საკადრო ცვლილებები გურიის პოლიციაში გრძელდება _ რამდენიმე დღეა, რაც გურიის სამხარეო მთავარი სამმართველოს დეტექტივი, შემოქმედელი თედო ჭანუყვაძე დეტექტივების ხაზით ჩოხატაურის რაიონული პოლიციის სამმართველოს უფროსის მოადგილედ დაინიშნა _ მან ამ პოსტზე ჩოხატაურელი რამაზ ჯინჭარაძე შეცვალა. რამაზ ჯინჭარაძე ჩოხატაურში მომხდარი ყაჩაღობების შემდეგ დააქვეითეს და გურიის სამხარეო მთავარ სამმართველოში დეტექტივის თანაშემწედ გადაიყვანეს, გია ტუღუშის ადგილზე. გია ტუღუში კი დეტექტივების ხაზით ლანჩხუთის პოლიციის სამმართველოს უფროსის მოადგილედ ამავე სამმართველოს დეტექტივ-გამომძიებლად კი _ დავით იმნაძე დაინიშნა.
ჩვენი წყაროს ინფორმაციით, საკადრო ცვლილებები გურიის პოლიციაში ამით არ დამთავრდება _ როგორც “გურია ნიუსს” წყარომ უთხრა, გურიის სამხარეო მთავარ სამმართველოს უბნის ინსპექტორთა სამმართველოს უფროსს, მიშა დარჩიას მალე დააქვეითებენ და მას დეტექტივების ხაზით ოზურგეთის რაიონული სამმართველოს უფროსის მოადგილედ გადაიყვანენ, ირაკლი შავიშვილი კი რწმუნებულების ხაზით ოზურგეთის პოლიციის რაიონული სამმართველოს უფროსის მოადგილედ დაინიშნება.
გურიის სამხარეო მთავარ სამმართველოში უბნის ინსპექტორთა სამმართველოს უფროსად მიშა დარჩიას ადგილზე გოჩა ფერსაშვილი ინიშნება. წყაროს თქმით, გაურკვეველია, რის საფუძველზე აწინაურებენ და აქვეითებენ პოლიციელებს.
წყაროს ინფორმაციით, დავით ცირეკიძის კადრი, მისი მეგობარი წყალტუბოს პოლიციის რაიონული სამმართველოს ყოფილი უფროსი ბიჭია ჩხაიძე, გურიის სამხარეო მთავარ სამმართველოში უბნის ინსპექტორად დაინიშნა. აღსანიშნავია, რომ ჩხაიძე წყალტუბოს პოლიციის უფროსის პოსტიდან იმერეთში ნარკოკარტელების აღმოჩენის შემდეგ მოხსნეს. მაშინ თანამდებობიდან გაათავისუფლეს კონსტიტუციური უსაფრთხოების დეპარტამენტის დასავლეთ საქართველოს რეგიონული სამმართველოს უფროსი კოტე არჩაია, სოდ-ის ქუთაისის განყოფილების უფროსი ბაქარ ბაბუხადია და არჩაიას მოადგილე შალვა ბოლქვაძეც.
აღნიშნული სამინისტროს აჭარა-გურიის პრესსამსახურის წარმომადგენელმა, მაია გიორგაძემ “გურია ნიუსს” კიდევ ერთხელ “შეახსენა”, რომ ის კომენტარებს არ აკეთებს:
_ მე ვარ უბრალოდ პრესსამსახურის თანამშრომელი. კომენტარებს აკეთებს ზურაბ გვენეტაძე. ძალიან გთხოვთ, მას მიმართეთ.
შინაგან საქმეთა სამინისტროს პრესსამსახურის უფროსმა, ზურაბ გვენეტაძემ კი “გურია ნიუსის” სატელეფონო ზარებს არ უპასუხა.
