ქალაქ ოზურგეთის მერმა, ბეგლარ სიორიძემ მედიის წარმომადგენლებისთვის პრესკონფერენცია გამართა.
_ პირდაპირ გეტყვით, რომ მერიდება კიდევაც, ამ თემასთან დაკავშირებული საუბარი, მაგრამ სამწუხაროდ კვლავ გრძელდება დამახინჯებული სახით საზოგადოებისთვის მიწოდება ინფორმაციის. მინდა კიდევ ერთხელ გამოვეხმაურო ქალაქის მერიის ზედამხედველობის სამსახურში მომხდარ ინციდენტს, რომლის მიმართ მასმედია ინტერესს არ კარგავს, უმეტეს შემთხვევაში ფაქტს არასწორი ინტერპრეტაციით ავრცელებს და ცდილობს საზოგადოება მერის წინააღმდეგ განაწყოს._ ამბობს ბელგარ სიორიძე.
მისივე თქმით, რაც ხდება ამ თემასთან დაკავშირებით, ხელოვნურად აგორებული კამპანია ქალაქის მერიის დისკრედიტაციის მცდელობის ციკლის ნაწილია, რომლის უკან კონკრეტული ადამიანების პოლიტიკური ინტერესი დგას. გამუდმებით მიმდინარეობს ცილისმწამებლური კამპანია მერიის სხვადასხვა სამსახურის მიმართაც.
_ რეალობა კი ასეთია: მე თავად შევესწარი სურათს, რომელიც საჯარო მოხელეების ქცევას სრულიად არ შეეფერებოდა. ჩემი იმ მომენტში იქ ყოფნა სრულიად არ ნიშნავს იმას, რომ მე აღნიშნულ კონფლიქტში რამე სახით ჩავერიე. ამაზე საუბარი, რბილად რომ ვთქვათ, სასაცილოა. ამას თავად თანამშრომლებიც დაადასტურებენ. ჩემი დისკრედიტაციით დაინტერესებულმა ადამიანებმა ისარგებლეს იმით, რომ მე არ წავედი კომპრომისზე და თანამშრომლების განცხადება სამსახურიდან წასვლის თაობაზე, დავაკმაყოფილე. სწორედ ამ საბაბით დაიწყო სატელევიზიო ისტერიკა მთელი ქვეყნის მასშტაბით. თუმცა როგორი აჟიოტაჟიც არ უნდა მოჰყვეს ამ ფაქტს, დღემდე ვთვლი, რომ ქალაქის მერიაში, ორგანიზაციაში, რომელიც საზოგადოებრივი სახსრებით სწორედ საზოგადოებისთვის მუშაობს, საჯარო მოხელეები სამსახურში ალკოჰოლს არ უნდა იღებდნენ და შემდეგ დებოშს არ უნდა აწყობდნენ. ამაში ალბათ ყველანი დამეთანხმებით. _ თქვა ბეგლარ სიორიძემ.
