(გურია ნიუსი, ლანჩხუთი) _ ჩვენი გაზეთი უკვე წერდა, რომ ჩოხატაურის საავადმყოფო, შესაძლოა, ებრაულ კომპანია “ადითს” დაატოვებინონ. ჩვენი წყაროს ინფორმაციით, კომპანია ლანჩხუთის სამედიცინო ცენტრსაც დატოვებს. უფრო ზუსტად, შეუსრულებელი პირობების გამო ხელისუფლება კომპანიასთან ურთიერთობას წყვეტს. როგორც ჩვენმა წყარომ გვითხრა, ახალი საავადმყოფოს გახსნის მეორე დღეს, ოზურგეთში ქვეყნის პრემიერ-მინისტრი ნიკა გილაური იმყოფებოდა, რომელთანაც კიდევ ერთხელ დააყენეს “ადითის” პასუხისმგებლობის საკითხი. “ადითის” შესახებ, გილაური მანამდეც იყო ინფორმირებული, რა თქმა უნდა, ჯანდაცვის მინისტრ ანდრია ურუშაძესთან და თქვენ წარმოიდგინეთ, შს მინისტრ ვანო მერაბიშვილთან ერთად. “როგორც “გურია ნიუსი” წერდა, ჩოხატაურის საავადმყოფოში მედპერსონალის მიერ მოწყობილი გაფიცვის დროს, ექიმებთან პოლიციის ადგილობრივი ბოსები მივიდნენ და უთხრეს, ახლა შეწყვიტეთ გაფიცვა, ჩვენი მინისტრი საქმის კურსშია და ყველა პრობლემა მოგვარდებაო(?!). ეს “პრობლემა” კი მას შემდეგ აქვთ გურულ მედიკოსებს, რაც ლანჩხუთისა და ჩოხატაურის საავადმყოფოების მმართველ კომპანიად “ადითი” მოგვევლინა და მედპერსონალს ისედაც შემცირებული ხელფასებს უგვიანდება, ზოგი კი სამი თვისასაც ვერ იღებს.
როცა გილაურს კიდევ შეახსენეს, წინასაარჩევნოდ მედიკოსების განაწყენება კარგი საქმე ნამდვილად არ იქნებაო, მთავრობაში “ადითის” პროექტიდან გასვლის გადაწყვეტილება მიიღეს. ეს ამბავი კი იმ სკანდალმა დააჩქარა, რომელშიც ლანჩხუთის “ადითი” აღმოჩნდა _ საავადმყოფოში 6 თვის ჩვილის უცაბედად დაიღუპა. თემა რამდენიმე დღეში სამთავრობო არხებმა აიტაცეს და როგორც უმეტეს შემთხვევაში, ჩვენი მასალა ისე “მიითვისეს”, ჩვენზე კრინტიც არ დაუძრავთ. რა თქმა უნდა, “ადითის” უკან რომელიღაც სახელისუფლო გუნდი იდგა _ სხვა შემთხვევაში, კომპანიას, რომელიც კულუარებში “100 ახალი საავადმყოფოს” პროექტში ხელისუფლების “გადამგდები” “აიჰოპის” შვილობილია, არც პროექტს მისცემდა ვინმე და არც აქამდე აცდიდა პირობების “ფეხებზე დაკიდებას”.
არადა, როცა “ადითი” ქართულ საავადმყოფოებში შემოდიოდა, რას არ ჰპირდებოდნენ სამედიცინო ცენტრებს _ თანამედროვე აპარატურას, 24-საათიან სამუშაო გრაფიკს (ლანჩხუთის საავადმყოფოსთვის, რადგან მაგისტრალის გასწვრივ მდებარეობს და სტრატეგიული დანიშნულება აქვს), მედპერსონალისთვის კარგ პირობებს, რეალურად კი მივიღეთ შემცირებული ხელფასები და შტატები, საავადმყოფოებიდან წასული პროფესიონალები, მომსახურების გაზრდილი ტარიფები, რის გამოც, გაჭირვებული ოჯახებისთვის სამედიცინო ცენტრით სარგებლობა თითქმის შეუძლებელი გახდა. ფაქტობრივად, ახალმა მენეჯმენტმა ის მოიტანა, რომ სამედიცინო ცენტრს შემოსავლები გაეზარდა, პერსონალს კი ანაზღაურება შეუმცირდა, ანუ კომპანიამ თავიდანვე დიდი მოგების მიღება განიზრახა.
გასული წლის ბოლოს, ჩოხატაურის მსგავსად, შემცირებების მორიგი ეტაპი გახორციელდა ლანჩხუთის საავადმყოფოში. ამის გამო, სამედიცინო ცენტრებში კადრების დეფიციტიც შეიქმნა. მართალია, ჯერ კიდევ არ არის გაკეთებული ექსპერტიზის დასკვნა, რამ გამოიწვია ლანჩხუთის საავადმყოფოში 6 თვის ჩვილის დაღუპვა, თუმცა, ოჯახი მედპერსონალს უყურადღებობაში ადანაშაულებს, როცა ბავშვი ცუდად გახდა, ექიმი და ექთანი 10-15 წუთის მანძილზე არ გამოჩენილანო! ამის მიზეზი, როგორც ჩანს, ის გახდა, რომ იმავე პერიოდში, საავადმყოფოში რამდენიმე ავადმყოფი მოიყვანეს და 2-2 ექიმი და ექთანი (აქედან თითო _ რეანიმაციულ განყოფილებაში) რამდენიმე ავადმყოფს როგორ უპატრონებდნენ?!
ჩვენთან საუბარში ლანჩხუთში ოფიციალურ კომენტარს არ აკეთებენ, თუმცა, პირად საუბარში დაგვიდასტურეს, რომ “ადითთან” ხელშეკრულება წყდება. ჩვენ გვსურდა აღნიშნული კომპანიის რეგიონულ კურატორს ზურაბ დანელიას დავკავშირებოდით, მას ელექტრონული ფოსტის მისამართზეც მივწერეთ, მაგრამ მასალის მომზადების დროს პასუხი მიღებული არ გვქონდა და არც გვგონია, მივიღოთ _ ბატონმა ზურაბმა, რომელიც ჯერ კიდევ ახალმოსული იყო “საავადმყოფოების პროექტში”, “გვირჩია” _ “ჟურნალისტი როცა კითხვას სვამს, ჯერ უნდა გაარკვიოს, რას კითხულობს(!) _ ჩვენს შესახებ ინფორმაცია არის ინტერნეტში და ვინც მუშაობა იცის ინტერნეტში, შევიდეს და ნახოს”. ჩვენი “გაუგებარი და გასარკვევი” კითხვა ასეთი იყო _ შემცირდება თუ არა პერსონალის ხელფასები და გაიზრდება თუ არა მომსახურების ხარჯები? როგორც ჩანს, “ადითის” მენეჯერს ეგონა, ჟურნალისტებს ინტერნეტის არაფერი გაგვეგებოდა, თუმცა, სანთლით რომ ეძებო, მსოფლიო ქსელში “ადითზე” ვერანაირ ინფორმაციას ვერ ნახავ, ხოლო თუ მისი ელფოსტით ვიხელმძღვანელებთ, კომპანიის საიტი www.aditti.ge უნდა იყოს. ასეთი მისამართი კი ისევე არ არსებობს, როგორც ლანჩხუთისა და ჩოხატაურის საავადმყოფოებში “შემოტანილი თანამედროვე აპარატურა და სტანდარტები” და “ადითის” ძმობილი “აიჰოპის” მიერ “აგებული 100 საავადმყოფო”.
საინტერესოა, “აიჰოპთან” შეწყვეტილი ურთიერთობის შემდეგ, რატომ ენდო მთავრობა თითქმის იგივე ბიზნეს ჯგუფს?
ჩვენი წყაროს ინფორმაციით, ლანჩხუთის საავადმყოფოზე კონტროლი, შესაძლოა, კომპანია “ალფას” გადაეცეს, რომელიც უკვე ფლობს კლინიკას ოზურგეთში. როგორც ცნობილია, სწორედ მას მიანიჭა სახელმწიფომ გურიის რეგიონის კურატორობა. თუ “ალფა” მართლაც გახდა ლანჩხუთის და ჩოხატაურის საავადმყოფოების მფლობელი, მაშინ ის რეგიონის სამედიცინო სფეროს მონოპოლისტი აღმოჩნდება. როგორც იცით, “ალფა” ლანჩხუთში უკვე ფლობს “ავერსი კლინიკას”.
