საქართველოს პარლამენტის თავმჯდომარე დავით უსუფაშვილი ბიუროს სხდომის დასაწყისში გამოეხმაურა საქართველოს საკონსტიტუციო სასამართლოს ახლახან მიღებულ გადაწყვეტილებას, რომელიც ქვეყანაში მაჟორიტარული საარჩევნო ოლქების განსაზღვრის წესს ეხება.
როგორც დავით უსუფაშვილმა განაცხადა, საკონსტიტუციო სასამართლოში აღნიშნული სარჩელი ჯერ კიდევ ორი წლის წინ იყო შესული და განხილვის შედეგად სასამართლომ გადაწყვიტა, რომ ის ნორმები, რომლებიც მაჟორიტარული საარჩევნო ოლქების განსაზღვრის წესს ადგენს – ავტომატურად აბამს ოლქებს მუნიციპალიტეტის ადმინისტრაციული ტერიტორიების საზღვრებს – ჩათვალოს არაკონსტიტუციურად, რადგან ასეთ შემთხვევაში, მოქალაქეთა თანასწორობის ფუნდამენტური პრინციპი ილახება, ვინაიდან სხვადასხვა რაიონებში და ქალაქებში მცხოვრები მოქალაქეების ხმის წონა განსხვავდება ერთმანეთისგან 20-ჯერ, 25-ჯერ და ა. შ.
"მე მინდა მკაფიოდ განვაცხადოთ ის, რომ ამ გადაწყვეტილებით გაუქმდა ოლქების დადგენის წესი და არა მაჟორიტარული არჩევნები საქართველოში, მაჟორიტარული არჩევნები საქართველოში ეს არის კონსტიტუციით დადგენილი ნორმა.
სასამართლომ იმსჯელა იმაზე, თუ რა პრინციპების შესაბამისად უნდა ხდებოდეს ოლქების საზღვრების დადგენა, ანუ ოლქებში ამომრჩეველთა რაოდენობის განსაზღვრა“, – განაცხადა დავით უსუფაშვილმა.
პარლამენტის თავმჯდომარის განმარტებით, დებულებები საარჩევნო კოდექსში ბოლო 20 წლის განმავლობაში ფიგურირებს და ეს სისტემა წინა რამდენიმე ხელისუფლების მიერ იყო შემოღებული.
„ჩვენ, კოალიცია „ქართულ ოცნებას“ ამ საკითხზე გვქონდა ძალიან მკაფიო პოზიცია წინასაარჩევნო პერიოდშიც და შემდგომაც, რომ ეს ხარვეზი გასასწორებელია.
ჩვენ ამაზე ვმუშაობთ და უახლოეს ხანებში, საზოგადოებას შევთავაზებთ საარჩევნო რეფორმის შემდეგ ეტაპს. ბოლო წლების განმავლობაში ძალიან ბევრი რამ გაკეთდა თავისუფალი და სამართლიანი არჩევნების ჩასატარებლად და ჩვენ ამ საკითხზეც გვექნება, რა თქმა უნდა, ადეკვატური გადაწყვეტილებები, რაც საერთაშორისო სტანდარტებს, საქართველოს კონსტიტუციას, პოლიტიკურ წრეებში, საზოგადოებრივ წრეებში გამოთქმულ მოსაზრებებსა და რაც ყველაზე მნიშვნელოვანია, ჩვენი მოსახლეობის განწყობებს შეესაბამება, იმისთვის, რომ არჩევნები იყოს უფრო და უფრო სამართლიანი, თანასწორი და ეს პროცესი იყოს, რაც შეიძლება, ახლოს ევროპულ სტანდარტებთან“, – განაცხადა დავით უსუფაშვილმა.
როგორც პარლამენტის თავმჯდომარემ თქვა, აღნიშნულ საკითხებზე უფრო კონკრეტულად უახლოეს დღეებში იმსჯელებენ, თუმცა დღეს, ბიუროს სხდომაზე, საკონსტიტუციო სასამართლოს გადაწყვეტილებასთან დაკავშირებით განცხადების გაკეთება საჭიროდ მიიჩნია იმ მოტივით, რომ მეტი სიცხადე ყოფილიყო ამ საკითხებში.
მან კიდევ ერთხელ ხაზგასმით აღნიშნა, რომ საკონსტიტუციო სასამართლოს გადაწყვეტილების მიმართულება ემთხვევა იმ მიმართულებას, რაც კოალიცია „ქართულ ოცნებას“, საპარლამენტო უმრავლესობას ჰქონდა და პარლამენტი ამ საკითხებზე მოგვიანებით უფრო დეტალურად იმსჯელებს, რათა არც ოლქების მექანიკური დაყოფა მოხდეს და არც გათანაბრება, ვინაიდან პრობლემები ამანაც შეიძლება გამოიწვიოს.
