დღეს ქალაქ ოზურგეთის მუნიციპალიტეტის საკრებულოს სივრცითი დაგეგმარებისა და ინფრასტრუქტურის კომისიის სხდომაზე, ქალაქ ოზურგეთში ამკრძალავი ნიშნების დაყენების შესახებ იმსჯელეს, რომელიც აბაშიძის ქუჩაზე ტაქსების გაჩერების აკრძალვას ეხება.
ადგილობრივი ხელისუფლება ტაქსების აღნიშნულ ტერიტორიაზე გაჩერების აკრძალვას, ქალაქის ტაქსებით გადატვირთვით ხსნის.
აბაშიძის ქუჩაზე მომაშავე ტაქსის მძღოლები ჩვენთან საუბრისას ამბობენ სხვაგან წასასვლელი არა აქვთ:
ტარიელ სირაძე: “სად უნდა წავიდეთ?! ამდენი წელია ამ დანგრეული ქვეყნის გამოსწორებას ველოდებით და უკეთესობის მაგიერი უარესობისკენ მივდივართ“.
გია ჯაფარიძე: “ამ ხალხს რა ეშველება, ამათ უკან ყველას ოჯახები ჰყავს, 37 წელია მძღოლი ვარ, ამით ვარჩენ ოჯახს, არც ისეთი რამე ხდება აქ საგანგაშო, რომ ასე აგვიკრძალონ აქ გაჩერება და მუშაობა, აქვე მაღაზიებია, ხალხს მისვლა – მოსვლა უნდა, ჩვენი საშველი როდის უნდა დადგეს?!“
გიზო ღლონტი: “რას ქვია სახლში გაგვიშვენებენ ? ჩვენს საუბარს აქვს ისე მნიშვნელობა? რომ გეტყვიან წადი სახლშიო, რას იზამ? ამის მეტად ხალხზე არ უნდა იზრუნოს ხელისუფლებამ? “
ვლადიმერ ინწკირველი: “ალბათ გამოგვიყოფენ ალტერნატიულ ფართს“
ქალაქ ოზურგეთის საკრებულოს დეპუტატი "ლეიბორისტული პარტიიდან" ნათია შარაშენიძე ამბობს, რომ ხელისუფლებას არ აქვს წარმოდგენილი ალტერნატიული ფართი, რომელსაც ტაქსის მძღოლებს შესთავაზებენ.
“ხელისუფლებამ კიდევ მრავალი სხვა დაპირებები ვერ და არ შეასრულა, ამიტომ უმუშევრად დარჩენილი მოქალაქეები იძულებულები არიან გამოვიდნენ ქუჩაში, საკუთარი ავტომანქანებით ტაქსაობით ირჩინონ თავი და ლუკმა პურის ფული მიიტანონ ოჯახებში.
ანუ უიმედოდ დარჩენილმა მოქალაქეებმა თავად იპოვეს გამოსავალი, თვითონ დასაქმდნენ (პირობითად) დღეს კი ხელისუფლებას ამ ხალხის არსებობაც აღიზიანებს, არ სურს მათი დგომა, მუშაობა.
იქმნება შთაბეჭდილება, რომ მათი დანახვაც აღარ უნდათ და ამკრძალავი ნიშნებით ცდილობენ აუკრძალონ ხალხს ქუჩაში დგომა. სხვას ვერაფერს დაარქმევ იმ ჩანაფიქრს რაც განზრახული აქვთ.
ჯერ დაასაქმონ ლუკმა პურზე გამოსული მოქალაქეები და შემდეგ იწუწუნოს ხელისუფალმა ტაქსებით გადატვირთული ქალაქის და გაჩერებების გამო.
ამასთან ერთად გასათვალისიწნებელია ის საკითხიც, რომ წარმოდგენილი არ არის ალტერნატიული ავტოსადგომები, რომელსაც მძღოლებს შევთავაზებთ“ _ ამბობს შარაშენიძე.
აღნიშნულ საკითხთან დაკავშირებით ქალაქ ოზურგეთის მუნიციპალიტეტის საკრებულოს თავმჯდომარე გელა კობალაძე ამბობს, რომ ჯერჯერობით შედგენილია პროექტი, რომელიც საკრებულოს სხდომაზე უნდა დამტკიცდეს. მისივე თქმით, ამ ეტაპზე ამკრძალავი ნიშნების დაყენება, მხოლოდ აბაშიძის ქუჩაზეა დაგეგმილი.
კობალაძე ამბობს, რომ ტაქსის მძღოლებს ალტერნატიულ ფართს _ ქალაქ ოზურგეთში მდებარე პოლიციის ყოფილი შენობის მიმდებარე ტერიტორიას გამოუყოფენ.
მისივე თქმით ეს საკითხი საკრებულოს უახლოეს სხდომაზე დღის წესრიგით იქნება გათვალისწინებული.
