თავდაცვის მინისტრის მოადგილეებად დავით ებრალიძე, ბესიკ ლოლაძე და ანა დოლიძე დაინიშნენ.
"დავით ებრალიძე ფინანსთა მინისტრის მოადგილედ მუშაობდა. მას აქვს კონტროლის პალატაში მუშაობის მრავალწლიანი გამოცდილება, შესაბამისად, ამ პროფესიული გამოცდილებიდან გამომდინარე, იგი ჩაიბარებს, ფინანსების, ლოჯისტიკის, შესყიდვების მიმართულებებს სამინისტროში", _ აღნიშნა ხიდაშელმა მოადგილის წარდგენისას.
მისივე თქმით, თავდაცვის სამინისტროს საპარლამენტო მდივანი ბესიკ ლოლაძე იქნება.
"იგი გახლდათ საკონსტიტუციო სასამართლოს წევრი, იუსტიციის მინისტრის მოადგილე. აქვს სახელმწიფო სამსახურში მუშაობის დიდი გამოცდილება", _ აღნიშნა ხიდაშელმა.
რაც შეეხება საია-ს ყოფილ თავმჯდომარეს, ანა დოლიძეს, მინისტრის თქმით, ის საერთაშორისო სამართლის დოქტორია.
"დაამთავრა კოლუმბიის უნივერსიტეტი. მისი ძირითადი მიართულება იქნება უფლებები, ყველა ის თემა რაც ქართველ ჯარისკაცებს, ჩვენს გმირებს, მათ ოჯახებს, დაჭრილ ჯარისკაცებს უკავშირდება", _ განაცხადა ხიდაშელმა.
მინისტრის თქმით, კიდევ ორი მოადგილე უნდა დაინიშნოს, მაგრამ ისინი დასავლეთში სწავლობენ და ივლისის ბოლომდე ვერ ვერ ჩამოვლენ, ამიტომ მათი წარდგენა საქართველოში დაბრუნების შემდეგ მოხდება.
