რამდენიმე წუთში პრემიერი ღარიბაშვილი გურიაში იქნება. თუმცა, მის ჩამოსვლამდე გურიას ელექტროენერგიის მიწოდება შეუწყდა.
"ენერგო პრო ჯორჯიას" ადგილობრივ სერვისცენტრში ელექტროენერგიის გამორთვის მიზეზს ვერ აკონკრეტებენ:
_ დაზუსტებით არ ვიცით რა მოხდა. მთელი გურიაა გამორთული. სავარაუდოდ, ამის მიზეზი ცუდი ამინდი _ ქარი და ძლიერი წვიმა გახდა, _ გვითხრეს კომპანიაში.
ამ წუთებში გურიაში კოკისპირული წვიმა და ძლიიერი ჭექა-ქუხილია.
ირაკლი ღარიბაშვილი შეხვედრებს ჩოხატაურიდან იწყებს, სადაც მშენებარე ხილის გადამამუშავებელ საწარმოს ესტუმრება. კიდევ ერთ საწარმოს, რომელიც მაისის ბოლოს გაიხსნება, პრემიერი ანასეულში დაათვალიერებს, ხოლო გურიანთაში – ახლად გახსნილი ჩაის გადამამუშავებელი ქარხნის მუშაობას გაეცნობა.
დაგეგმილია მთავრობის მეთაურის შეხვედრა გურიის რაიონების გამგებლებთან და ოზურგეთის მერთან.
14:00 საათზე კი, ოზურგეთში, კოლეჯ „ჰორიზონტში“, ირაკლი ღარიბაშვილი საქართველოში მოღვაწე ბიზნესმენებს შეხვდება და რეგიონის ეკონომიკურ პოტენციალს გააცნობს. მთავრობის მეთაურის დავალებით, ეკონომიკურმა საბჭომ ყველა რეგიონის პოტენციალი შეისწავლა, რათა ხელისუფლებამ მაქსიმალურად შეუწყოს ხელი რაიონებში წარმოების განვითარებას და სამუშაო ადგილების შექმნას.
