უმაღლეს ლიგაში მოასპარეზე „ლანჩხუთის „გურიამ“ ეროვნული ლიცენზია ვერ მიიღო.
კლუბის პრეზიდენტის, ლანჩხუთის მუნიციპალიტეტის გამგებლის ზაზა ურუშაძის თქმით, გუნდისთვის ლიცენზია არც მოუთხოვიათ:
_ რაღად მინდა ლიცენზია _ სეზონი დამთავრდა. ჩვენ უეფას ლიცენზია გვინდოდა, მაგრამ უარი ვთქვი იმის გამო, რომ ვერ გავდიოდით სამეულში. რა აზრი ჰქონდა?! ვთქვი უარი და ვიფიქრე, რომ ადგილობრივ ლიცენზიას ავიღებდით.
_ ადგილობრივი ლიცენზიაც რომ არ გაქვთ?
_ ავიღებთ, როცა სეზონი დაიწყება, ახლა რა საჭიროა?! არ შეგვიტანია მოთხოვნა, რადგან მთავარ მწვრთნელს და დამხმარეებს, ენა რომ ჰქონდათ მხარზე გადაგდებული, არც ერთი არ იყო ლიცენზირებული მწვრთნელი, _ გვითხრა ურუშაძემ.
ფეხბურთის ეროვნული ფედერაციის იურიდიული სამსახურის უფროსი კესო ჩხიკვაძე „გურია ნიუსთან“ საუბრისას ამბობს, რომ „კლუბის პრეზიდენტის უნიათობის გამო“, ბიუჯეტი 50 000 ლარს იზარალებს:
_ ლანჩხუთის „გურიამ“ ლიცენზია ბევრი მიზეზის გამო ვერ მიიღო. მათ შორის არ წარმოუდგენია წერილი (გარანტია) დაფინანსების შესახებ. ბევრი კრიტერიუმია _ ფინანსური, იურიდიული, საკადრო, სპორტული-ინფრასტრუქტურა. ისეთი არაფერი, რომ ვერ გაევლო, _ გვითხრა ჩხიკვაძემ.
მისივე თქმით, ამის გამო, კლუბს ჯარიმის გადახდა მოუწევს:
_ მსგავს შემთხვევაში კლუბმა უნდა გადაიხადოს ჯარიმები კრიტერიუმების დარღვევისთვის და ჩემპიონატში მონაწილეობის მიღების უფლება რომ მიიღოს, დამატებით უნდა 50 000 ლარის გაღება მოუწევს.
ახლა ეს ჯარიმები, მაგათი უნიათო შრომის გამო, ბიუჯეტმა უნდა გადაიხადოს, _ ამბობს ჩხიკვაძე, რომლის განმარტებით, ჯარიმების თანხა დაახლოებით 20 000 ლარი იქნება.
_ ქალბატონო კესო, კლუბმა უნდა მოგმართოთ ლიცენზიისთვის? ეს მათ ნებასურვილზეა დამოკიდებული თუ ვალდებულებაა? ურუშაძე ამბობს, რომ არ სჭირდებოდათ და არც მოუთხოვიათ.
_ უმაღლესი ლიგის კლუბებისათვის ვალდებულებაა. კლუბის პრეზიდენტის მხრიდან ეგ არის უპასუხისმგებლო განცხადება.
_ კლუბის პრეზიდენტმა ისიც გვითხრა, რომ გუნდის მწვრთნელებს ლიცენზიაც არ ჰქონდათ…
_ კი, ეგეც იყო პრობლემა სხვა პრობლემებთან ერთად.
_დავაზუსტოთ _ თქვენ მოგმართათ კლუბმა ლიცენზიისთვის და უარი მიიღო?
_ ვალდებულება აქვთ, მიუხედავად იმისა, მოითხოვს თუ არა ამას კლუბი. „გურია“ უმაღლესი ლიგის გუნდია და კლუბის უფლებამოსილი პირის მოთხოვნაზე არ არის დამოკიდებული ლიცენზიის აღება. ფედერაციის ლიცენზირების კომიტეტი მაინც განიხილავს საქმეს და წარმოდგენილი დოკუმენტაციის მიხედვით მიიღებს გადაწყვეტილებას.
ჩხიკვაძის ინფორმაციით, ლანჩხუთის „გურია“ თამაშს მხოლოდ იმ შემთხვევაში შეძლებს, თუ ჯარიმებს გადაიხდის:
_ ჩემპიონატში მონაწილეობას მიიღებს თანხის გადახდის შემდეგ. თუმცა, უეფადან მოსული თანხა, რომელიც უმაღლესი ლიგის ლიცენზირებულ კლუბებს ეკუთვნით, ვერ მიიღებს, რადგან ლიცენზია არ აქვთ. ეს თანხა უეფადან უმაღლესი ლიგის ლიცენზირებული კლუბებზე ბავშვთა ფეხბურთის წახალისებისთვის მოდის, _ დააზუსტა ჩხიკვაძემ.
ზაზა ურუშაძე ამბობს, რომ თანხას არ გადაიხდის, თუმცა, გუნდი უმაღლეს ლიგაში თამაშს შეძლებს:
_ რას ქვია, დაფინანსება არ გვაქვს?! რა არ წარვადგინეთ. წერილი გამოგვიგზავნეს და იქ წერია მიზეზები, მაგრამ მე უკვე ვესაუბრე ფედერაციის პრეზიდენტს და არ არის პრობლემა მაგის გაკეთება. 50 000 ლარი ჯდება ადგილობრივი ლიცენზიის აღება.
_ ჩვენ გვითხრეს, რომ 70 000 ლარამდე ჯარიმა გაქვთ გადასახდელი…
_ არ გადავიხდით მაგ თანხას.
_ მაშინ უმაღლეს ლიგაში ვერ ითამაშებთ…
_ თუ არ ვითამაშებთ, რომ დაიწყება ჩემპიონატი, ნახავთ.
_ უეფადან წამოსული თანხა რომ არ მოგიწევთ?
_ უეფადან წამოსული თანხა ბავშვთა ფეხბურთის წასახალისებლად მოგვიწვეს. ნახავთ, თუ არ მოგვიწევს! ფედერაციაში ბანდაა შეკრებილი. ახლა არჩევნები იქნება, მოვა ახალი ხალხი და ყველაფერი ისე გაკეთდება, როგორც საჭიროა, _ გვითხრა ურუშაძემ.
გასულ წელს ლანჩხუთის გურიას ადგილობრივი ბიუჯეტიდან 973 000 ლარი ჰქონდა გამოყოფილი, საიდანაც 972 981 ლარი აითვისეს.
წელს, გეგმით, მილიონ 40 000 ლარია გამოყოფილი, საიდანაც 997 870 ლარი, დღეის მდგომარეობით, დახარჯულია.
