2012 წლის ახალი წლის ღამეს, ყველაზე “მასშტაბური” ღონისძიება, გურიის სამი მუნიციპალიტეტიდან, ოზურგეთში ჩატარდა. როგორც “გურია ნიუსისთვის” არის ცნობილი, საახალწლო ღონისძიებებისთვის საქართველოს პრეზიდენტის, მიხეილ სააკაშვილის საპრეზიდენტო ფონდიდან 45 000 ათასი ლარი გადმოირიცხა. თუმცა, ოზურგეთის მუნიციპალიტეტის გამგეობა არ აკონკრეტებს, როგორ გადაინაწილა 45 000 ლარი მუსიკალურმა ჯგუფმა “ფემილიმ”, რომელშიც “ვანოს შოუს” ბენდის ხელმძღვანელი, თამუნა ლეკვეიშვილი და მისი ქმარი მღერიან.
როგორც ახალი წლის კონცერტის ერთ-ერთმა მონაწილემ გვითხრა, მომღერალმა-ბენდის ხელმძღვანელმა, რომელმაც კონცერტისთვის ფული პრეზიდენტის ფონდიდან მიიღო, ოზურგეთელებს “კომედი შოუს” და “ვანოს შოუს” სახელით მიულოცა ახალი წელი.
99 236-ლარიანი საახალწლო დღეები
ოზურგეთის მუნიციპალიტეტის გამგებლის მოვალეობის შემსრულებელმა, ილია ვაშაყმაძემ ოფიციალურად მოგვწერა, თუ რამდენი ლარი დაიხარჯა საახალწლო ღონისძიებებისთვის _ ამისთვის მას ექვსი დღე დაჭირდა:
“ოზურგეთის მუნიციპალიტეტის 2011-2012 წწ ბიუჯეტიდან, საახალწლო ღონისძიებებზე დაიხარჯა სულ 99 236 ათასი ლარი, მათ შორის: 31 დეკემბერი _ კონცერტი თეატრალურ მოედანზე ანსამბლ “ფემილისა” და მუნიციპალური კულტურის ცენტრის თანამონაწილეობით _ 48 970 ათასი ლარი; 1 იანვარი _ ალ. წუწუნავას სახელობის სახელმწიფო დრამატულ თეატრში მიუზიკლი “ფისოს სახლი” _ 1100 ლარი (ღონისძიება); ტკბილეული საჩუქრებისთვის _ 4 800 ლარი; საახალწლო ნაძვის ხის მოწყობა _ 6 549 ლარი, საახალწლო მანათობლის მოწყობა, მონტაჟი _ 29 591 ათასი ლარი, საახალწლო სცენის მოწყობა _ 2 498; საახალწლო ფეიერვერკის შეძენა _ 5 728 ათასი ლარი”.
ოზურგეთის მუნიციპალიტეტიდან ასევე გვწერენ, რომ 31 დეკემბრის “ჯადოსნურ ღამეს” 21 მობილური ტელეფონი გათამაშებულა, თუმცა, ჩამონათვალი, ვის ერგო ახალი წლის ღამეს გათამაშებული მობილური ტელეფონები, ჩვენთვის მიუწვდომელი აღმოჩნდა.
ლანჩხუთში ახალი წლის ღამეს კონცერტი არ გამართულა
ლანჩხუთის მუნიციპალიტეტში საახალწლო დღეებისთვის 10 980 ლარი დაიხარჯა. ამავე მუნიციპალიტეტის გამგეობის საზოგადოებასთან და პრესასთან ურთიერთობის სამსახურის ინფორმაციით, 31 დეკემბერს, 1 და 2 იანვარს სხვა საახალწლო ღონისძიება არ გამართულა.
საახალწლო ღონისძიებისთვის გამოყოფილი თანხებით დაფინანსდა: ქალაქ ლანჩხუთის სკვერში ნაძვის ხის დადგმა; საბავშვო ქალაქის მოწყობა; 30 დეკემბერს ნიღბების თეატრის სპექტაკლის ჩვენება ბავშვებისთვის; 29 დეკემბერს კულტურის ცენტრის თვითმოქმედი ანსამბლების მონაწილეობით საახალწლო კონცერტი; 500 ბავშვს დაურიგდა საჩუქრები, ასევე, საახალწლო საჩუქრები დაურიგდათ შეჭირვებულ ოჯახებს;
ჩოხატაურის მუნიციპალიტეტი
ჩოხატაურის მუნიციპალიტეტის გამგებლის ლელა იმედაშვილის ინფორმაციით, ჩოხატაურის მუნიციპალიტეტის ბიუჯეტიდან საახალწლო ღონისძიებაზე დაიხარჯა 11 760 ლარი.
_ მასში შედიოდა ნაძვის ხის, განათებების, საახალწლო ღონისძიების, სცენის მოწყობა. 31 დეკემბერს კონცერტი ჩატარდა ადგილობრივი ძალებით, _ გვითხრა იმედაშვილმა.
