ფეხბურთის ფედერაციამ უმაღლეს ლიგაში მოასპარეზე ლანჩხუთის „გურიას“ ეროვნული ლიცენზია არ მისცა. კლუბის პრეზიდენტის, ლანჩხუთის მუნიციპალიტეტის გამგებლის ზაზა ურუშაძის განცხადებით ლიცენზია არც მოუთხოვიათ, რადგან ჯერ არ სჭირდებოდა, თუმცა ფეხბურთის ფედერაციაში განმარტავენ, რომ ლიცენზია კლუბის ვალდებულებაა.
_ ლანჩხუთის „გურიამ“ ლიცენზია ბევრი მიზეზის გამო ვერ მიიღო. მათ შორის არ წარმოუდგენია წერილი (გარანტია) დაფინანსების შესახებ. ბევრი კრიტერიუმია _ ფინანსური, იურიდიული, საკადრო, სპორტული-ინფრასტრუქტურა. ისეთი არაფერი, რომ ვერ გაევლო, _ გვითხრა ფეხბურთის ფედერაციის იურიდიული სამსახურის უფროსმა კესო ჩხიკვაძემ.
მისივე თქმით, ამის გამო, კლუბს ჯარიმის გადახდა მოუწევს:
_ მსგავს შემთხვევაში კლუბმა უნდა გადაიხადოს ჯარიმები კრიტერიუმების დარღვევისთვის და ჩემპიონატში მონაწილეობის მიღების უფლება რომ მიიღოს, დამატებით უნდა 50 000 ლარის გაღება მოუწევს.
ახლა ეს ჯარიმები, მაგათი უნიათო შრომის გამო, ბიუჯეტმა უნდა გადაიხადოს, _ ამბობს ჩხიკვაძე, რომლის განმარტებით, ჯარიმების თანხა დაახლოებით 20 000 ლარი იქნება.
ურუშაძე ამტკიცებს, რომ ჯარიმას არ გადაიხდის და გუნდი თამაშს შეძლებს. კლუბის პრეზიდენტს ფედერაციაში დაგეგმილი არჩევნების იმედი აქვს:
_ ფედერაციაში ბანდაა შეკრებილი. ახლა არჩევნები იქნება, მოვა ახალი ხალხი და ყველაფერი ისე გაკეთდება, როგორც საჭიროა, _ აღნიშნა ჩვენთან საუბრისას ურუშაძემ.
ჯერჯერობით უცნობია როგორ აპირებს ზაზა ურუშაძე "ყველაფრის ისე გაკეთებას, როგორც საჭიროა“, რადგან მუნიციპალიტეტის ბიუჯეტიდან კლუბისთვის გამოყოფილი მილიონ ორმოციათასი ლარიდან 997 870 ლარი უკვე დახარჯულია.
ლანჩხუთის გამგეობის საფინანსო სამსახურის უფროსის, როლანდ ლაშხიას თქმით, დარჩენილ თანხას ვერ ხარჯავენ, რადგან საბანკო ვალდებულებები და სესხები აქვთ.
ურუშაძეს ერთადერთი გამოსავალი აქვს _ ბიუჯეტში ცვლილება შეიტანოს და კლუბს თანხა დაუმატოს, თუმცა დაუჭერენ თუ არა დეპუტატები ამაში მხარს უცნობია.
ცნობილია ის, რომ გუნდს ახალი სეზონის დაწყება ფეხბურთის ფედერაციის ამჟამინდელი შემადგენლობის ქვეშ მოუწევს, რადგან არჩევნები ოქტომბერშია დანიშნული.
ურუშაძეს თუ დავუჯერებთ ფეხბურთის ფედერაციის ხელმძღვანელთან ყველაფერი გარკვეული აქვს და ის პრეტენზიები, რომლის გამოც ლიცენზია არ მისცეს არაფერს ნიშნავს.
თუმცა, ამ ფაქტს კატეგორიულად უარყოფენ ფედერაციაში.
დოკუმენტში, რომელიც საფეხბურთო კლუბ „ლანჩხუთის გურიას“ ფეხბურთის ფედერაციიდან გაეგზავნა ვკითხულობ:
"დარღვეული უსაფრთხოებისა და წესრიგის დაცვის ფორმა _ წესრიგის დამცავ ორგანოებთან არ არის ხელშეკრულება გაფორმებული; ძირითადი გუნდის მთავარ მწვრთნელს თეიმურაზ ლორიას არ გააჩნია სამწვრთნელო ლიცენზია; მწვრთნელს გიგლა იმნაძეს არ გააჩნია სამწვრთნელო ლიცენზია; მწვრთნელს ავთანდილ ნარიაშვილს არ გააჩნია სამწვრთნელო ლიცენზია; ვადაგადაცილებული ფინანსური ვალდებულებები, თანამშრომელთა და საგადასახადო ორგანოების მიმართ; კლუბს საერთოდ არ წარმოუდგენია სპორტული კრიტერიუმებით გათვალისწინებული დოკუმენტაცია“
მართალია, ურუშაძე ამბობს, რომ ლიცენზია არ მოუთხოვიათ, მაგრამ გუნდის იურისტის დიმა გვარჯალაძის თქმით ლიცენზიის მისაღებად დიდხანს იმუშავეს:
_ ხალხი გვყავდა სპეციალურად გამოყოფილი. ერთი თვე დადიოდნენ ფედერაციაში, მიჰქონდათ დოკუმენტები, თუმცა, არაფერი გამოვიდა. მწვრთნელებს არ ჰქონდათ ლიცენზია და ვიყავით შეთანხმებულები, რომ ფედერაცია ვადას გააგრძელებდა. ეს ვერ მოასწრეს და ლიცენზიაც არ მოგვცეს, _ გვითხრა გვარჯალაძემ.
მისივე თქმით, ამის გამო თანამშრომლები სამსახურიდან დაითხოვეს:
_ აკაკი დობორჯგინიძე იყო ფინანსისტი და მენეჯერი იყო ბექა კვიციანი. ისინი სამსახურიდან იმის გამო გავათავისუფლეთ, რომ მოვალეობას ვერ ასრულებდნენ და სწორედ მათი ცუდი მუშაობის გამო ვერ მივიღეთ ლიცენზია, _ გვითხრა გვარჯალაძემ.
თუმცა, დობორჯგინიძის და კვიციანის გათავისუფლების ბრძანებებში, რომლებიც 1 მაისით თარიღდება, წერია, რომ ორივემ თავად მოითხოვა სამსახურიდან წასვლა.
სამსახურიდან მისი ნებით არ წასულა მთავარი მწვრთნელი თეიმურაზ ლორია. იგი ზაზა ურუშაძის ბრძანებით გაათავისუფლეს.
_ ლიცენზირებაზე საუბრობს გამგებელი და სასაცილოდ არ გვეყო ეს თემა, როცა ითქვა თავის დროზე. კლუბში ისეთი ხალხი მოვიდა, გაგებაში არ არიან რა ხდება და ლიცენზიაზე ვინ იმუშავებდა?
გამგებელს ჰგონია სადღაც გადარეკავს – გადმორეკავს და ლიცენზირებას უეფასგან უფეშქაშებენ. ჩაის ფაბრიკის დონეზეა და სხვას მაინც დაანებოს თავი, პირში წყალი გამოივლოს და ისე ისაუბროს.
ლიცენზირების მიღებას დიდი შრომა და მონდომება სჭირდება. რთულია, მაგრამ ამისთვის გუნდური ქმედებაა საჭირო და ყველაფერი შეიძლება თუ მოინდომებ. ვიმეორებ, ამისთვის კვალიფიციური კადრებია საჭირო და არა გაუნათლებელი, არაფრის მცოდნე. მე სულ ფეხბურთში ვიტრიალებ, „გურიაში“ თუ არა, სხვაგან, მაგრამ ურუშაძის მოყვანილ ხალხს ფეხბურთში რა ესაქმებათ, მალე მოვა მათი წასვლის დრო.
ყოველთვის გამიხარდება, კლუბი ლიცენზიას თუ აიღებს, არ შეიძლება ვისაც ფეხბურთი უყვარს ასე არ ფიქრობდეს, მაგრამ ამ მიდგომებით ლიცენზირებაზე საუბარი სასაცილოა, _ ასეთ განმარტებას აკეთებს "გურია ნიუსთან“ ლორია, რომელიც ურუშაძის მტკიცებით საქმეს თავს ვერ ართმევდა, რომელსაც „ენა მხარზეა აქვს გადაკიდებული“ და ერთ-ერთი მიზეზი, რის გამოც კლუბმა ლიცენზია ვერ მიიღო თავადაა.
ჩვენი ინფორმაციით ლანჩხუთის „გურიას“ ირგვლივ აგორებული სკანდალი უფრო დიდ მასშტაბს მიიღებს _ ფეხბურთის ფედერაციაში გარიგებულ თამაშებზე მოკვლევას აწარმოებენ. როგორც გვითხრეს, არსებობს საფუძვლიანი ეჭვი, რომ მიმდინარე სეზონზე ლანჩხუთის "გურიამ“ რამდენიმე გარიგებულ თამაშში მიიღო მონაწილეობა.
ამავე თემაზე: ლანჩხუთის „გურია“ ლიცენზიის გარეშე _ გამგებელი ფედერაციის წინააღმდეგ; "ლიცენზირება მისით არ მოდის“ _ მწვრთნელების პასუხი ზაზა ურუშაძეს
