუქციის გამოფენა დაათვალიერა და შეკრებილ ადგილობრივ მოსახლეობას სიტყვით მიმართა.
"ევროკავშირი არის პროექტი, რომელიც დაახლოებით 60 წლის წინ დაიწყო და დღემდე ვცდილობთ ეს ორგანიზაცია დემოკრატიის საფუძველი იყოს. ამაყი ვარ იმით, რასაც ევროკავშირმა მიაღწია. საქართველოსთან ვთანამშრომლობთ, რადგან ეს ამ ქვეყნის ხალხს სურს. თქვენს ქვეყანასთან გაფორმებულმა ასოცირების ხელშეკრულებამ გზა გაუხსნა საქართველოს ძალიან ბევრ სფეროში. მიუხედავად ამისა, ხელშეკრულების შედეგებს ვერ დავინახავთ, თუ თითოეულმა ადამიანმა არ იგრძნო ეს სიკეთე. ამიტომ განსაკუთრებულ ყურადღებას ვაქცევთ სოფლის მეურნეობას. უკვე გაქვთ 140 მილიონი ლარის ფინანსური მხარდაჭერა. ამ პროექტის საფუძველზე, დარწმუნებული ვარ, გაიზრდება თქვენი პროდუქციის რეალიზაციის არეალი და თქვენ შეძლებთ პროდუქტის გატანას ევროკავშირის ქვეყნებში. რაც შეეხება ვიზალიბერალიზაციას, რომელიც თქვენს ქვეყანას ძალიან აინტერესებს, გეტყვით, რომ ამის საშუალებით მოკლევადიანი პერიოდით და არა სამუშაოდ, თქვენ შეგეძლებათ ევროპაში მოგზაურობა“, _ აღნიშნა იანოშ ჰერმანმა სიტყვით გამოსვლისას და დასძინა, რომ ეს არის რეგიონებში მისი პირველი გასვლა და იგი ახალქალაქით მოხიბლული დარჩა.
ცნობისთვის, ევროკავშირის ფინანსური დახმარებით ორგანიზაცია "მერსი ქორფსი" ახალქალაქსა და ნინოწმინდაში სოფლის მეურნეობის მხარდამჭერ პროექტს ახორციელებს, რომელიც ENPARD-ის პროგრამის ნაწილია.
სწორედ ENPARD-ის პროგრამის ფარგლებში, ახალქალაქის კულტურის ცენტრში, მცირე ფერმერულმა კოოპერატივებმა მათ მიერ წარმოებული საკვები პროდუქტის გამოფენა-გაყიდვა გამართეს. კერძოდ კი, კოოპერატივების მიერ წარმოდგენილი იყო შემდეგი პროდუქტები: ყველი, თაფლი, მწვანილი და კარტოფილი.
ევროკავშირის დახმარების და რეგიონის განვითარების გეგმებზე ისაუბრა სამცხე-ჯავახეთის გუბერნატორმა, აკაკი მაჭუტაძემ, რომელმაც აღნიშნა, რომ ელჩთან მას პირისპირ შეხვედრა ჰქონდა და არის ძალიან დიდი გეგმები და იმედები კოოპერატივების წახალისებისა და ხელშეწყობის სახელმწიფოს მხრიდან, კონკრეტულად კი სოფლის მეურნეობის მხრიდან.
"ჩვენ მზად ვართ, ყველა გამოწვევას მხარი ავუბათ, გვერდით დავუდგეთ და ამით ჩვენი ქვეყანა წინ წავა", _ განაცხადა მაჭუტაძემ.
რაც შეეხება რეგიონში წარმოებულ პროდუქციას და მისი რეალიზაციას, როგორც ადგილობრივი კოოპერატივების წარმომადგენლები აცხადებენ, სახელმწიფოს მხრიდან დახმარება მნიშვნელოვანია, თუმცა ჯერ კიდევ რჩება პრობლემები, რომლის გადაჭრსაც საკუთარი ძალებით ვერ ახერხებენ.
როგორც "გურია ნიუსთან“ საუბრისას "დაბა წაღვერი – კენკრას“ კოოპერატივის წარმომადგენელმა ირმა მაღრაძემ განაცხადა, სახელმწიფოსგან მხოლოდ სეტყვის საწინააღმდეგო ბადეების შესაძენად საჭირო თანხას ითხოვენ.
"კოოპერატივი უკვე ერთი წელია გვაქვს. დაფინანსება UNDP -დან მივიღეთ. ერთი ჰექტარის ფართობზე გაშენებული გვაქვს კენკრა. მოგებითაც არ ვართ უკმაყოფილო. შარშან 20 ათასი ლარის პროდუქცია გავყიდეთ. ერთადერთი დახმარება სახელმწიფოსგან სეტყვის საწინააღმდეგო ბადეების შესაძენად გვჭირდება. ნახევარ ფასში მაინც რომ მოგვცენ, ძალიან კარგი იქნება. პროდუქციას ვერ ვიცავთ და მოსავლის დიდი ნაწილი ფუჭდება. აგროდაზღვევის პროგრამამაც შეღავათი მოგვცა და წელს უფრო მშვიდად ვართ.
ეკოლოგიურად სუფთა პროდუქტს ვაწარმოებთ, პესტიციდების გარეშე. რეალიზაციასაც საკუთარი ძალებით ვახდენთ. ივლისიდან აგვისტომდე პროდუქტს ვყიდით, ასევე კენკრის ნერგებსაც“, _ განაცხადა კოოპერატივის წარმომადგენელმა.
ახალციხის რაიონის სოფელ ტობას კოოპერატივის წარმომადგენლის განცხადებით, მათ სახელმწიფოსგან დახმარება პროდუქტის რეალიზაციისას სჭირდებათ.
"ძირითადად, ვაწარმოებთ საქონლისა და ცხვრის ყველს, რომელიც ალპურ ზონაში მზადდება. რეალიზაციით კი, თბილისში, მაღაზიებში ჩვენივე ძალებით ვაბარებთ. რეალიზატორები არ გვყავს. ყველის გარდა მსხვილფეხა საქონელსაც ვყიდით, თუმცა ბოლო პერიოდში პირუტყვის ფასი ძალიან დაეცა, რაც პრობლემებს გვიქმნის. რეალიზაციას ვერ ვახერხებთ. ჩვენი ინფორმაციით, აზერბაიჯანში არ გადის საქონელი და ეს ქმნის პრობლემას, თუ სახელმწიფო რეალიზაციაში დაგვეხმარება, ძალიან კარგი იქნება“, _ აღნიშნა "გურია ნიუსთან“ საუბრისას კოოპერატივი "ორცეფის“ თავმჯდომარე ნუგზარ ნეფარიძემ.
სასოფლო-სამეურნეო კოოპერატივების განვითარების სააგენტოს თავმჯდომარის გიორგი მიშელაძის განცხადებით, დღეის მდგომარეობით, საქართველოში 870 სასოფლო-სამეურნეო კოოპერატივია შექმნილი. მათ შორის, პირველ ადგილზე, კოოპერატივების რაოდენობით, სამცხე-ჯავახეთია, სადაც 150 კოოპერატივია, აქედან მხოლოდ ახალქალაქში უკვე 32 სასოფლო-სამეურნეო კოოპერატივია შექმნილი.
"ეს კოოპერატივები ძირითადად კარტოფილს აწარმოებენ. ასევე საქმიანობენ მესაქონლეობის მიმართულებითაც. აღსანიშნავია, რომ კოოპერატივების მიერ ერთობლივად განხორციელებული პირველი პროექტი, კარტოფილის სათესლე მასალის შემოტანა და შეძენა ჯავახეთში განხორციელდა. ეს მოხდა გაერთიანებული ძალებით და მასში ჩაბმულები იყვნენ კოოპერატივები სამცხე–ჯავახეთიდან და ქვემო ქართლიდან. პროგრამის ფარგლებში, კოოპერატივების მიერ საქართველოში 150 ტონა კარტოფილის თესლი შემოვიდა და სწორედ ამ პროექტის ფარგლებში 100 000 ლარზე მეტი შეღავათი მიიღეს ფერმერებმა და გლეხებმა, რომლებიც კოოპერატივებში იყვნენ გაერთიანებულები, მარტო იმიტომ, რომ მათ შეძლეს ერთობლივი ძალებით პირდაპირი ხელშეკრულებების გაფორმება საზღვარგარეთ კარტოფილის მწარმოებლებთან, მათ შორის არ იყო შუამავალი, რომელსაც შეეძლო გარკვეული მოგება მიეღო", _ განაცხადა მიშელაძემ.
ევროპის დღის აღსანიშნავი ღონისძიების ბოლოს, ახალქალაქის კულტურის ცენტრში საზეიმო კონცერტი მოეწყო.
ევროპის დღეები, ENPARD-ის პროგრამის ინიციატივით, საქართველოს კიდევ ოთხ ქალაქში ტარდება – მცხეთაში, ქუთაისში, ზუგდიდსა და ქობულეთში.
