2011 წლის მიწურულს, ოზურგეთის მუნიციპალიტეტის საკრებულოში რიგგარეშე სხდომაზე გაჟღერდა, რომ ახალი წლის ღამეს, 31 დეკემბერს, ოზურგეთში ნიაზ დიასამიძე და ჯგუფი “33ა” იმღერებდა, რისთვისაც საქართველოს პრეზიდენტის ფონდიდან 45 000 ლარი გადმოირიცხა ადგილობრივ ბიუჯეტში. ნიაზ დიასამიძე არა, მაგრამ საახალწლო ღამეს ოზურგეთელებისთვის უცნობი ჯგუფი “ფემილი” ჩამოვიდა, რომლის ერთ-ერთი წევრი “კომედი შოუსა” და “ვანო ჯავახიშვილის შოუს” ერთ-ერთი სახე თამუნა ლეკვეიშვილი იყო. სანამ ანსამბლი სცენას დაიკავებდა, მანამდე მაყურებლის წინაშე ოზურგეთელი მომღერლები წარსდგნენ. რაც შეეხება ნიაზ დიასამიძეს, როგორც ჩვენთვის გახდა ცნობილი, ის ქუთაისში იმყოფებოდა და იქ გამართა კონცერტი. ოზურგეთელთა უმეტესობა, ახალი წლის ღამით გამართული კონცერტით უკმაყოფილო დარჩა, ზოგიერთი კი მხოლოდ ერთი მიზეზით _ საახალწლო ლატარიის გათამაშების გამო შემორჩა თეატრალურ მოედანს.
ჯგუფ “ფემილის”, მათ რეპერტუარსა და სხვა საკითხებთან დაკავშირებით ოზურგეთის მუნიციპალიტეტის საკრებულოს განათლების, კულტურის, სპორტის, ახალგაზრდულ საქმეთა, ჯანმრთელობისა და სოციალურ საკითხთა კომისიის თავმჯდომარემ, ირინა საჯაიამ “გურია ნიუსის” კითხვებს უპასუხა.
_ ქალბატონო ირინა, რა ღონისძიებები ჩატარდა საახალწლოდ ოზურგეთში?
_ 2011 წლის დეკემბრის ბოლოს დაიწყო საახალწლო ღონისძიებები _ ბაღებში ტარდებოდა ზეიმები, ურეკის კულტურის სახლმა გამართა საინტერესო კონცერტი, რამდენიმე ა(ა)იპ-მა გააკეთა ღონისძიება, 31 დეკემბერს კი ჩატარდა გასართობი შოუ-პროგრამა თეატრალურ მოედანზე, კულტურის ცენტრის მონაწილეობით. პრეზიდენტის განკარგულებით, ჩვენთან კონცერტის ჩასატარებლად მოწვეული იყო ჯგუფი “ფემილი”. ეს დაჯდა 45 000 ლარი, რომელიც პრეზიდენტის ფონდიდან გამოყო.
_ მხოლოდ ამ ჯგუფისთვის?
_ დიახ, ამ ჯგუფისთვის.
_ კონკრეტულად როგორი ჰონორარი მიიღეს ჯგუფის წევრებმა?
_ ბრძანებულებას მოყვა ხართჯაღრიცხვა. ზუსტად არ ვიცი, რამდენი მიიღეს კონკრეტულად ანსამბლის წევრებმა. ხარჯთაღრიცხვაში ყველაფერი გაწერილია.
_ ეს ჯგუფი ცნობილია ჯგუფია?
_ კი, თამუნა ლეკვეიშვილის ჯგუფია.
_ კონკრეტულად რა ჟანრის სიმღერებს ასრულებენ?
_ მღერიან საკლუბო სიმღერებს, ბლუზს, ფოლკს და ჯაზს. ოზურგეთში მათ იმღერეს მსოფლიოში ცნობილი მომღერლების სიმღერები.
_ როგორც იქ მყოფებმა გვითხრეს, კონცერტით კმაყოფილები არ დარჩნენ.
_ ხალხი? ვერ ვიტყვი, რომ გადაჭედილი იყო მოედანი, მაგრამ საკმაოდ ბევრი ხალხი იყო იმ საღამოს. ჩვენც ვიყავით, საჯარო მოხელეები. გემოვნებიანი სიმღერები აქვთ.
_ ისიც გვითხრეს, რომ კონცერტზე ის ხალხი, რომლებიც ბოლომდე დარჩნენ, მხოლოდ მობილურების გათამაშებას ელოდებოდნენ.
_ ეს დიდი ხნის ტრადიციაა. ისე, გემოვნებაზე არ დაობენ. ნამდვილად კარგი შესრულების მანერა ჰქონდა “ფემილის”. ძალიან კარგი გიტარისტი ახლდათ. მე, პირადად, მომეწონა.
_ თქვენი აზრით, ამ ჯგუფისთვის 45 000 ლარიანი ჰონორარი ძალიან ბევრი არ არის?
_ ისინი ბოლომდე დაიხარჯნენ და კარგი საღამო აჩუქეს ოზურგეთელებს.
_ ოზურგეთელ მომღერლებს თუ გადაუხადეთ ჰონორარი?
_ ჩვენ ამ ადამიანებს ხელფასებს ვუხდით იმისთვის, რომ კარგი ღონისძიება მოაწყონ და განწყობა შეგვიქმნან. ანსამბლი “მუხამბაზი” და ეკა ჭელიძე გამოვიდნენ, კარგი სიმღერები შეასრულეს, საბავშვო თეატრის მსახიობებიც იყვნენ ჩართულები კონცერტში.
_ საბოლოო ჯამში, რამდენი ათასი ლარი დაჯდა საახალწლო ღონისძიებები?
_ 39 000 ლარი დაიხარჯა ადგილობრივი ბიუჯეტიდან, რაშიც შედის ნაძვის ხის მოწყობა, საახალწლო განათებების მონტაჟი, ქუჩების, ფასადების, სცენის მოწყობა და ფეიერვერკი. 45 ათას ლარზე ზემოთ მოგახსენეთ.
_ ნაძვის ხის მოწყობა რამდენი დაჯდა?
_ 6 000 ლარამდე.
_ კმაყოფილი ხართ საახალწლო ღონისძიებებით, რომლისთვისაც 84 ათასი ლარი დაიხარჯა?
_ რა თქმა უნდა. აქვე დავამატებ, რომ ადგილობრივი ძალებით ჩატარდა პირველ იანვარს კარნავალი ბავშვებისთვის.
_ რომელიც ყოველთვის, მითქმა-მოთქმის საგანია ის, რომ მოსაწვევები საჯარო მოხელეებს ურიგდებათ.
_ ყველას უნდა მოსაწვევი. დამერწმუნეთ, თითო-თითო დაურიგეს თანამშრომლებს. ბევრი ბავშვია, ღმერთმა გვიმრავლოს, მაგრამ ვერ ვწვდებით. ვცდილობთ, ყველას შეხვდეს მოსაწვევი, მაგრამ ვერ ხერხდება.
“გურია ნიუსი” შეეცადა ოზურგეთის კულტურის, განათლების, სპორტის, ძეგლთა დაცვისა და ახალგაზრდულ საქმეთა სამსახურის ახალდანიშნული უფროსისგან, მაია თანდილაშვილისგან მიეღო კონკრეტული და დეტალური ინფორმაცია, საახალწლო ღონისძიებებისთვის დახარჯული თანხების შესახებ. თანდილაშვილმა ჯერ გვითხრა, რომ კითხვები დაგვეტოვებინა და წერილობით პასუხებს ერთ საათში მოგვაწოდებდა, თუმცა, რამდენიმე წუთში ტელეფონით დაგვიკავშირდა და გვითხრა, რომ ოფიციალურად უნდა მიგვეწერა მისთვის და მოგვწერდა, კონკრეტულად თუ რა თანხები დაიხარჯა ახალი წლის ღონისძიებებისთვის.
